Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Biblia ka ambe engajtsïni aiangujka

 ARHUKUKATA 15

Profeta enga Babilonia pánhapka exesïndi ambe enga úkuarheaka orhepatini

Profeta enga Babilonia pánhapka exesïndi ambe enga úkuarheaka orhepatini

Danieli karasïndi ambe enga uáka Tata Diosïri Juramukua, ka na enga jatini janoaka Mesiasi. Babilonia uékopanhasïndi

DANIELI israelita máespti enga no méni jurajkupka Tata Diosïni, ante de Jerusaleni kʼamajkunhani Babilonia pánhaspti nájkiruka apenasi tumbi máepka. Nájkiruka Danieli ka máteru judiuecha jupikakataksï japka Babilonia, úsïrendiksï uánikua ambe úni. Iámindu jurhiatikuecha enga Danieli Babilonia japka Tata Diosï no méni jurajkuspti. Asta niáraspti ma jurhiatikua tsípikua jingoni pʼínhantani jima uératini engaksï lionicha japka, ka jurajkuspti eska exepiringa ambe úkuarhipirini iauani sánderu orhepatini. Sánderu jukaparhakua ambe enga Danieli uandantapka, jindespti Mesiasiri ka imeri Juramukueri ambe.

Danieli mítisïndi káni janopirini Mesiasi. Tata Diosïri ireta, ¿na xáni tiempu erokuarhipirini paraka janopiringa “Juramuti Mesiasi”? Danielinksï arhispti eska, enga na uérapiringia inde juramukua para tarhatanhantani Jerusaleni anapu bardechani, eska jima uératini 69 semana uéxurhinicheri nitamapiringa para Mesiasi janoni. Isï komueska ma semana na sieti jurhiatikua kámka, ístu, ma semana uéxurhinicheri sieti uéxurhini kámasïndi. Juramukua para tarhatanhantani bardecha, íntspenhasti uéxurhini 455 jimbo a. de J. iauani tátsekua enga na uarhipkia Danieli. Engachi jima uératini miiuska 69 “semanechani” —o 483 uéxurhini—, niárasïngachi uéxurhini 29 jimbo d. de J. ¿Ambe úkuarhespi i uéxurhini? Sánderu orhepatinchi exeaka. Ístuksï arhispti Danielini eska Mesiasi uándikunhapiringa para meiampini iámindu kʼuiripuecheri pekaduni (Daniel 9:24-26).

Mesiasi Juramutipirindi auandarhu. Jánhaskua ma jimbo, Danieli exespti nemani enga ísïpka “eska achatiri uájpa ma” —enga jindepka Mesiasi— andarherani jarhani Tata Diosïni. Jiájkani Jeoba íntskuspti, “uinhapikua, tʼíntskua ka juramukua”, juramukua ma enga jindepiringa para méntkisï. Tátsekua, Danieli mítispti sánderu Mesiasiri Juramukueri ambe: Mesiasi, juramupirindi máteru kʼuiripuechani jingoni enga arhiraapka “Tata Diosï Sánderu Kʼériri pímbinharhati erakukatecha” (Daniel 7:13, 14, 27).

Diosïri Juramukua kʼamajkuapirindi parhakpinirhu anapu juramukuechani. Tata Diosï úspti eska Danieli uandantapiringa ambe enga arhikuekenga inde tsánharhikua enga kánikua ísku pakatapka Nabukodonosorini, juramuti Babilonia anapuni. I juramuti, exespti kʼéri monumentu ma, enga éjpu orueripka, ka kʼénhikua ka jájkicha platerisptiksï, sïturi ka kʼéjtarakua kobrerisptiksï, tsikajtakuecha tiámuerisptiksï ka jantsiricha tiámu atsïmu jingoni jeuetakaterisptiksï. Jiájkani, exespti tsakapuni ma enga juata ma jimbo uérapka, i tsakapu, jantsiricharhu atasïrendi monumentuni ka purundurhintasïrendi. Danieli, arhispti Nabukodonosorini eska éjpu orueri, Babiloniani arhikuekasïrenga, ka eska máteru ambe enga xáni jukapka ima monumentu, máteru kʼéri juramukuechani arhikuekasïrenga engaksï tátsekua jupiringa. Tata Diosïri Juramukua jiájkani uénapirindi juramuni, engaksï juramuni japiringa ultimu kʼéri juramukuecha —jantsiricha tiámueri ka atsïmueri— ka kʼamajkuapirindi iámu parhakpini anapu juramukuechani. Ka tátsekua, juramupirindi iámu parhakpinirhu para méntkisï (Daniel, kapitulu 2).

Danieli ióni irekaspti, úspti jamberi exeni enga Babilonia uékopanhapka. Juramuti Siru, uékopaspti Babiloniani isï eska Tata Diosï na uandapka. Tátsekua, judiuechaksï uéakuntaspti Babilonia uératini jiájkani enga Jerusaleni andangutapkia setenta uéxurhini jandiajku pakarani. Juramuticha, saserdoticha ka profetecha engaksï no méni jurajkupka Tata Diosïni, orhekuapastiksï judiuechani ka íksï úspti ménderu úntani Jerusalenini ka sésiksï jántskantaspti Jeobaeri templuni. Joperu ¿ambe úkuarhespi enga na nitamapkia 483 uéxurhini enga uandanhapka?

(Pʼitakata jarhasti Daniel jimbo.)