Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Biblia ka ambe engajtsïni aiangujka

 ARHUKUKATA 2

Petanhantasptiksï Sési Jándekuarhu uératini

Petanhantasptiksï Sési Jándekuarhu uératini

Ánjili ma enga no kurhandijka, úsïndi eska Adani ka Eba ístu nóteruksï kurhajchaka Tata Diosïni. Uénasïndi jarhani pekadu ka uarhikua

TATA Diosï, ante de kʼuiripuni kuerani, kuerauaspti espirituechani engaksï no xarharajka, íksï espirituecha ánjilichestiksï. Ma ánjili —enga niárapka arhinhani Satanasi No Ambakiti— nóteru kurhajchaspti Tata Diosïni ka úspti eska Eba apiringa ima anhatapueri frutani enga Tata Diosï arhipka eska no apiringa.

Satanasi úspti eska akuitsi ma, uandontskuarhikupiringa Ebani para jakajkutarani eska Tata Diosïni jimbo ambakiti ambeksï tsïtakuarhixapka. Ístu arhiaspti eskaksï no uarhipiringa engaksï apiringa frutani, isï arhiaparini arhikuekaxapti eska Tata Diosï chikuanderakuaspka. No Ambakiti arhiaspti eska iámindu ambe sési uérakuapiringa, ka eskaksï ambakiti mímixekua ma jatsipiringa engaksï no kurhajchapiringa Tata Diosïni. Ka arhiaspti eskaksï úpiringa úni ambe engaksï tsitipiringa. Joperu i ambe kʼéri chikuanderakua máespti: i chikuanderakuesti enga uénaka jarhani. I chikuanderari i ambesï arhikuekaendi: ¿Sésikua jatsiski Tata Diosï para Juramutini iámindu amberi? ¿Jurhimbitiskiksï imeri juramukuecha? ¿Sési jaki kurhajchani imeri juramukuechani?

Eba jakajkuspti ima chikuanderakuani, uénaspti anhenchani frutani ka arhaspti. Tátsekua, íntskuspti Adanini, ka imajtu arhaspti. Nájkiruka ima ambe isï xarharaenga enajki, no no sési ambepi, kʼéri pekadu máespti, jimbokaksï no kurhajchaxapka Tata Diosïni. Imaksï, sési mítitixapti ambe engaksï úni japka: nóksï jiókuarhixapti Tata Diosïri juramukuani, enga iámindu ambe íntskuapka, imecheri pímbinhasï tsípikuani jamberi.

“Imakini éjpurhu chʼatajtsïkuati ka tʼuri irhandurhakuarhu ataaka.” (Génesis 3:15)

Tata Diosï arhiaspti na engaksï nitamakuarhenchapiringa imani jimbo engaksï úpka. Arhiaspti eska sánderu orhepatini jupiringa Uájpa ma enga uándikupiringa akuitsini, enga jindeka Satanasi. Tátsekua, arhispti Adani ka Ebani eskaksï uarhipiringa, joperu pʼamojkuaspti imeri uájpechani ka arhiaspti eska i ambe sánderu orhepatini úkuarhipiringa. ¿Ambe erokuarhikua jatsipirinksï Adaniri uájpecha? Jeoba aiatspespti eska ima, enga ima axapiringa, kʼamajkupiringa iámindu no sési nitamakuechani engaksï Adani ka Ebaeri kʼamanharhintskua jimbo uénapka jarhani. Joperu ¿né jindepirini Pʼimutantspiti, ka néna úkuarhepirini ima ambe, enga jimbo Tata Diosï axapiringa? Enga na karakuarhipani japka Biblia, i kurhamarhikua sánhani arhispti kurhangunhani.

Tátsekua, Tata Diosï petaatantaspti Sési Jándekuarhu uératini Adani ka Ebani, engaksï na uéakuntapkia jatsisptiksï para ánchikuarhini paraksï úni tʼireni. Tátsekuesptia enga Eba uénapka kánguarhiani uájpechani, orheta kánguarhispti Kainini. Sánderu orhepatini kánguarhiasptiksï máteru uájpechani, máruksï jindespti Abeli ka ístu Seti enga jindepka ióntki anapu Noeri parientemba.

(Pʼitakata jarhasti, Génesis kapituluecha 3 a 5 ka Jaŋaskuecha 12:9.)