Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Biblia ka ambe engajtsïni aiangujka

 ARHUKUKATA 20

Kristueri uarhikua

Kristueri uarhikua

Jesusi uaxastasïndi jimbanhi míantskua ma; ataranhantasïndi ka uándikunhasïndi chʼikarirhu

JESUSI tanimu uéxurhini ka terojkani páxaptia aianhpini, ka mítispti eska nóteru ióni kueratasïrengia paraksï uándikuni. Máru judiuecha engaksï religionirhu orhejtsïkuenga, uékasïrendiksï uándikuni, joperu chérhiasïrendiksï kʼuiripuechani, jimboka kʼuiripu uandasïrenga eska Jesusi profeta máespka. Jiájkani, Satanasi eratsitaraspti Judasïni Jesusiri apostulini ma paraka atarantapiringa imeri jorhentpirini. Engaksï religionirhu orhejtsïkuenga treinta tumina plateri meiamusptiksï.

Ima chúrikua enga Paskua únhantaenga, Jesusi tánguarhispti apostulichani jingoni paraksï Paskuani úntani. Ka enga arhipkia Judasïni eska uéntapiringa jima uératini, Kristu uaxastaspti jimbanhi míantskua ma: Ultimu Sena. Pʼiraspti kurhinda ma, ka enga kómarhikua úpkia, kʼepekuspti ka íntsaspti imeri onse apostulichani. Ka arhiaspti: ‘I arhikuekasïndi juchiti kuerpu enga chánksïni jimbo íntspinhaka, ka u je ini ambe jíntsïni míantspariniʼ. Tátsekua, pʼiraspti itsïmakuani ka arhiaspti: ‘I itsïmakua arhikuekasïndi jimbanhi eiatsperakua enga juchiti iurhiri jimbo úkata jaka, ka enga chánksïni jimbo tsïtanhakaʼ (Lukasʌ 22:19, 20).

Imani ultimu chúrikua jimbo, Jesusi uánikua ambe jorhendaspti apostulichani. Ístu, jimbanhi mandamientu ma íntsaspti: eskaksï mintsita jingoni uékperapiringa. Niáraspti jamberi arhiani: “Ini jimboksï mítiati iámindu kʼuiripuecha eskajtsï jindeska juchiti jorhenguarhiticha ekajtsï uékperaka máteru ka máteruni jingoni” (Juanu 13:34, 35). Jesusi kurhakuaspti apostulichani eskaksï no jámapiringa no sési pʼikuarherani imani jimbo enga nitamakuarhenchapiringa, ka tátsekua kánikua pʼikuarhinhikua jingoni kómarhijpikuaspti. Tátsekua, iáminduksï pirekuspti Tata Diosïni ka nirasptiksï jardini Getsemanirhu.

Jima, Jesusi tinguixurhispti ka uénhekuarhespti iámindu ambe Jeobani jingoni. Ka ma repentkuksï niáraspti sondaduecha, ka achaticha máru engaksï uarhiperatarakuechani káuenga ka saserdoticha, paraksï Jesusini jupikani. Paraksï úni mítintani, Judasï putinharhikuspti. Sondaduecha jupikasptiksï Kristuni ka apostulichaksï sïpakuarhispti.

Jesusi uandaspti judiuecheri kʼérati juesichani japarini eska ima Tata Diosïri Uájpespka. Juesichaksï uandaspti, eska Jesusi no sési uandaxapka Tata Diosïri ambe, ka eska ini jimbo úpiringa uándikunhani. Jiájkani, pásptiksï Ponsiu Pilatuni jingoni enga jindepka Roma anapu juramuti. Nájkiruka ima exepka eska Jesusi no ma ambe úspka, jurajkuspti eska ireta juramukupiringa, jimbokaksï uinhachaparini kurhakuxapka eska uándikupiringa Jesusini.

Kristu jima pánhaspti enga arhinhaenga Gólgota, ka sondadu Roma anapuecha jima cháparatasptiksï chʼikari ma jimbo. Ima inchatirhu tsándexapti ka ma repentku pápkandentaspti. Enga Jesusi uarhipkia, ístu kʼéri ma jenchespti. Kʼerenda ma jimbo engaksï jarhanharhitapka, jimaksï jatsintaspti Jesusini. Pauandikua, saserdoticha sésiksï mímutaspti imani jarhanharhikukatani ka axasptiksï nemaechani parakaksï kuápiringa. ¿Jima pakarapirini Jesusi para méntkisï? Nombe, jimboka sánderu kʼéri milagru úkuarhipiringa.

(Pʼitakata jarhasti Mateu kapitulu 26 ka 27, Markusʌ kapitulu 14 ka 15, Lukasʌ kapitulu 22 ka 23, ka Juanu kapitulu 12 a 19.)

^ párr. 15 Uákajtsï mítini sánderu, na enga xáni jukaparhakueka Jesusiri uarhikua, indeni libruni jimbo ¿Ambemindusï jorhentpejki Biblia?, kapitulu 5.

PARAJTSÏ SÁNDERU MÍTINI

¿AMBEMINDUSÏ JORHENTPEJKI BIBLIA?

Euajpintskua, sánderu ambakiti regalu Tata Diosïri

¿Ambeski euajpintskua? ¿Nénaksïni uá marhuachini?