Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Biblia ka ambe engajtsïni aiangujka

 ARHUKUKATA 6

Jobu no méni jurajkusïndi Tata Diosïni

Jobu no méni jurajkusïndi Tata Diosïni

Satanasi uandasïndi Tata Diosïni japarini eska Jobu no iámindu mintsita jingoni marhuakuxaka, joperu Jobu no jurajkusïndi Jeobani

ENGAKSÏ Tata Diosïri ánchikuarhiricha no sési nitamakuarhini jauaka, ¿uáksï útasï marhuakuni jarhani Tata Diosïni, nájkiruka isï xarharapiringa enajki no marhuakuaua? Achati ma enga arhinhaenga Jobu i ambe nitamakuarhenchaspti. Exeakachi na enga kʼamarhukupka i ambe.

Jobu, Abraniri parientembaespti. Ima jurhiatikuechani jimbo enga israelitecha Ejiptu japka, Jobu irekaxapti nani enga iásï Arabieka. Ma jurhiatikua, uénaspti Jobueri ambe uandanhani tánguarhikua ma jimbo enga Jeoba úpka auandarhu ánjilichani jingoni ka jima niáraspti Satanasi. Iáminduechani japarini, Jeoba uandaspti eska sési exesïrenga na enga Jobu marhuakuaenga ka na enga no méni jurajkupka, ini jimbo xarhataspti eska mintsikasïrenga Jobuni. Joperu Satanasi uandaspti eska Jobu isï jimbosï marhuakuenga Tata Diosïni, jimboka kuájchakusïrenga ka uánikua ambe kóndixapka, ka arhispti eska, enga ima euantapiringa iámindu ambe, ima jurajkupiringa Jeobani.

Tata Diosï jurajkuspti eska No Ambakiti euantapiringa Jobuni jatsikuarhekuani, uájpechani ka eska pʼamenchatapiringa. Jimboka Jobu no mítispka eska Satanasispka enga i ambe úni japka, no úsïrendi jánhaskani andisï Tata Diosï jurajkuni japi eska isï nitamanchapiringa. Nájkiruka Jobu i ambe nitamanchani japka, no méni jurajkuspti Jeobani.

Jiájkani, jurhasptiksï pʼorhembini tanimu kʼuiripuecha engaksï uandaenga eskaksï imeri amiguembechespka, ka úndasptiksï mámaru ambe arhini. Imecheri arhijtsïkperakuechani jingoni enga iásï sáno iámu libru Jobuerika, uékasïrendiksï jakajkutarani, eska ima no sési jásï ambe úspka ka no uandantani, ka eska Jeoba isï jimbosï kastigarini japka. ¡I, chikuanderakua ambejkuespti! Niárasptiksï jamberi uandani eska Tata Diosï no jukaparharasïnga imeri ánchikuarhirichani ka ni mintsikaani. Joperu Jobu no jakajkuspti ima chikuanderakuechani, ka arhiaspti eska jiájkani jamberi marhuakupiringa Tata Diosïni astaka uarhipiringa.

Joperu Jobu no sési úspti, jimboka jukari uandanhiaspka néna kuájpikuarhini. Sánderu uandanhiaspti néna pakarapirini máteruechani japarini ka no uandanhiani Jeobaeri arhinhakuani jimbo ka imeri juramukuani jimbo. Isï jimbo, Eliu, tumbi ma enga iámindu ambe kurhani japka, xukaspti. Ístu uinhamu xukaaspti imechani engaksï uandaenga eskaksï Jobueri amiguespka.

Tátsekua, Jeoba eratsitaraspti Jobuni. Úraparini ambe enga kueraka, xarhatakuspti na enga xáni sapichu ambeka kʼuiripu Jeobani jingoni enga xáni kʼéri ambeka. Jobu kaxumbitispti ka jiókuarhispti ambe enga Jeoba arhipka. Ka Jeoba, enga “uékpitika ka pʼamojpiti”, újchakuraspti Jobuni, kénditakuspti pʼamenchakuani, íntskuntaspti tsimani uelta sánderu imeri jatsikuarhekuani, ka kóndispti máteru diesi uájpechani (Santiagu 5:11). Enga Jobu no méni jurajkupka Jeobani, marhuaspti para ambakiti mókuntskua ma íntskuni Satanasini ka xarhatakuni eska kʼuiripuecha úakaksï marhuakuni Tata Diosïni méntkisï, nájkirukaksï no sési nitamakuarhini jauaka.

(Pʼitakata jarhasti Job jimbo.)