Exeni ambe enga jataka

Índisi jimbo nirani

Jeobaeri testiguecha

Erakuni idiomani Purépecha

 ARHUKUKATA 9

Israeli juramuti ma kurhajkuarhisïndi

Israeli juramuti ma kurhajkuarhisïndi

Sauli, orheta juramuti Israeli anapu no kurhajchasïndi Jeobani. Tata Diosï pakatperakua ma úsïndi Dabidi jingoni enga juramutiuaka tátsekua, ka aiakusïndi eska imeri juramukua no méni kʼamaraka

ENGA uarhipkia Sansoni, irekaspti Israeli achati ma enga arhinhaenga Samueli, i juesispti ka profeta. Israelitecha uékasïrendiksï isïni eska máteru nasionicha, jimbosïksï arhipti Samuelini eskaksï uékasïrenga juramutini ma. I ambe ikiataspti Jeobani, joperu kurhajchaaspti ka arhispti Samuelini eska juramuti úpiringa Saulini. Sauli kaxumbitispti, joperu tátsekua kʼéri pʼikuarheraspti ka kʼamarhukuspti nóteru kurhajchani Tata Diosïni. Jimbosï Jeoba nóteru jaiapanhintaptia ka arhispti Samuelini eska erakupiringa tumbini ma enga Dabidi arhinhaenga para juramutini tátsekua. Joperu uánikua uéxurhini nitamapirindi paraka Dabidi uénapiringa juramuni.

Ma jurhiatikua, Dabidi niraspti pʼorhembiani imeri ermanuembechani engaksï Sauliri sondaduepka. Ka exeaspti sondaduechani kánikuaksï chéni jarhani. ¿Ambe úkuarhexapi? Kʼéri uarhipiti ma Filistea anapu, enga arhinhaenga Goliati, kánikua teresmarhuaxapti sondadu israelitechani ka Tata Diosïni. Dabidi kánikua ikiaspti, ka nájkiruka tumbi sapichuepka, arhispti eska uarhiperapiringa imani jingoni asta uarhikuarhu jamberi. Jonda ma jingoni ka tsakapuechani máru jingoni, Dabidi niraspti uarhiperani imani jingoni enga sáno tanimu metru isï iójtarapka. Goliati teresmarhuspti Dabidini, joperu Dabidi arhispti eska andapiringa, jimboka Jeobaeri arhinhakua jimbo uarhiperapiringa. Dabidi májku tsakapu úraspti para uándikuni Goliatini. Tátsekua Goliatiri espadani jingoni kachujchakuspti. Engaksï Filistea anapu sondaduecha exepka i ambe, sïpakuarhisptiksï kánikua chéparini.

Juramuti Sauli kánikua sési exespti Dabidiri tsʼiuekuani ka íntskuspti ambakiti ánchikuarhita ma ejersiturhu. Joperu enga Sauli exepka eska Dabidi uénaspka uánikua uarhiperakuechani andaani, úndaspti ikiakuni asta jamberi uékani uándikuni. Paraksï no uándikuni Dabidi niraspti sïpakuarhini. Nájkiruka uánikua uéxurhini sïpakuarhikupka Saulini, Dabidi méntkisï janhanharhispti. ¿Andi? Jimboka mítispka eska Jeobaespka enga juramuti úpka. Ióni jimbo tátsekua, Sauli uarhispti uarhiperakua ma jimbo. Jiájkani Dabidi niáraspti juramuni isï eska Jeoba na eiatspipka.

“Ji sési uaxastaka imeri juramukuani paraka jindeuaka para méntkisï.” (2 Samuel 7:13)

Dabidi templu ma uékasïrendi úkuni Jeobani. Joperu Tata Diosï arhispti eska no Dabidipiringa enga úpiringa templuni, sánderu sési imeri uájpa ma. Ka i Salomonispti. Joperu Jeoba sánderu kʼéri kóntperata ma íntskuspti Dabidini: pakatperakua ma úspti imani jingoni, aiakuspti eska ima jindepiringa orheta juramuti uánikua juramuticheri engaksï jupiringa imeri familiani jimbo. Ka no máteru xásï juramukua niárapirindi jarhani. Ka indeni jimbo jupirindi Pʼimutantspiti, ima Uájpa enga Jeoba Edenirhu eiatspipka. Ima jindepirindi Mesiasi enga arhikuekajka Erakukata, ima enga Jeoba erakuka para Juramutini imeri Juramukuarhu, juramukua enga jauaka para méntkisï.

Kánikua meiamukua pʼikuarheraparini, Dabidi uánikua ambe tánaspti, kánikua oru ka plata enga úrakuarhepiringa para únhani Tata Diosïri templu. Ístu, Tata Diosïri sésikua jimbo uánikua salmuechani —engaksï jindeka pirekuecha— uántasti para Jeobani kʼéri ambe arhini. Enga Dabidi tʼarhepipkia, kʼéri ambe arhispti Jeobani ini ambe uandaparini: “Jeobaeri espirituespti enga uandapka jíndeni jimbo, ka imeri uandakuecha juchiti penchumikua jimbo jarhasptiksï” (2 Samuel 23:2).

(Pʼitakata jarhasti 1 Samuel, 2 Samuel, 1 Crónicas, Isaías 9:7, Mateu 21:9, Lukasʌ 1:32 ka Juanu 7:42.)