Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 116: Néna irekani para méntkisï

Uandantskua 116: Néna irekani para méntkisï

¿MÍTISKIRI ambeksï arhintaxaki i sapicha? Jo, ini libruni engari tʼu arhintani jaka… Juchiti libru enga Bibliaeri ambe uandajka. Ka ini mísmu uandantskuanksï arhintaxati… “Néna irekani para méntkisï”.

Sapi ma arhintaxati

¿Mítiskiri ambeksï jorhenguarhisïni? Orheta, eskachi jatsiska para jorhenguarhini Jeobaeri ka imeri Uájpa Jesusiri ambe para úni irekani para méntkisï. Biblia uandasïndi: ‘I jindesti xanharu enga pájpijka tsípikuarhu para méntkisï. Jorhenguarhi ima Tata Diosïri ambe enga sési jimboeka, ka ístu imeri Uájpa Jesukristueri ambeʼ.

¿Nénachi uá jorhenguarhini Tata Diosï Jeobaeri ambe ka imeri Uájpa Jesusiri? Ma jindesti, iámu arhintani Juchiti libru enga Bibliaeri ambe uandajka. I libru uánikua ambe uandasïndi Jeobaeri ka Jesusiri ambe, ¿no ísïski? Ka uandasïndi uánikua ambe engaksï Jeoba ka Jesusi úka ka engaksï sánderu orhepatini uáka. Peruchi jatsiska para arhintani máteru ambe.

Biblia ma

¿Exesïniri máteru libruni enga kétsekua jaka? Bibliaesti. U eskakini nema arhichintaka Bibliarhu jima enga i uandantskuecha pʼitanhaka. Bibliajtsïni aiangusïndi ambe engachi uétarhinchajka parachi marhuakuni Jeobani na enga ima uékajka ka úni irekani para méntkisï. Jimbochisï jatsika para pʼindeni arhintani Bibliani.

Peru no indejku ambe uétarhisïndi eskachi jorhenguarhiaka Tata Diosï Jeoba ka Jesukristueri ambe. Úpiringachi uánikua ambe mítini imecheri ambe ka ambe engaksï jorhentpejka ka útasïchi no úni jatsini tsípekua para méntkisï. ¿Mítiskiri ambe útasï uétarhisïni?

Ístuchi jatsiska para irekani ísï eskachi na jorhenguarhiaka. ¿Miásïniri Judasï Iskariotini? Inde kuenta úkuarhesïrendi 12 apostulichani jingoni enga Jesusi erakuapka. Judasï uánikua ambe mítispti Jeobaeri ka Jesusiri ambe. Peru, ¿ambe úkuarhinchaski? Sánderu orhepatini úndasti nóteru uandanhiani máteruechani jimbo, ka atarantasti Jesusini 30 tumina plateri jimbo. Judasï no intsïnhaati tsípikua para méntkisï.

¿Miásïniri Gueasini, engachi jorhenguarhika Uandantskua 69 jimbo? Inde uékaspti jatsini tumina ka takusï enga no inderipka. Ka chikuanderasti para úni jatsini indeni ambe, ka Jeoba kastigaristi. Ka ístujtsïni kastigariati engachi no kurhajchauaka imeri juramukuechani.

Peruksï jarhasti uánikua ambakiti kʼuiripuecha engaksï méntkisï marhuakupka Jeobani. Jucha uékasïnga ísïni, ¿no ísïski? Sapi Samueli, ambakiti ejemplu máesti. Miánta, eskachi na exeka Uandantskua 55 jimbo, tanimu o tʼámu uéxurhintku jatirispti enga uénapka tabernakulurhu marhuakuni Jeobani. Ísï jimbo, nájkirukari sapika, nori jukari sapichueska para Tata Diosïni marhuakuni.

Ísïsti, iáminduchi uékasïnga ísïni eska Jesukristu. Enga apenasi sapipka, templurhu jarhaspti, imeri Táti Jeobaeri ambe aianguani máteruechani, ísï eskachi na jorhenguarhika Uandantskua 87 jimbo. Ju májkueni úni. Ju iáminduechani uandontskuarhikuani Jeobaeri ambe, juchari ambakiti Tata Diosïri ka ístu imeri Uájpa Jesukristueri. Engachi ísï úska, uákachi irekani para méntkisï jimbanhi paraisurhu enga Tata Diosï juaaka ixú Echerirhu.

Juanu 17:3; Salmo 145:1-21.



Kurhamarhikuecha

  • ¿Ambechi jatsiski para jorhenguarhini engachi uékaka irekani para méntkisï?
  • ¿Nénachi uá jorhenguarhini Jeoba ka Jesusiri ambe, ísï eskaksï na úni jaka sapicha engaksï dibujurhu jaka?
  • ¿Náki máteru libru xarharasïni dibujurhu, ka andichisï jatsi para méntkisï arhintani?
  • Engachi jorhenguarhini jauakia Jeoba ka Jesusiri ambe, ¿ambechi máteru ambe jatsiski para úni engachi uékaka jatsini tsípekua para méntkisï?
  • ¿Ambechi jorhenguarhisïni uandantskua 69 jingoni?
  • ¿Ambejtsïni jorhendasïni ambakiti ejemplu Samueliri, enga uandantskua 55 jimbo jaka?
  • ¿Nénachi uá májkueni úni eska Jesukristu, ka engachi ísï uáka, ambechi jatsia sánderu orhepatini?

Máteru kurhamarhikuecha

  • Arhinta Juanu 17:3.

    ¿Néna xarhatasïni Karakatecha eska jorhenguarhini Jeoba ka Jesukristueri ambe no solu jindesti mítini uánikua ambe? (Mat. 7:21; Sant. 2:18-20; 1 Juanu 2:17.)

  • Arhinta Salmo 145:1-21.

    ¿Andichisï jatsi para kʼéri ambe arhini Jeobani? (Sal. 145:8-11; Jaŋ. 4:11.)

    ¿Jeoba néna “sési kámasïni iáminduechani”, ka néna úsïni i ambe eskachi sánderu andarheraaka? (Sal. 145:9; Mat. 5:43-45.)

    Engachi uékajka Jeobani, ¿ambechi uá? (Sal. 119:171, 172, 175; 145:11, 12, 21.)