Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 113: Pablu Roma jarhasti

Uandantskua 113: Pablu Roma jarhasti

EXE kadenani enga Pablu jukajkurhatini jaka, ka ístu sondadu romanuni enga kuáni jaka. Pablu ónhakata jarhasti Roma. Erokuarhixati ambe uá Sésari romanu imani jingoni. Enga ónhakata jarhajka, jurajkusïndiksï eska pʼorhembinhaka.

Tanimu jurhiatikua tátsekua enga Pablu niárajka Roma, pʼitarkuarhiasïndi máru judiuecheri orhejtsïkutichani paraksï jurhani exeni. Jimboksïsï uánikua judiuecha engaksï Roma irekaka jurhajtiksï exeni. Ka Pablu aianguasïndi Jesusiri ka Tata Diosïri juramukueri ambe. Máruksï jakajkusïndi ka kristianuksï úkuarhisïndi, peruksï máru no jakajkusïndi.

Pablu ónhakata jarhasti

Ístu Pablu eianguasïndi sondaduechani engaksï kuájka. Tsimani uéxurhini enga ixú jarhajka ónhakata, Pablu jánguarhintasïndi aianguani iáminduechani. I ambe jimbo, Sésariri kʼumanchikuajtu kurhaasïndi ambakiti eianhperakua Juramukuerini ka máruksï kristianu úkuarhisïndi.

Peru, ¿néski i enga mesarhu karani jaka? ¿Mítiskiri néski? Jo, Timoteuesti. Indejtu ónhanhaspti jimboka aianhpisïrenga Tata Diosïri Juramukueri ambe, peru iásï jurajkunhastia. Ka jurhasti jarhuatani Pabluni. ¿Mítiskiri ambe karaxaki? Ju exeni.

¿Miásïniri iretechani Filipusi ka Éfesu, engachi uandantskua 110 jimbo jorhenguarhika? Pablu jima jarhuajpisti uaxastani kúnguarhikuechani. Iásï Pablu enga ónhakata jaka ixú, karakuasïndi ini kristianuechani. I karakatecha engaksï arhinhajka Efesu ka Filipusʌ, Bibliarhuksï jarhasti. Iásï Pablu arhisïndi Timoteuni, ambe enga karakuauaka Filipusi anapu kristianuechani engaksï imecheri amigueka.

Filipusi anapuecha kánikuaksï sési kámasti Pabluni. Intsïmperakuaksï ma axakusïndi ixú enga ónhakata jaka, ka jimbosï Pablu meiamukua íntskuantani jati karakatarhu. Epafroditu juásti ini intsïmperakuani. Peru uinhamu pʼamenchasti ka sáno uarhisïrendia. Peru iásï sési jarhastia ka sóntku kʼuanhatsentati Filipusi imeri iretarhu. Ka enga kʼuanhatsentaka inde paati karakatani enga Pablu ka Timoteuksï karaka.

Kʼataperakuarhu, Pablu karaasïndi tsimani karakatechani engaksï Bibliarhu jaka. Ma jindesti para kristianu Kolosasi anapuecha. ¿Mítiskiri néna arhinhasïni i karakata? Kolosasi. Máteru jindesti karakata ma enga axakujka imeri amigu Filemonini, enga Kolosasi irekaka. Karakata, Onesimueri ambe uandasïndi, Filemoniri jántspiriri.

Onesimu sïpakuarhikuspti Filemonini ka jurhaspti Roma irekani. Onesimu mítisïndi eska Pablu ixú ónhakata jarhaspka. Ka niraspti pʼorhembini ka Pablu uandontskuarhikuspti Tata Diosïri ambe. No ióni jimbo, Onesimu kristianu úkuarhispti. Iásï Onesimu no sési pʼikuarherasïndi enga ísï sïpakuarhipka. Ísï jimbo, ¿mítiskiri Pablu ambe karakusïni Filemonini?

Pablu kurhakusïndi Filemonini eska puákuntaka Onesimuni. Karasïndi: ‘Kuanhaskuchentaxakakini’. ‘Peru iásï no solu chíti jántspiristi. Ístu ambakiti erachi máesti.’ Enga Onesimu kʼuanhatsintajka Kolosasi, paasïndi ini tsimani karakatechani, ma para Kolosasi anapuecha ka máteru para Filemoni. ¡Eranhaska na enga Filemoni xáni sési pʼikuarherapka mítini eska Onesimu iásï kristianueskia, ísï eska ima!

Enga Pablu karakuajka Filipusi anapuechani ka ístu Filemonini, ambakiti ambe aianguasïndi. Arhiasïndi Filipusi anapuechani: ‘Axachixakaksïni Timoteuni’. ‘No ióni jimbo, jíjtuksïni niuaka pʼorhembini.’ Ka Filemonini karakusïndi: ‘Jatsichirini nani engani uáka pakarani’.

Enga Pablu nóteru ónhakata jarhajkia, pʼorhembiasïndi erachi kristianuechani mámaru ísï anapuechani. Peru tátsekua ménderu Pablu ónhakata jarhasïndi Roma. Peru iásï mítisti eskaksï uándikuaka. Ísï jimbo, karakusïndi Timoteuni para sóntku jurhani. Karakusïndi: ‘Ji no méni jurajkuska Tata Diosïni’. ‘Ka imarini meiamuntati’. Máru uéxurhinicha tátsekua enga Pablu uarhipkia, Jerusaleni kʼamajkunhasïndi ménderu peru iásï romanuechani jimbo.

Peru Biblia útasï uánikua ambe jatasti. Jeoba úsïndi eska apostuli Juanu karauaka ultimu libruechani, ka ma jindesti Jaŋaskuecha. I libru uandasïndi ambe enga sánderu orhepatini úkuarhiaka. Ju exeni ambe úkuarhia sánderu orhepatini.

Ukuecha 28:16-31; Filipusʌ 1:13; 2:19-30; 4:18-23; Ebreu 13:23; Filemoni 1-25; Kolosasi 4:7-9; 2 Timoteo 4:7-9.



Kurhamarhikuecha

  • ¿Pablu néni aiangusïni Tata Diosïri ambe enga ónhakata jarhajka Roma?
  • ¿Néski enga mesarhu uaxakatini jaka, ka ambe úxaki Pabluni jimbo?
  • ¿Néski Epafroditu, ka ambe pásïni enga níntajka Filipusi?
  • ¿Pablu andisï karakujki imeri amigu Filemonini?
  • ¿Ambe úsïni Pablu enga nóteru ónhakata jarhajkia, ka ambe úkuarhinchasïni tátsekua?
  • ¿Jeoba néni úrasïni para karaani ultimu Bibliarhu anapu libruechani, ka ambe uandasïni Jaŋaskuecheri libru?

Máteru kurhamarhikuecha

  • Arhinta Ukuecha 28:16-31 ka Filipusʌ 1:13.

    ¿Pablu néna úraski imeri tiempuni enga ónhakata japka Roma, ka Pablueri ambakiti jakajkukua néna jarhuataski kúnguarhikuarhu anapuechani? (Uku. 28:23, 30; Fili. 1:14.)

  • Arhinta Filipusʌ 2:19-30.

    ¿Pablu náki ambakiti uandakuechani karaaspi Timoteu ka Epafroditueri ambe, ka nénachi uá májkueni úni? (Fili. 2:20, 22, 25, 29, 30; 1 Kor. 16:18; 1 Tes. 5:12, 13.)

  • Arhinta Filemoni 1-25.

    ¿Pablu ambe jimbo eratsitaraspi Filemonini paraka úpiringa ambe enga sési japka, ka iásï néna jorhendaasïni orhejtsïkutichani paraksï ísï úni? (File. 9; 2 Kor. 8:8; Gal. 5:13.)

    ¿Néna xarhatasïni Pablu jimini Filemoni 13, 14 jimbo eska janhanharhisïrenga ambe engaksï pʼikuarheraenga máteru erachicha kúnguarhikuarhu anapuecha? (1 Kor. 8:7, 13; 10:31-33.)

  • Arhinta 2 Timoteu 4:7-9.

    Májkueni eska Pablu, ¿andichisï uá mintsikani eskajtsïni Jeoba meiamuntaka engachi no méni jurajkuska? (Mat. 24:13; Ebr. 6:10.)