Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 107: Tsakapkuerasïndiksï Estebanini

Uandantskua 107: Tsakapkuerasïndiksï Estebanini

ACHAATI enga tinguixurhitini jaka, Estebanisti. Jorhenguarhiri máesti enga no méni jurajkuka Jesusini. ¡Peru exe ambe úkuarhinchaxaki! Íksï achaaticha kʼuaniraxati kʼérati tsakapuechani. ¿Andiksïsï xáni ikiakujki, engaksï i ambe jamberi úkujka? Ju exeni.

Tsakapkuerasïndiksï Estebanini

Tata Diosï jarhuatasïndi Estebanini kʼérati milagruechani uáni. Íksï achaaticha no jaiapanhintasïndi i ambe, ka no sésiksï arhisïndi jimboka ístu jorhentpesïnga jurhimbikuani. Peru Tata Diosï kánikua jánhaskua íntskusïndi Estebanini ka xarhatakuasïndi eska ambe enga indecha jorhentpejka chikuanderakua ambeska. I ambe sánderu ikiataasïndi, jupikasïndiksï ka úsïndiksï eska kʼuiripuecha máru chikuanderakua ambe uandaaka inderi ambe.

Kʼéri saserdoti kurhamarhisïndi Estebanini: ‘¿Ísïski eskaksï na uandajka indecha?ʼ. Ima mókukusïndi ambakiti arhijtsïkperata Bibliarhu anapu ma jingoni. Ka tátsekua uandasïndi eska ióntki no ambakiti achaaticha ikiakuaspkaksï Tata Diosïri profetechani. Ka ístu arhiasïndi: ‘Chájtsï májkueniska. Uándikuskajtsï Jesusini, Tata Diosïri marhuatspirini, ka nójtsï kurhaajchaxaka Tata Diosïri juramukuechaniʼ.

¡I ambe kánikua ikiatasïndi religioniri orhejtsïkutichani! Kitsimuantasïndiksï sïnichani xáni ikiani. Peru Estebani eranchisïndi ka uandasïndi: ‘¡Exe je! Exexaka Jesusini auandarhu anhaxurhitixati jurhijkandani ladu Tata Diosïni jingoniʼ. Íksï achaaticha, óndikuarhisïndiksï ka atasïndiksï Estebanini. Antsikusïndiksï asta iretarhu uéramanisï.

Ixú, pʼíntasïndiksï imecheri xukuparhakuechani ka íntskuasïndiksï Sauluni para exeani. ¿Exesïniri Sauluni? Jiájkani uénasïndiksï tsakapkuerani Estebanini. I tinguixurhisïndi eskari na exejka, ka kómarhisïndi: ‘Jeoba, asï kastigaria i no sési jásï ambe jimboʼ. Estebani mítisti eskaksï máru úxaka i ambe, religioniri orhejtsïkuticheri chikuanderakua jimbo. Enga Estebani i ambe uandajka, uarhisïndi.

Engakini nema úchijka no sési jásï ambe, ¿jámasïniri tʼujtu ísï úkuantani, ori kurhakusïni Tata Diosïni eska no sési ambe úkuaka? Estebani ka Jesusi nóksï ísï ústi. Imecha sési kaasti imechani engaksï no sési kámauenga. Ju májkueni úni.

Ukuecha 6:8-15; 7:1-60.



Kurhamarhikuecha

  • ¿Néski Estebani, ka Tata Diosï ambe jarhuataski úni?
  • ¿Estebani ambe uandasïni enga xáni ikiatajka religioniri orhejtsïkutichani?
  • Engaksï antsikujkia Estebanini asta iretarhu uéramanisï, ¿ambeksï úkusïni?
  • ¿Néski tumbi dibujurhu anapu enga xukuparhakuechani kuidariani jaka?
  • ¿Estebani ambe kurhakusïni Jeobani ante de uarhini?
  • ¿Nénachi uá májkueni úni eska Estebani engajtsïni nema no sési ambe úchiaka?

Máteru kurhamarhikuecha

  • Arhinta Ukuecha 6:8-15.

    ¿Ambe ka ambeksï úrasïni iásï anapu religioniri orhejtsïkuticha paraksï pʼínguni aianhpikuani engaksï Jeobaeri aianhpiricha újka? (Uku. 6:9, 11, 13.)

  • Arhinta Ukuecha 7:1-60.

    ¿Ambe jarhuataski Estebanini para úni sési eianguani ambakiti eianhperakuani Sanedriniri anapuechani, ka ambechi jorhenguarhisïni? (Uku. 7:51-53; Rom. 15:4; 2 Tim. 3:14-17; 1 Ped. 3:15.)

    ¿Nénachi jatsiski para exeani imechani engaksï no uékajka eskachi eianhpiaka? (Uku. 7:58-60; Mat. 5:44; Luk. 23:33, 34.)