Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 102: Jesusi tsípiti jarhasti

Uandantskua 102: Jesusi tsípiti jarhasti

¿MÍTISKIRI néski uarhiti ka íksï tsimani achaticha? Maria Magdalenaesti, Jesusiri amiga ma. Ka achaticha engaksï urapiti xukuparhatini jaka, ánjilichestiksï. Maria eranhaxati nani enga jatsinhapka Jesusi, ¡peru Jesusiri kuerpu nóteru jarhastia! ¿Né páski? Ju exeni.

Ánjilichaksï uandontskuarhikuxati Maria Magdalenani

Enga Jesusi uarhipkia, saserdotichaksï arhisïndi Pilatuni: ‘Enga Jesusi tsípiti japka, uandaspti eska tanimu jurhiatikua jimbo tsíntapiringa. Ísï jimbo, axa nemani paraksï kuáni kuebani. ¡Ísï imeri jorhenguarhirichaksï no uáti sïpani kuerpuni ka tátsekuaksï uandani eska tsíntaska!’. Pilatu arhiasïndi eskaksï ima axauaka sondaduechani.

Peru xarhintku enga Jesusi andangutapkia tanimu jurhiatikua uarhirini, repentku xarharasïndi Jeobaeri ánjili ma. Uirhijpasïndi tsakapuni enga míkani japka kuebani. Sondaduechaksï no úsïndi manakuarhini xáni chéni. ¡Tátsekua engaksï eranhajka jima enga Jesusi jatsinhapka, nóteruksï exentasïndi kuerpuni! Máru sondaduechaksï nirasïndi iretarhu ka aianguasïndiksï saserdotichani. ¿Mítiskiri ambeksï úsïni i no ambakiti saserdoticha? Meiamuasïndiksï paraksï chikuanderani. Arhiasïndiksï: ‘Uanda je eska imeri jorhenguarhirichaksï páska, engajtsï kʼuíni japka’.

Enga i ambe úkuarhini japka, Jesusiri amigaembechaksï jurhasïndi jima enga Jesusi jatsinhapka. ¡Jesusi nóteru jarhastia jima! Repentku, tsimani ánjilichaksï xarharasïndi takusï meremeresï jukarini ka arhiasïndiksï: ‘¿Andijtsïsï ixú jirinhantajki Jesusini?’. ‘Ima tsíntastia. Ni je ka aiangua je imeri jorhenguarhitichani.’ Uarhitichaksï uiriipasïndi. Peru engaksï nirani jarhajkia, achaati ma anhaxustaasïndi. ¿Mítiskiri néski? ¡Jesusisti! Arhiasïndi: ‘Ni je ka eiangua je juchiti jorhenguarhitichani’.

Engaksï uarhiticha aianguajka jorhenguarhitichani eska Jesusi tsípiti jarhaska ka eskaksï exeska, nóksï úsïndi jakajkuni. ¡Pedru ka Juanu nirasïndiksï uiriipani kuebarhu, peru kuerpu nóteru jarhastia! Engaksï ícha níntajkia, Maria Magdalena tátsepani pakarasïndi. Jiánisï eranhajti ka exeajti tsimani ánjilichani.

¿Mítiskiri ambe úkuarhinchaski Jesusiri kuerpu? Tata Diosï no náerasti. Tata Diosï no tsítantasti Jesusini imani mísmu kuerpuni jingoni. Jimbanhi kuerpu ma íntskusti, espirituali jásï ma, enga ísïpka eska ánjilicheri. Peru para úni xarhatakuani jorhenguarhitichani eska tsípiti jarhaska, Jesusi úrasïndi ma kuerpu enga újka xarharani.

Mateu 27:62-66; 28:1-15; Lukasʌ 24:1-12; Juanu 20:1-12.



Kurhamarhikuecha

  • ¿Néski uarhiti ka tsimani achaaticha engaksï dibujurhu jaka, ka naniksï jarhaski?
  • ¿Pilatu andisï juramukuajki saserdotichani eskaksï axauaka sondaduechani paraksï kuáni Jesusiri kuebani?
  • ¿Ánjili ma, ambe úsïni xarhintku jiáni enga Jesusi tanimu jurhiatikua pájkia uarhiri, peru saserdotichaksï ambe úsïni?
  • Máru uarhiticha, ¿andiksïsï ísku pakarajki engaksï nirajka exeni Jesusini kuebarhu?
  • ¿Pedru ka Juanu andiksïsï uiriipajki nirani Jesusiri kuebarhu, ka ambeksï exesïni jima?
  • ¿Ambe úkuarhinchasïni Jesusiri kuerpu, ka ambe úsïni ima para xarhatakuani jorhenguarhitichani eska tsípiti jarhaska?

Máteru kurhamarhikuecha

  • Arhinta Mateu 27:62-66 ka 28:1-15.

    Enga Jesusi tsíntapka, ¿nénaksï pekadu úski kʼéri saserdoticha, fariseuecha ka orhejtsïkuticha, espiritu santuni jingoni? (Mat. 12:24, 31, 32; 28:11-15.)

  • Arhinta Lukasʌ 24:1-12.

    ¿Néna xarhatasïni Jesusiri tsíntskueri uandantskua eska para Jeoba, uarhitichajtuksï mintsinharhikueska? (Luk. 24:4, 9, 10; Mat. 28:1-7.)

  • Arhinta Juanu 20:1-12.

    ¿Nénajtsïni jarhuatasïni Juanu 20:8, 9 eska jukaparhakueska tekantskua jatsini engachi no kurhanguaka na úkuarhia Bibliarhu anapu profesia ma? (Pro. 4:18; Mat. 17:22, 23; Luk. 24:5-8; Juanu 16:12.)