Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 90: Uarhiti ma jingoni posurhu

Uandantskua 90: Uarhiti ma jingoni posurhu

JESUSI anhaxurhisti mintsikuarhini ini posuni jimbo enga Samaria japka. Imeri jorhenguarhiticha nirastiksï iretarhu tʼirekua piáni. Uarhiti enga Jesusi uandontskuarhikuni jaka jurhasti itsï pʼitani. Ka Jesusi arhisïndi: ‘Íntskurini itsï parani itsïmani’.

Jesusi uandontskuarhixati samaritana ma jingoni

I ambe ísku pakatasïndi uarhitini. ¿Mítiskiri andi? Jesusi judiuesti ka uarhiti samaritanaesti. Ka uánikua judiuecha nóksï exenchaasïndi samaritanuechani. ¡Nóksï jamberi uandajpaasïndi! Peru Jesusi uékaasïndi iámindu jásï kʼuiripuechani. Arhisïndi uarhitini: ‘Engari mítipiringa néski engakini kurhachini jaka itsï, tʼuri kurhakupiringa, ka imakini íntskupirindi itsï enga tsípikua íntspejka’.

Uarhiti arhisïndi: ‘Tata’, ‘posu jauanhesti, ka tʼu nori kámasïnga baldi ma. ¿Naniri pʼipirini itsïni enga tsípikua íntspijka?’.

Jesusi arhisïndi: ‘Engari itsïmaka i posurhu anapu itsïni ménderuri kʼarhichaka’, ‘peru itsï engakini ji íntskuaka uáti úni eska ma kʼuiripu irekaka para méntkisï’.

Uarhiti arhisïndi: ‘Tata’, ‘¡íntskurini indeni itsïni! Parani nóteru méni kʼarhichani. Ka parani nóteru méni jurhani ixú itsï pʼitani’.

Uarhiti eratsisïndi eska Jesusi itsïmakueri ambesï uandani jaka. Peru Jesusi, Tata Diosïri jurhimbikueri ambesï uandani jati, ka Tata Diosïri juramukueri enga ísïka eska itsï enga tsípikua íntspejka. Ka enga újka íntspeni tsípikua para méntkisï.

Jesusi arhisïndi uarhitini: ‘Ni uandajpani chíti achaatini ka kʼuanhatsi ménderu’.

Uarhiti arhisïndi: ‘No kámasïnga achaatini’.

Jesusi arhisïndi: ‘Sésiri uandaska’. ‘Niáraskari iúmu achaatichani jatsiani ka ima engari jingoni irekani jaka iásï, no chíti achaatisti.’

Uarhiti ísku pakarasïndi jimboka iámindu ambe ísïska. ¿Néna mítispi Jesusi iámindu i ambe? Jo, jimboka Jesusi imaeska enga Tata Diosï aiatspipka ka imasï axati, ka Ima aiangusïndi iámindu i ambe. Iásï, Jesusiri jorhenguarhitichaksï kʼuanhatsintasïndi ka ískuksï pakarasïndi engaksï exejka eska Jesusi samaritana ma jingoni uandontskuarhixaka.

¿Ambechi jorhenguarhisïni íri ambe? Eska Jesusi iáminduechani sési kaasïnga. Juchajtuchi jatsiska para ísïni. Nochi jatsiska para uandani eska ma kʼuiripu no sési úriska, jimboka máteru nani anapueska o jimboka máteru idioma uandasïnga. Jesusi uékasïndi eskaksï iáminduecha mítiaka jurhimbikuani enga íntspejka tsípikua para méntkisï. Ka jucha jatsiska para tsitini kʼuiripuechani jarhuatani paraksï mítini jurhimbikuani.

Juanu 4:5-43; 17:3.



Kurhamarhikuecha

  • ¿Andisï Jesusi anhaxurhipi Samaria anapu posurhu, ka ambe arhisïni uarhitini enga nípka itsï pʼitani?
  • ¿Andisï ísku pakarajki uarhiti, ambe arhisïni Jesusi, ka andi?
  • ¿Ambe jásï itsï eratsisïni uarhiti eska Jesusi arhixaka, peru Jesusi ambe jásï itsï arhikuekasïni?
  • ¿Andisï ísku pakarajki uarhiti enga Jesusi arhijka imeri irekakueri ambe, ka Jesusi néna mítiski i ambe?
  • ¿Ambechi jorhenguarhisïni i uandantskuani jingoni?

Máteru kurhamarhikuecha

  • Arhinta Juanu 4:5-43.

    Exeparini Jesusiri ejempluni, ¿nénachi jatsiski para kámaani imechani engaksï máteru nani ísï anapueka o engaksï no májkueni jatsikuarheka eska jucha? (Juanu 4:9; 1 Kor. 9:22; 1 Tim. 2:3, 4; Titu 2:11.)

    Ima enga Jesusiri chúxapati úkuarhijka, ¿ambe kóntperatechani intsïnhaasïni? (Juanu 4:14; Isa. 58:11; 2 Kor. 4:16.)

    ¿Nénachi uá ísï úni eska samaritana enga sóntku jámapka eianhpini ambe enga jorhenguarhipka? (Juanu 4:7, 28; Mat. 6:33; Luk. 10:40-42.)