Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 98: Olibusïri juátarhu

Uandantskua 98: Olibusïri juátarhu

I ENGA Olibusïri juátarhu jaka, Jesusisti. Ka tʼámu achaaticha engaksï indeni jingoni jaka apostuliembechestiksï. Andresi ka Pedru ermanuestiksï ka Santiagu ka Juanu ístuksï ermanuesti. Kʼumanchikua enga jimini erakuarhejka jindesti Tata Diosïri templu jini Jerusaleni.

Tsimani jurhiatikua nitamastia, enga Jesusi inchaakupka Jerusaleni burru jatarini. Martesïstia. Ante de i jurhiatikua Jesusi templurhu jarhaspti. Jima, saserdotichaksï jámasti jupikani paraksï uándikuni. Peruksï chésti, jimboka kʼuiripu uékasïnga Jesusini.

Jesusi ka imeri apostulicha

Jesusi arhiasti religioniri orhejtsïkutichani: ‘¡Akuitsicha ka akuitsiri uájpecha!ʼ. Ka arhiasti eska Tata Diosï kastigariapiringa iámindu no sési jásï ambe jimbo engaksï úpka. Tátsekua Jesusi nirasti Olibusïri juátarhu, ka i tʼámu apostulicha úndastiksï kurhamarhini. ¿Mítiskiri ambeksï kurhamarhisïni?

Apostulichaksï kurhamarhixati ambe úkuarhia sánderu orhepatini. Mítistiksï eska Jesusi kʼamajkuaka iámindu kíchakueni jásï ambe enga úkuarhijka Echerirhu. Peruksï uékasïndi mítini kániísï úkuarhia. ¿Káni juua Jesusi ménderu para juramuni?

Jesusi mítisti eska, enga ménderu juuaka, imeri chúxapatichaksï no uáti exeni. Ka ísïuati jimboka Jesusi auandarhu jauaka ka imechaksï no uáti exeni jini. Ísï jimbo, Jesusi arhiasïndi ambe enga úkuarhini jauaka Echerirhu enga juramuni jauakia auandarhu. ¿Ambe úkuarhia?

Jesusi uandasïndi eskaksï kʼéri uarhiperakuecha jauaka, eskaksï uánikuecha pʼamenchaka, ka eska kʼarhingua jauaka, eskaksï uánikuecha uándikperaka ka eska kʼérati jenchekuecha jauaka. Ka eska jimbanhi eianhperakua Diosïri juramukueri eianhpinhaka iápurhu Parhakpinirhu. ¿Úkuarhixaki i ambe iásï? ¡Jo! Jesusi juramuxatiia auandarhu. No ióni jimbo kʼamajkuati iámindu no sési jásï ambeni enga úkuarhini jaka Echerirhu.

Mateu 21:46; 23:1-39; 24:1-14; Markusʌ 13:3-10.



Kurhamarhikuecha

  • Dibujurhu, ¿nákiski Jesusi ka néskiksï engaksï indeni jingoni jaka?
  • ¿Saserdoticha ambeksï uékaspi úni templurhu Jesusini jingoni, ka Jesusi ambe arhiaspi?
  • ¿Apostulicha ambeksï kurhamarhisïni Jesusini?
  • ¿Jesusi andisï arhiajki apostulichani ambe enga úkuarhini jauaka Echerirhu enga ima juramuni jauakia auandarhu?
  • ¿Ambe uandasïni Jesusi eska úkuarhiaka ante de ima kʼamajkuni iámindu no sési jásï ambe Echerirhu?

Máteru kurhamarhikuecha

  • Arhinta Mateo 23:1-39, NM.

    Nájkiruka Biblia uandajka eska sési jarhaska úrani máru uandakuechani para janhanharhiani máteruechani, ¿ambe xarhatasïni Jesusiri uandakuecha engaksï Mateu 23:8-11 jimbo jaka, eskachi no jatsiska para úrani uandakuechani para kʼéri ambe arhini nemani kúnguarhikuarhu? (Uku. 26:25; Rom. 13:7; 1 Ped. 2:13, 14.)

    ¿Ambeksï úspi fariseuecha para kʼuiripuecha no kristianu úkuarhini, ka nénaksï sáno májkueni jámasïni iásï religioniri orhejtsïkuticha? (Mat. 23:13; Luk. 11:52; Juanu 9:22; 12:42; 1 Tes. 2:16.)

  • Arhinta Mateu 24:1-14.

    ¿Néna xarhatasïni Mateu 24:13 eska uétarhisïnga tekantani?

    ¿Ambe arhikuekasïni uandakua ‘kʼamarhukuarhu jamberi’ enga Mateu 24:13 jimbo jaka? (Mat. 16:27; Rom. 14:10-12; 2 Kor. 5:10.)

  • Arhinta Markusʌ 13:3-10.

    ¿Náki uandakua enga Markusʌ 13:10 jimbo jaka xarhatasïni eska uétarhisïnga aianhpini ambakiti eianhperakuani, ka nénachi jatsiski para exeni Jesusiri uandakuechani? (Rom. 13:11, 12; 1 Kor. 7:29-31; 2 Tim. 4:2.)