Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 97: Jesusi jurhasïndi eska Juramuti ma

Uandantskua 97: Jesusi jurhasïndi eska Juramuti ma

SÁNISÏ tátsekua enga tsimani sieguechani éskatarantapka, Jesusi nirasïndi ireta ma jimbo enga no iauani japka Jerusaleni. Ka arhiasïndi tsimani imeri jorhenguarhitichani: ‘Ni je indeni iretarhu, ka exentakajtsï burru sapichuni ma. Kuerata je ka juáchijtsïni je’.

Engaksï juákujkia burruni, Jesusi jatasïndi ka nirasïndi Jerusaleni, Jerusaleni nóteru iauani jarhastia. Enga niárani jarhajkia, uánikua kʼuiripu kúmasïndi. Uánikuaksï tatsuntskakusïndi imecheri xukuparhakuechani. Ka máruksï, palmeri chkuri tatsuntskakusïndi ka uinhachasïndiksï: ‘¡Diosï újchakure juramutini enga jurhani jaka Jeobaeri arhinhakua jimbo!’.

Kʼuiripuechaksï sési erokasïndi Jesusini

Jini Israeli, sánderu ióntki, jimbanhi juramuticha inchaakusïrendiksï Jerusaleni burru jatarini para xarhakuni iretani. Ka Jesusijtu ísï úsïndi. I kʼuiripuechaksï xarhataxati eskaksï uékasïnga eska Jesusi juramukuauaka. Peruksï no iáminduecha jaiapanhintasïndi. I ambe xarharasïndi jiáni enga Jesusi nirajka templurhu.

Templurhu Jesusi ambakerantasïndi sieguechani ka mangusïchani. Engaksï sapicha exejka i ambe, úndasïndiksï kʼéri ambe arhini Jesusini. Peru i ambe ikiataasïndi saserdotichani ka arhisïndiksï Jesusini: ‘¿Kurhaxakiri ambeksï uandaxaki inde sapicha?’.

‘Jo’, uandasïndi Jesusi. ‘¿Nójtsï méni arhintaski Bibliarhu jima enga uandajka: ‘Tata Diosï uáti eska sapiicheri penchumikuarhu, kʼéri ambe arhinhaka?’.’ Ísï jimbo, sapichaksï seguirisïndi kʼéri ambe arhini juramutini enga Tata Diosï axaka.

Juchajtuchi uékasïnga ísïni eska ima sapicha, ¿no ísïski? Máru kʼuiripuechaksï uékapirindi eskachi nóteru uandantapiringa Tata Diosïri juramukueri ambe. Peru jucha seguiriuaka aianguani máteruechani ima ambakiti ambe enga Jesusi uáka kʼuiripuechani jimbo.

Enga Jesusi ixú japka Echerirhu, útasï no jindespti jurhiatikua para ima juramuni. Jiáni, ¿kánipirini? Jorhenguarhitichajtuksï uékasïrendi mítini. Ju iásï íri ambe arhintani.

Mateu 21:1-17; Juanu 12:12-16.



Kurhamarhikuecha

  • Enga Jesusi niárajka ireta ma jimbo enga no iauani japka Jerusaleni, ¿ambe arhiasïni imeri jorhenguarhitichani eskaksï uáka?
  • Eska na xarharajka dibujurhu, ¿ambe úkuarhisïni enga Jesusi niárani jarhajkia Jerusaleni?
  • ¿Ambeksï úsïni sapicha engaksï exejka eska Jesusi tsinaaxaka mangusïchani ka sieguechani?
  • ¿Jesusi ambe arhiasïni saserdotichani engaksï ikiani japka?
  • ¿Nénachi uá ísïni eska sapicha engaksï kʼéri ambe arhipka Jesusini?
  • ¿Ambeksï uékasïni mítini jorhenguarhiticha?

Máteru kurhamarhikuecha

  • Arhinta Mateu 21:1-17.

    ¿Andisï no májkueni na enga Jesusi inchaakupka Jerusaleni ka na engaksï inchaakuenga Roma, generalicha engaksï andaenga uarhiperakuechani? (Mat. 21:4, 5; Zac. 9:9; Fili. 2:5-8; Kol. 2:15.)

    ¿Ambeksï uá jorhenguarhini tumbicha ima sapi israelitecheri engaksï uandapka Salmo 118, jiáni enga Jesusi inchapka templurhu? (Mat. 21:9, 15; Sal. 118:25, 26; 2 Tim. 3:15; 2 Ped. 3:18.)

  • Arhinta Juanu 12:12-16.

    ¿Ambe arhikuekasïni palmeri chkuri engaksï úrapka kʼuiripuecha jiáni enga Jesusi inchaakupka Jerusaleni? (Juanu 12:13; Fili. 2:10; Jaŋ. 7:9, 10.)