Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 94: Uékaasïndi sapichani

Uandantskua 94: Uékaasïndi sapichani

EXE Jesusini, kamajchakuxati ini sapini. Úsïngari exeni eska Jesusi uékaasïnga sapichani. Achaaticha engaksï jimini jaka, apostulichestiksï. ¿Mítiskiri ambe arhiaxaki Jesusi?

Jesusi ka inderi apostulicha kʼamakustiksï janonguani iauani uératini. Xanharu jimbo, arhijperapunguaxaptiksï ambe ma. Ísï jimbo engaksï janonguajkia, Jesusi kurhamarhiasïndi: ‘¿Ambejtsï arhijperasïreni xanharu jimbo?’. Jesusi mítisti ambe engaksï arhijperani japka. Peru kurhamarhiasïndi para exeni abersiekaksï eianguaka.

Jesusi ka sapi ma

Apostulichaksï no mókukusïndi, jimbokaksï arhijperaxapka né sánderu kʼérispi. Máruksï uékasïndi sánderu kʼéri ambeni eska máteruecha. ¿Ambe arhiaua Jesusi para xarhatakuani eska no sési jarhaska inde ambe?

Uandajpasïndi tataka sapichuni ma, ka imecheri orhepatini pérasïndi. Jiájkani arhiasïndi imeri jorhenguarhitichani: ‘Uékasïnga eskajtsï sési mítiaka i ambe. Engajtsï no moantaska ka niárantsï ísïni eska sapicha, nójtsï méni uáka inchani Tata Diosïri juramukuarhu. Ima sánderu kʼéri ambesti Tata Diosïri juramukuarhu, enga ísïka eska i sapi’. ¿Mítiskiri andisï i ambe uandapi?

Jindesti, jimbokaksï sapiraticha no eratsisïnga kʼéri ambeni o eskaksï jukaparharanhaka. Jimboksïsï apostulicha jatsiti para ísïni eska sapiraticha, ka nóksï arhijperani jámani né sánderu kʼéri ambeski o né sánderu jukaparhakueski.

Máteru jurhiatikua, ístu Jesusi xarhatasïndi na enga xáni uékaajka sapichani. Máru kutsï tátsekua, máruksï juaasïndi imecheri sapichani paraksï exeni Jesusini. Peruksï apostulicha jámasïndi pʼínguani. Peru Jesusi arhiasïndi: ‘Jurajkua je sapichani eskajtsïni andarheraka, asï jáma je pʼínguani, jimboka Tata Diosïri juramukua jindeska para imecha engaksï ísïka eska sapicha’. Jimajkani kamajchakuasïndi sapichani ka újchakuraasïndi. ¡Kánikua sésisti mítini eska Jesusi uékasïnga sapichani! ¿No ísïski?

Mateu 18:1-4; 19:13-15; Markusʌ 9:33-37; 10:13-16.



Kurhamarhikuecha

  • ¿Andiksïsï arhijperapunguajki apostulicha engaksï iauani uératini junguani jarhajka?
  • ¿Jesusi andisï uandajpajki sapini ma ka andisï terojkani peerajki?
  • ¿Apostulicha nénaksï jatsiski para májkuenini eska sapicha?
  • Máru kutsï tátsekua, ¿néna xarhatasïni Jesusi eska uékaasïnga sapichani?

Máteru kurhamarhikuecha

  • Arhinta Mateu 18:1-4.

    ¿Jesusi andisï uandantskuechani úraueni para jorhentpini? (Mat. 13:34, 36; Mar. 4:33, 34.)

  • Arhinta Mateu 19:13-15.

    ¿Ambechi májkueni jatsiski para úni eska sapicha engachi uékaka Juramukueri kóntperatechani intsïnhaani? (Sal. 25:9; 138:6; 1 Kor. 14:20.)

  • Arhinta Markusʌ 9:33-37.

    ¿Jesusi ambe jorhendaaspi imeri jorhenguarhitichani engaksï uékaenga kʼéri ambeni? (Mar. 9:35; Mat. 20:25, 26; Gal. 6:3; Fili. 2:5-8.)

  • Arhinta Markusʌ 10:13-16.

    ¿Néna xarhataspi Jesusi eska né uéjki úsïrenga andarherani, ka ambeksï uá jorhenguarhini orhejtsïkuticha? (Mar. 6:30-34; Fili. 2:1-4; 1 Tim. 4:12.)