Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 92: Jesusi tsítantaasïndi uarhirichani

Uandantskua 92: Jesusi tsítantaasïndi uarhirichani

I UÁTSÏ engari ixú exejka, 12 uéxurhini jatiristi. Jesusi jupijkuxati ka jiminksï jarhasti tátembecha. ¿Mítiskiri andisïksï xáni tsípini jaki? Ju exeni.

Jesusi tsítantaxati Jairueri uátsïni

Uátsïri tátemba arhinhasïndi Jairu ka kʼéri ambesti. Ma jurhiatikua i uátsï pʼamenchasïndi, ka kamaruksï apojtsïtasïndi. Peru no ambakintasïndi, sánderu uinhamu jarhasïndi. Tátembecha kánikuaksï uandanhiasïndi jimboka ísï xarharasïnga enajki uarhiaia. Ka indentkuksï kánguarhisïndi. Ísï jimbo, Jairu nirasïndi Jesusini jirinhantani. Jimboka kurhanderaska milagruechani enga ima uájka.

Enga Jairu exentajka Jesusini, uánikua kʼuiripu jarhasïndi imani jingoni. Peru Jairu terojkani ísï nikuasïndi kʼuiripuechani ka tinguikuatsekusïndi Jesusini ka arhisïndi: ‘Juchiti uátsï uinhamu pʼamenchaxati’. Ka kómarhisïndi: ‘Ju jimboetakua, ka ambakeranta’. Jesusi arhisïndi eska niuaka.

Engaksï nirani jarhajkia, pʼákchaperasïndiksï kʼuiripuecha paraksï andarherani Jesusini. Peru Jesusi repentku anhaxurhisïndi. Ka uandasïndi: ‘¿Nérini pʼárhiski?’. Jesusi pʼikuarherasti eska nema pʼárhiska, jimboka uinhapikua uérekuarhiska. Peru, ¿né pʼárhiski? Uarhiti ma enga 12 uéxurhini pʼamenchapkia. ¡Jurhasti ka pʼárhisti Jesusiri xukuparhakuani ka ambakintasti!

I ambe sánderu sési pʼikuastasïndi Jairuni, jimboka exesïnga eska para Jesusi no úkua jukaska tsinani nemani. Peru jiájkani jurhasïndi uandakua pári ma. Ka arhisïndi Jairuni: ‘Ísterku exeia Jesusini, chíti uátsï uarhistia’. Jesusi kurhaasïndi i ambe ka arhisïndi Jairuni: ‘Asï uandanhia, chíti uátsï sési pʼikuarherati’.

Engaksï niárajkia Jairueri kʼumanchikuarhu, kʼuiripu kánikua kómu pʼikuarheraparini ueraxati. Peru Jesusi arhiasïndi: ‘Asï uera je. Uátsï no uarhisti. Kʼuíxati’. Peruksï iáminduecha teresmarhusïndi, jimbokaksï mítiska eska uátsï uarhirixaka.

Jiájkani Jesusi, uátsïri tátembecha ka tanimu apostulicha, inchasïndiksï jima enga uátsï jarhajka. Jesusi jupijkusïndi uátsïni ka arhisïndi: ‘¡Jauara!’. Ka uátsï tsíntasïndi eskari na exejka ixú. ¡Jauarasïndi ka uénasïndi xanharani! Jimbosï amamba ka tátemba xánksï tsípini jati.

Peru Jesusi no ini uátsïni uénasti tsítantani. Orheta tsítantasti tsïndiri uájpa ma enga ireta Naini jimbo irekapka. Ístu tátsekua, tsítantasïndi Lasaruni, Maria ka Marteri mímembani. Enga Jesusi juramuni jauakia Tata Diosïri juramukuarhu, uánikua kʼuiripuechani tsítantauati. ¿Nójtsïni sési pʼikuastasïni i ambe?

Lukasʌ 8:40-56; 7:11-17; Juanu 11:17-44.



Kurhamarhikuecha

  • ¿Néski uátsïri tátemba enga dibujurhu jaka ka andisï xáni uandanhiani jaki inde ka inderi témba?
  • ¿Ambe úsïni Jairu enga exentajka Jesusini?
  • ¿Ambe úkuarhisïni enga Jesusi nirani jarhajkia Jairueri kʼumanchikuarhu, ka ambe aiangunhasïni Jairu xanharu jimbo?
  • ¿Andiksïsï teresmarhujki Jesusini imecha engaksï Jairueri kʼumanchikuarhu jarhajka?
  • Enga Jesusi ka uátsïri tátembecha ka tanimu imeri apostulicha inchajkaksï jima enga uátsï jarhajka, ¿ambe úsïni Jesusi?
  • ¿Né máteruechani tsítantaaski Jesusi, ka ambe xarhatasïni i ambe?

Máteru kurhamarhikuecha

  • Arhinta Lukasʌ 8:40-56.

    ¿Andisï újki ma uandani eska Jesusi pʼamojkuspka uarhitini enga emorrajia pʼamenchaenga, ka ambeksï jorhenguarhisïni íri ambe kúnguarhikuarhu anapu orhejtsïkuticha? (Luk. 8:43, 44, 47, 48; Lev. 15:25-27; Mat. 9:12, 13; Col. 3:12-14, NM.)

  • Arhinta Lukasʌ 7:11-17.

    Imecha engaksï uarhinchaka nemani, ¿andiksïsï uá sési pʼikuarherani engaksï arhintaka ambe enga Jesusi úpka Naini anapu tsïndini jingoni? (Luk. 7:13; 2 Kor. 1:3, 4; Ebr. 4:15.)

  • Arhinta Juanu 11:17-44.

    ¿Néna xarhataski Jesusi eska no no sésiska uerani, enga ma uarhinchaaka nemani? (Juanu 11:33-36, 38; 2 Sam. 18:33; 19:1-4.)