Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 89: Jesusi ambantskantasïndi templuni

Uandantskua 89: Jesusi ambantskantasïndi templuni

JESUSI xarharasïndi eska kánikua ikiaxaka, ¿no ísïski? ¿Mítiskiri andi? Jimboka i achaaticha engaksï ixú Jerusaleni jaka Tata Diosïri templurhu, kánikuaksï tsitisïndi tuminani. Uáni tuminaksï euakuarhiasïndi imechani engaksï jurhajka ixú Tata Diosïni kómarhini.

Jesusi menanhaaxati mesechani enga tumina jaka

¿Exeasïniri beserruechani, karichichani ka palomasïchani? I achaaticha ixuksï templurhu ataraantaxati. ¿Mítiskiri andi? Jimbokaksï israelitecha animalichani uétarhinchaasïnga ka pájaruechani paraksï Tata Diosïni kéjtsïtakuani.

Tata Diosïri juramukua uandasïrendi eska, enga ma israelita no sési ambe úpiringa, jatsispka para Tata Diosïni kéjtsïtakua ma úkuni. Peruksï, ¿nani pʼiuapirini animalichani ka pájaruechani paraksï kéjtsïtaani?

Máruksï kánguarhiasïrendi animalichani ka pájaruechani engaksï úpiringa kéjtsïtaani. Peru uánikua israelitecha nóksï kánguarhiasïrendi. Ka máteruecha xáni iauani uératinksï jurhasïrendi engaksï no uáenga juákuarhiani. Jimboksïsï máru jurhaendi ka ixuksï piaasïrendi animalichani o pájaruechani. Peruksï íntspikuarhiricha, jukariksï jukaparharasïrendi. Euakuarhiaxaptiksï kʼuiripuechani. Ka ístu, nóksï jatsispti para ixú Tata Diosïri templurhu íntspikuarhiani.

Ka i ambesï ikiatajti Jesusini. Jimbosï menanhaajti mesechani enga tumina jarhajka, ka etsandurhisïndi tuminani. Ístu, sïndari ma jingoni latigu ma úsïndi, ka petaantasïndi animalichani templurhu uératini. Ka juramukuasïndi imechani engaksï íntspikuarhiajka palomasïchani: ‘¡Petaanta je ixú uératini! Asï jáma je úni juchiti Tátiri kʼumanchikuani nani engajtsï uáka uánikua tumina andani’.

Máru Jesusiri chúxapaticha, ixuksï jarhasti Jerusaleniri templurhu imani jingoni. Ískuksï pakarasïndi engaksï exejka ambe enga Jesusi újka. Jiájkanksï miántasïndi ambe enga Biblia uandajka Tata Diosïri Uájperi ambe: ‘Incharini ísï pʼikuarhinhiati eska chʼipiri jatanheni, xáni uékani Tata Diosïri kʼumanchikuani’.

Enga Jesusi ixú jarhajka Jerusaleni Paskua nitamani, uánikua milagruechani uásïndi. Tátsekua uéakuntasïndi Judea ka kʼuanhatsintasïndi Galilea. Peru distritu de Samaria ísï nitamasïndi. Ju exeni ambe úkuarhisïni jima.

Juanu 2:13-25; 4:3, 4.



Kurhamarhikuecha

  • ¿Andiksïsï templurhu ataraantajki animalichani?
  • ¿Andisï ikiajki Jesusi?
  • Eska na xarharajka dibujurhu, ¿ambe úsïni Jesusi, ka ambe arhiasïni palomasï atarantstichani?
  • ¿Ambeksï miántasïni Jesusiri chúxapaticha engaksï exejka ambe enga újka Jesusi?
  • ¿Náki distritu jimbo nitamasïni Jesusi enga kʼuanhatsintani jarhajka Galilea?

Máteru kurhamarhikua

  • Arhinta Juanu 2:13-25.

    Mítini na enga xáni ikiapka Jesusi imechani jingoni engaksï tuminani mójtakuenga templurhu, ¿nénachi exea enga nema uékaka atarantani ambe ma Kʼumanchikuarhu engaksï Jeobaeri Eianhpiricha tánguarhijka? (Juanu 2:15, 16; 1 Kor. 10:24, 31-33.)