Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 87: Tumbi Jesusi templurhu jarhasïndi

Uandantskua 87: Tumbi Jesusi templurhu jarhasïndi

EXE tumbini enga achati kʼératichani jingoni uandontskuarhini jaka. Indeksï jorhentpirichesti Jerusaleni, Tata Diosïri templurhu. Ka tumbi, Jesusisti. Kʼéstia. Dose uéxurhini jatiristia.

Jorhentpirichaksï ísku pakarasti engaksï exepka na enga xáni jorhenapka Jesusi Tata Diosïri ambe ka Bibliaeri ambe. Peru, ¿andiksïsï Jose ka Maria no jaki ixú? ¿Naniksï jarhaski? Ju exeni.

Tumbi Jesusi uandontskuarhikuaxati jorhentpirichani

Jose mándani uéxurhini jurhasïndi Jerusaleni, Paskuani nitamani imeri familiani jingoni. Jerusaleni iauani pakarasïndi Nasareti uératini. Jiánisï nóksï jarhaspti trokecha ni trenicha. Sáno iáminduechaksï xanharasïndi para máteru nani ísï nirani, ka imechaksï tanimu jurhiatikua ísï xanharasti paraksï Jerusaleni niárani.

Para i jurhiatikuecha, kʼéstia Joseri familia. Ísï jimbo, jatsisti para máteru uájpechani exeani engaksï sánderu sapiratika eska Jesusi. I uéxurhinksï, Jose ka Maria kʼuanhatsintaxatiksïa Nasareti imecheri uájpechani jingoni. Eratsisïndiksï eska Jesusi máteruechani jingoni jarhaska. Peru engaksï anhaxurhijka inchatirhu, nóksï úsïndi exentani. ¡Jirinhantasïndiksï parientechani jingoni ka amiguechani jingoni, peru no jarhasïndi imechani jingoni! Ísï jimbo, kʼuanhatsintasïndiksï Jerusaleni paraksï jirinhantani.

Ka ixuksï exentasïndi. Kurhajchaaxati jorhentpirichani, ka uánikua ambe kurhamarhiaxati. Iáminduechaksï ísku pakarasïndi, engaksï kurhajka na enga xáni jánhaskua jatsika. Peru Maria arhisïndi: ‘Iju, ¿andijtsïnisï ísï káma? Chíti táti ka ji kánikuachi uandanhiaxapka, ka jirinhantaxapkaksïni’.

Jesusi arhiasïndi: ‘¿Andijtsïnisï jirinhantani japi?’. ‘¿Andi nójtsï mítispi eskani jatsispka para juchiti tátiri kʼumanchikuarhu jarhani?’

Ísïsti, Jesusi kánikua tsitisïndi jarhani nani enga uáka Tata Diosïri ambe jorhenguarhini. Juchajtu jatsiska para ísïni, ¿no ísïski? Jini Nasareti, Jesusi mándani semana nirasïrendi tánguarhikuecharhu para kómarhini Tata Diosïni. Ka jimboka méntkisï kurhaani jarhasïrenga ambe enga uandanhaenga jima, úspti uánikua ambe jorhenguarhini Bibliaeri ambe. Ju májkueni úni eska Jesusi.

Lukasʌ 2:41-52; Mateu 13:53-56.



Kurhamarhikuecha

  • ¿Na xáni jatiriski Jesusi ixú dibujurhu, ka nani jarhaski?
  • ¿Ambe úsïni Jose mándani uéxurhini imeri familiani jingoni?
  • Engaksï Jose ka Maria xanharapkia ma jurhiatikua, ¿andisïksï kʼuanhatsintajki Jerusaleni?
  • Jose ka Maria, ¿naniksï exentasïni Jesusini, ka andisï kʼuiripu ísku pakarajki?
  • ¿Jesusi ambe arhisïni imeri amambani?
  • ¿Nénachi uá Jesusiri ejempluni pʼitani engachi jorhenguarhini jauaka Tata Diosïri ambe?

Máteru kurhamarhikuecha

  • Arhinta Lukasʌ 2:41-52.

    Nájkiruka juramukua uandaenga eska tatakechajkuksï nípiringa mándani uéxurhini kʼuínchikuecharhu, Jose ka Maria, ¿ambe ambakiti ejemplu íntsasïni iásï anapu tátichani? (Luk. 2:41; Deu. 16:16; 31:12; Pro. 22:6.)

    ¿Jesusi ambe ambakiti ejemplu íntskuasïni iásï anapu tumbichani na engaksï jatsika para kurhajchani imecheri tátichani? (Luk. 2:51; Deu. 5:16; Pro. 23:22; Kol. 3:20.)

  • Arhinta Mateu 13:53-56.

    ¿Na uandasïni Biblia eskaksï arhinhasïrenga tʼámu Jesusiri ermanuembecha, ka tsimani, nénaksï úranhaspi kúnguarhikuarhu? (Mat. 13:55; Uku. 12:17; 15:6, 13; 21:18; Gal. 1:19; Sant. 1:1; Jud. 1.)