Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 85: Jesusi establurhu andajpenusïndi

Uandantskua 85: Jesusi establurhu andajpenusïndi

¿MÍTISKIRI néski i charhaku? Jo, Jesusisti. Kʼamakusti andajpenuni ini establuni jimbo. Ma establu, jindesti nani engaksï animalicha patsanhajka. Maria pesebrirhu apontskaxati Jesusini, jima enga burruecha ka máteru animalicha tʼirejka. Peru, ¿Maria ka Jose andiksïsï ixú jaki animalichani jingoni? Ixú no jindesti paraka charhaku ma andajpenuaka, ¿no ísïski?

No, no jindesti. Peruksï ixú jarhasti, i ambe jimbo: Sésari Augustu, juramuti Roma anapu, juramusti eskaksï iáminduecha kʼuanhatsentapiringa jima engaksï andajpenupka ka eskaksï karakuarhipiringa libru ma jimbo. Jose, Beleni andajpenusti. Peru engaksï janopkia Beleni, nóksï exesti nani pakarani. Jimbosïksï jupti ixú enga animalicha jaka. ¡Ka i jurhiatikua ambakintasti Maria Jesusini jingoni! Ka eskari na exejka, charhaku sési jarhasti.

Jose, Maria, ka charhaku Jesusi

¿Exexakiri karichi erangutichani engaksï jurhani jaka Jesusini exeni? Imaksï jimesïsï jámaxapti chúrikua karichi eranguani ka lusi ma tʼíntskasti jima. ¡Ánjili máespti! Íksï kánikua chéspti. Peru ánjili arhiaspti: ‘¡Asï ché je! Ambakiti ambeksïni jurhaska aianguni. Iásï, Beleni andajpenusti Tata Kristu. ¡Ka i, ireteri pʼímutantspitiuati! Takusï irhikuaritini jauati ka pesebrirhu aponditini jauatiʼ. Jiájkani uánikua ánjilichaksï jurhasti, ka uénastiksï kʼéri ambe arhini Tata Diosïni. Karichi eranguticha sóntkuksï nirasïndi jirinhantani Jesusini ka exentasïndiksï.

¿Mítiskiri andisï xáni jukaparhakue Jesusi? ¿Mítiskiri néski sési jimbo? Miánta, ini libruni jimbo, orheta uandantskuarhu, uandaspkachi orheta Tata Diosïri Uájperi ambe. Ima enga ánchikuarhipka Tata Diosïni jingoni para úni auandani, Echerini ka iámindu máteru ambe. Jo, ¡Jesusispti!

Jeoba auandarhu uératini juáspti Jesusiri tsípikuani, ka Mariaeri matrisirhu pérasti. Ka ísï uénaspti úkuarhini charhaku ma Mariaeri matrisirhu, ísï eskaksï na úkuarhejka charhakuecha amamberi matrisirhu. Peru i sapi Tata Diosïri Uájpesti. Ka Jesusi ixú andajpenusti Beleni establu ma jimbo. ¿Mítiskiria iásï kʼóru andiksïsï ánjilicha xáni tsípikua jingoni aianguapi kʼuiripuechani eska Jesusi andajpenuspkia?

Lukasʌ 2:1-20.



Kurhamarhikuecha

  • ¿Néski charhaku enga dibujurhu jaka, ka Maria nani apontskaxaki?
  • ¿Andisï Jesusi establurhu andajpenupi?
  • ¿Néskiksï achaaticha engaksï establurhu inchani jaka, ka ambe arhiaspi ánjili ma?
  • ¿Andisï xáni jukaparhakue Jesusi?
  • ¿Andiksïsï uá arhini Jesusini eska Tata Diosïri Uájpeska?

Máteru kurhamarhikuecha

  • Arhinta Lukasʌ 2:1-20.

    ¿Tata Diosï néna úraspi Sésari Augustuni paraka Jesusi andajpenupiringa jima enga uandanhapkia? (Luk. 2:1-4; Miq. 5:2.)

    ¿Néna uá ma miiukuarhini imechani jingoni enga Jeoba “jaiapanhiantajka”? (Luc. 2:14, NM; Mat. 16:24, NM; Juanu 17:3; Uku. 3:19; Ebr. 11:6.)

    Judea anapu karichi eranguticha kánikuaksï tsípispti enga andajpenupka Pʼímutantspiti Jesusi, ¿andiksïsï iásï jatsi para sánderu tsípini imecha engaksï Tata Diosïni marhuakujka? (Luk. 2:10, 11; Efe. 3:8, 9; Jaŋ. 11:15; 14:6.)