Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 101: Uándikusïndiksï Jesusini

Uandantskua 101: Uándikusïndiksï Jesusini

¡EXE no sési jásï ambeni enga úkuarhini jaka! Uándikuxatiksï Jesusini. Tirhipakata jarhasti chkari ma jimbo. Chajkustiksï ka chandukustiksï. ¿Andisï nema uékapirini ini ambe úni?

Uándikuxatiksï Jesusini

Jindesti, jimbokaksï máru ikiakusïnga. ¿Mítiskiri neeskiksï? Ma jindesti ánjili malu Satanasi No Ambakiti. Indesï úpti eska Adani ka Eba nóksï kurhajchapiringa Jeobani. Ka Satanasisti enga úka eska Jesusiri ikiatspiticha i xáni no sési jásï ambe úpiringa.

Ante de cháparhatani chkarirhu, kánikuaksï no sési kámasti. ¿Miásïniri eskaksï jurhaska jardini Jetsemanirhu ka eskaksï jima jupikaska? ¿Néspiksï i ikiatspiticha? Jindesptiksï religioniri anapu orhejtsïkuticha. Ju exeni ambe úkuarhisïni tátsekua.

Engaksï ícha pájkia Jesusini, imeri apostulichaksï sïpakuarhisïndi. Chésïndiksï, ka jandiajkuksï jurajkusïndi imeri ikiatspitichani jingoni. Peru apostulicha Pedru ka Juanu nóksï iauani nirasïndi. Chúxapasïndiksï paraksï exeni ambe úkuarhia Jesusini jingoni.

Saserdotichaksï pásïndi Jesusini tʼarhepiti Anasini jingoni, enga ístu ióntki kʼéri saserdotipka. Peru kʼuiripuechaksï no ióni pakarasïndi ixú. Ka tátsekuaksï pásïndi Kaifasirhu kʼumanchikuarhu, enga iásï kʼéri saserdotika. Jimaksï jarhasti uánikua religioniri orhejtsïkuticha.

Ixuksï uánikua ambe kurhamarhisïndi. Juásïndiksï achaatichani máru paraksï chikuanderakua uandani Jesusiri ambe. Iámindu religioniri orhejtsïkutichaksï uandasïndi: ‘Ju je uándikuni Jesusiniʼ. Jiájkani tʼuánharhikusïndiksï ka atasïndiksï.

Pedru terunukua jarhasïndi enga i ambe úkuarhini jarhajka. Chúristia ka tsʼirakuarhisïndi, ka kʼuiripu kurhikasïndi. Engaksï jorhentani jarhajkia, uátsï ma enga jima marhuajka eratisïndi Pedruni ka uandasïndi: ‘I achati ístu Jesusini jingoni jarhasptiʼ.

Pedru uandasïndi: ‘¡Nómbe, ji no jámasïrenga imani jingoni!ʼ.

Kʼuiripu tanimu ueltaksï arhisïndi Pedruni eska imajtu jámaxapka Jesusini jingoni. Peru Pedru méntkisï uandasïndi eska no ísïska. Tanimu úni jámani enga Pedru ísï uandajka Jesusi pʼirhikuarhesïndi ka eratisïndi. Pedru kánikua kómu pʼikuarherasïndi jimboka chikuanderaska, uéntasïndi jima ka úndasïndi uerani.

Enga Jurhiata uérani jarhajkia biernesï jurhiatikua, saserdotichaksï pásïndi Jesusini jima engaksï Sanedriniri anapuecha tánguarhijka. Ka jimaksï uandasïndi ambeksï uá Jesusini jingoni. Pásïndiksï Ponsiu Pilatu jingoni enga juramutika distritu de Galilea.

Arhisïndiksï Pilatuni: ‘I achaati no sési úri máestiʼ. ‘Ju je uándikuni.ʼ Pilatu uánikua ambe kurhamarhisïndi Jesusini ka tátsekua uandasïndi: ‘Ji no ma no sési jásï ambe exekuntaska ini achatiniʼ. Jiájkani Pilatu úsïndi eskaksï paaka Jesusini Erodesi Antipasini jingoni, enga Galilea juramujka, ka enga iásï Jerusaleni jaka. Íjtu no exekuntasïndi Jesusini no sési jásï ambe ka axantasïndi Pilatuni jingoni.

Pilatu uékasïndi jurajkuni Jesusini. Peru Jesusiri ikiatspiticha uékasïndi eskaksï Barrabasini jurajkuajka enga kuárhukpitika. Sáno teruxutinistia enga Pilatu ekuarhu petajka Jesusini. Pilatu arhisïndi kʼuiripuni: ‘¡Exe je! ¡Chári juramutini!ʼ. Peru imecha engaksï religionini orhejtsïkujka uinhachasïndiksï: ‘¡Kéndita! ¡Uándiku!ʼ. Ísï jimbo, Barrabasinksï jurajkusïndi ka Jesusinksï pásïndi paraksï uándikuni.

Biernesï inchatirhu chkari ma jimboksï tirhipasïndi. Dibujurhu no xarharasïndi, peru ístu mándani laduksï tirhipasïndi no sési úrini ma para jima uarhini. Peru ante de Jesusi uarhini, ma no sési úri enga tirhipakuarhetini jaka arhisïndi Jesusini: ‘Miárini engari jauaka chíti juramukuarhuʼ. Ka Jesusi arhisïndi: ‘Aiachesïngakini eskari jíndini jingoni jauaka Sési Jándekuarhuʼ.

¡Xáni ambakiti ambe enga aiakuka! ¿No ísïski? ¿Mítiskiri náki sési jándikueri ambesï uandani japi Jesusi? ¿Nani jarhaspi sési jándekua enga Tata Diosï orheta úpka? Jo, Echerirhu. Ka enga Jesusi juramuakia auandarhu, tsítantati ini achaatini para tsípikua jingoni irekani Sési Jándekuarhu ixú Echerirhu. ¿A no eska kánikua sésiska i ambe?

Mateu 26:57-75; 27:1-50; Lukasʌ 22:54-71; 23:1-49; Juanu 18:12-40; 19:1-30.



Kurhamarhikuecha

  • ¿Né úspi eskaksï uándikupiringa Jesusini?
  • ¿Ambeksï úsïni apostulicha engaksï religioniri orhejtsïkuticha pájka Jesusini?
  • ¿Ambe úkuarhisïni kʼéri saserdoti Kaifasiri kʼumanchikuarhu?
  • ¿Andisï uéakuntapi Pedru ka andisï uerajki?
  • Engaksï pájka Jesusini ménderu Pilatuni jingoni, ¿ambeksï uinhachasïni kʼéri saserdoticha?
  • ¿Ambe úkuarhinchasïni Jesusi biernesï inchatirhu, ka ambe aiakusïni no sési úrini ma enga jima ma ladu japka tirhipakuarhetini?
  • ¿Nani jaua sési jándikua enga Jesusi uandapka?

Máteru kurhamarhikuecha

  • Arhinta Mateu 26:57-75.

    ¿Nénaksï xarhataspi sanedrinirhu anapuecha eskaksï no ambakiti kʼuiripuespka? (Mat. 26:59, 67, 68.)

  • Arhinta Mateo 27:1-50, NM.

    ¿Andichisï újki uandani eska na enga Judasï pʼamondakuarhipka no sési jimboespka? (Mat. 27:3, 4; Mar. 3:29; 14:21; 2 Kor. 7:10, 11.)

  • Arhinta Lukasʌ 22:54-71.

    ¿Ambechi jorhenguarhisïni enga Pedru uandapka eska no mítispka Jesusini, ima chúrikua engaksï jupikapka? (Luk. 22:60-62; Mat. 26:31-35; 1 Kor. 10:12.)

  • Arhinta Lukasʌ 23:1-49.

    ¿Ambe úspi Jesusi enga xáni no sési kánhani japka, ka ambechi jorhenguarhisïni inderi ambe? (Luk. 23:33, 34; Rom. 12:17-19; 1 Ped. 2:23.)

  • Arhinta Juanu 18:12-40.

    ¿Ambejtsïni jorhendasïni enga Pedru chérhiapka kʼuiripuechani ka enga no sési uandapka Jesusiri ambe peru enga tátsekua uinhapikuarhintapka ka niárani ambakiti apostuli máeni? (Juanu 18:25-27; 1 Kor. 4:2; 1 Ped. 3:14, 15; 5:8, 9.)

  • Arhinta Juanu 19:1-30.

    ¿Néna exesïreni Jesusi jatsikuarhekuechani? (Juanu 2:1, 2, 9, 10; 19:23, 24; Mat. 6:31, 32; 8:20.)

    Ambe enga uandapka Jesusi ante de uarhini, ¿néna xarhataspi eska méntkisï kuájpintaska Jeobaeri kʼérikuani ka eska imajku jindeska juramuti iámindu amberi? (Juanu 16:33; 19:30; 2 Ped. 3:14; 1 Juanu 5:4.)