Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 83: Jerusaleni anapu bardecha

Uandantskua 83: Jerusaleni anapu bardecha
Ánchikuarhirichaksï tarhataantaxati Jerusaleni anapu bardechani

¡EXE na enga xáni uinhamu ánchikuarhinhani jaka ixú! Israelitechaksï Jerusaleni anapu bardechani jauatantaxati. Nitamastia 152 uéxurhini enga Nabukodonosori kʼamajkupka Jerusalenini, enga kuaskuapka bardechani ka kurhirantaapka iretarhu anapu puertechani. Engaksï israelitecha kʼuanhatsentapka Jerusaleni, nóksï tarhatantaspti bardechani.

Iámindu i uéxurhinichani engaksï no japka bardecha, ¿nénari exesïni eskaksï pʼikuarheraenga? Nóksï sési pʼikuarherasïrendi. Imecheri ikiatspiticha sóntkuksï úpirindi inchaakuni jima. Peruchi ixú exesïnga Neemiasini, i jarhuajpexati paraka Jerusaleniri bardecha tarhatanhantaka. ¿Mítiskiri néski Neemiasi?

Neemiasi israelitaesti ka ireta Susa uératini jurhasti, jini engaksï Mardokeu ka Esteri irekaka. Ka juramutiri kʼumanchikuarhu ánchikuarhisïrendi, ísï jimbo, jamberi sési pájperaendi Mardokeu ka Esterini jingoni. Peru Biblia no uandasïndi eska Neemiasi juramuti Asueruni jingoni ánchikuarhisïrenga enga Esteriri uámbaepka. Artajerjesini jingoni ánchikuarhisti enga tátsekua niárapka juramuni.

Miánta, Artajerjesi ambakiti juramuti máesti enga íntskupka Esdrasini uánikua tumina paraka nípiringa Jerusaleni sési jántskantani Jeobaeri templuni. Peru Esdrasi no tarhatantaspti bardechani engaksï kuarhatsekata japka. Ju exeni andisï Neemiasi úpi i ambe.

Trese uéxurhini nitamastia enga Artajerjesi tumina íntskupka Esdrasini para sési jántskantani templuni. Iásï Neemiasi koperuesti, i kʼéri ánchikuarhita máesti. Jimboka jatsirakusïnga juramutini binuni ka exesïndi eska no uarhikua jatamiaka.

Ma jurhiatikua Anani, Neemiasiri ermanuemba ka máteru israelitecha, jurhasïndiksï pʼorhembini Neemiasini. Ka arhisïndiksï na engaksï no sési nitamakuarhini jaka ka eskaksï kuarhatsetixaka Jerusaleni anapu bardecha. Neemiasi kánikua kómu pʼikuarherasïndi ka kómarhisïndi Jeobani íri ambe.

Ma jurhiatikua, juramuti exesïndi eska Neemiasi kómu jarhaska. Ka kurhamarhisïndi: ‘¿Andirisï kómu jaki?ʼ. Neemiasi arhisïndi eska jindeska jimboka Jerusaleni no sési jarhaska ka jimbokaksï bardecha kuarhatsekata jarhaska. Juramuti arhisïndi: ‘¿Amberi uékasïni?ʼ.

Neemiasi uandaxati na enga jatsika para ánchikuarhinhani

Neemiasi arhisïndi: ‘Jurajkurini nirani Jerusaleniʼ, ‘parani ji úni tarhatantani bardechaniʼ. Artajerjesi sési kámpisïndi. Ka arhisïndi eska uáka nirani, ka jarhuatasïndi jirinhani chkarini enga jini úrakuarhiaka. Enga Neemiasi niárajkia Jerusaleni, arhisïndi iretani ambe enga eratsini jaka úni. Kʼuiripu sési exesïndi ka uandasïndiksï: ‘Ju je uénani tarhatantani bardechaniʼ.

Engaksï israelitecheri ikiatspiticha exejka eskaksï tarhatantaxakaia bardechani, uandasïndiksï: ‘Niuakachi ka uándikuauakachi ka ísïchi pʼínguaka ánchikuarhitaniʼ. Enga Neemiasi mítijka i ambe, íntsaasïndi ánchikuarhirichani espadechani ka lansechani ka arhiasïndi: ‘Asï chérea je. Uarhipe je chári ermanuechani jimbo, chári uájpechani jimbo, chári uarhitichani jimbo ka chári kʼumanchikuechani jimboʼ.

Ireta no chésïndi. Ka chúrikua ka jurhiatikuaksï kánguarhisïndi armechani ka seguirisïndiksï ánchikuarhini. Ísï jimbo, 52 jurhiatikua jimbojkuksï tarhatantaasïndi bardechani. Iásï kʼóru ireta nóteru chésïndia. Neemiasi ka Esdrasi jorhentpesïndiksï Tata Diosïri juramukuani, ka ireta tsípisïndi.

Peru útasï no ísïsti eska naepka ante de israelitecha Babilonia pánhani. Juramuti Persia anapu juramusïndi ka ireta jatsisti para marhuakuni. Peru Jeoba eiatspestia eska axaka jimbanhi juramutini ma ka i sési pʼikuastati iretani. ¿Néski i? ¿Néna juá pínandikua Echerirhu? Nitamasïndi 450 uéxurhini ísï para úni mítikuarhini sánderu íri ambe. Jiájkani ambakiti ma sapi andajpenusïndi. Peru ambe enga úkuarhijka, máteru uandantskuestia.

Nehemías, kapituluecha 1 a 6 jamberi.



Kurhamarhikuecha

  • ¿Nénaksï pʼikuarherasïreni israelitecha engaksï no japka bardecha Jerusaleni?
  • ¿Néski Neemiasi?
  • ¿Nákiski Neemiasiri ánchikuarhita ka andisï jukaparhakue?
  • ¿Andisï kómu jarhajki Neemiasi ka ambe úsïni?
  • Juramuti Artajerjesi, ¿ambe jurajkuspi eska úpiringa Neemiasi?
  • ¿Ambe úsïni Neemiasi parakaksï israelitecheri ikiatspiticha no anhaxustaka ánchikuarhitani?

Máteru kurhamarhikuecha

  • Arhinta Nehemías 1:4-6 ka 2:1-20.

    ¿Neemiasi néna jirinhaski Jeobaeri jarhuajperatani? (Neh. 2:4, 5; Rom. 12:12; 1 Ped. 4:7.)

  • Arhinta Nehemías 3:3-5.

    Orhejtsïkuticha ka imeri jarhuajpiricha, ¿ambeksï uá jorhenguarhini na engaksï jindepka tekoitecha ka ima engaksï “kʼéri ambepka”? (Neh. 3:5, 27; 2 Tes. 3:7-10; 1 Ped. 5:5.)

  • Arhinta Nehemías 4:1-23.

    ¿Ambe uinhaperantaspi israelitechani paraksï no jurajkuni ánchikuarhitani, nájkirukaksï no sési kánhani japka? (Neh. 4:6, 8, 9; Sal. 50:15; Isa. 65:13, 14.)

    ¿Nénajtsïni uinhaperantasïni israelitecheri ejemplu?

  • Arhinta Nehemías 6:15.

    Jerusaleni anapu bardecha nóksï jamberi tsimani kutsï jimbo tarhatanhantaspti, ¿néna xarhatasïni i ambe na enga xáni uinhapijka jakajkukua? (Sal. 56:3, 4; Mat. 17:20; 19:26.)