Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 82: Mardokeu ka Esteri

Uandantskua 82: Mardokeu ka Esteri

JU EXENI ambe úkuarhispi máru uéxurhini ante de Esdrasi nirani Jerusaleni. Mardokeu ka Esteri, iásï íksï jindesti tsimani israelitecha engaksï sánderu kʼéri ambeka iámindu Persia. Esteri juramutiri témbaesti ka inderi primu Mardokeu, sáno májkueni kʼéri ambesti eska juramuti. Ju exeni néna úkuarhiski i ambe.

Esteri uarhinchaasti imeri tátichani enga sapi máepka ka jimbosï Mardokeu kʼuiriperapti. Asueru, juramuti Persia anapu kʼéri kʼumanchikua ma jatsisti ireta Susa ka Mardokeu imeri marhuatspiristi. Peru ma jurhiatikua juramuti erakukuarhesïndi máteru témbani, jimboka imeri témba Basti no kurhajchasïnga. ¿Mítiskiri néni erakusïni? Jo, Esterini, sési jásï uátsïni ma.

Amani ikiakusïndi Mardokeuni

¿Exesïniri achatini enga kʼéri ambe exekuarhijka ka enga kʼuiripu kʼutitsekuni jaka? Amanisti ka kʼéri ambesti Persia. I uékasïndi eska Mardokeu enga jimini uaxakatini jaka ístu kʼutitsekuaka. Peru Mardokeu no úsïndi i ambe. Mardokeu exesïndi eska no sési jarhaska kʼutitsekuni achatini ma enga xáni no ambakika. Amani ikiasïndi. Ka i ambe úsïndi.

Amani chikuanderakua ambe uandasïndi israelitecheri. Arhisïndi juramutini: ‘Imaksï no ambakisti ka nóksï kurhajchasïndi chíti juramukuechaniʼ. ‘Jatsistiksï para uándikunhani.ʼ Asueru no mítisti eska témba israeliteska. Ísï jimbo, kurhajchasïndi Amanini ka úsïndi juramukua ma enga uandajka eska ma jurhiatikua israelitechaksï jatsiska para uándikunhani.

Mardokeu no sési pʼikuarherasïndi enga mítijka i juramukueri ambe. Ka ísï uandakua axakusïndi Esterini: ‘Uandontskuarhiku juramutini ka arhi eskajtsïni kuájchakuakaʼ. Peru Persia anapu juramukua uandasïndi eska no uáka ma nirani exeni juramutini enga no pʼítarkuarhinhaka. Peru Esteri nirasïndi exeni juramutini nájkiruka no pʼitarkuarhinhajka. Juramuti tarhatasïndi imeri pirimu oruerini, i ambe arhikuekasïndi eskaksï no jatsiska para uándikuni Esterini. Esteri pʼímarhisïndi juramutini ka Amanini paraksï márku tʼireni. Jimini, juramuti kurhamarhisïndi Esterini ambe uékasïni eska íntskuaka. Esteri arhisïndi eska pauandikua arhiaka, engaksï jiókuarhiska ménderu márku tʼireni.

Pauandikua, tʼirekuarhu, Esteri arhisïndi juramutini: ‘Uándikuatijtsïni jíndini ka juchiti iretaniʼ. Juramuti ikiasïndi ka uandasïndi: ‘¿Né uékasïni inde ambe úni?ʼ.

Esteri arhisïndi: ‘¡Juchari ikiatspiti, jindesti, inde no ambakiti Amani!ʼ.

Juramuti Esteri uandaxati eska Amani no sési ambe úska

Juramuti sánderu ikiasïndi. Ka uándikutarkuarhesïndi Amanini. Tátsekua, juramuti úsïndi eska Mardokeu sáno májkueni juramukua jatsiaka eska ima. Ka Mardokeu jimbanhi juramukua ma úsïndi enga uandajka eskaksï israelitecha uáka kuájpikuarhini ima jurhiatikua engaksï uékaka uándikuani. Ka jimboka iásï Mardokeu kʼéri ambeskia, uánikuaksï jarhuaatasïndi israelitechani ka nóksï uándikunhasïndi.

Esteriri libru.



Kurhamarhikuecha

  • ¿Néskiksï Mardokeu ka Esteri?
  • ¿Juramuti Asueru andisï uékajki máteru uarhitini, ka néni erakusïni?
  • ¿Néski Amani ka andisï ikiajki?
  • ¿Náki juramukua uaxastanhasïni, ka Esteri ambe úsïni enga Mardokeu uandakua ma axakujka?
  • ¿Ambeksï úkuarhinchasïni Amani ka Mardokeu?
  • ¿Nénaksï kuájpinhasïni israelitecha?

Máteru kurhamarhikuecha

  • Arhinta Ester 2:12-18.

    ¿Esteri néna xarhataspi eska kánikua jukaparhakueska “kaxumbitini” ? (Est. 2:15; 1 Ped. 3:1-5.)

  • Arhinta Ester 4:1-17.

    Ísï eska Esteri na sésikua intsïnhapka para xarhatani eska marhuakusïrenga Tata Diosïni, ¿ambechi sésikua jatsiski iásï para xarhatani eskachi uékasïnga Jeobani ka eskachi no méni jurajkuaka? (Est. 4:13, 14; Mat. 5:14-16; 24:14.)

  • Arhinta Ester 7:1-6.

    Engaksï Tata Diosïni marhuakujka, ¿andiksïsï májkueni no sési kánhajki eska Esteri? (Est. 7:4; Mat. 10:16-22; 1 Ped. 2:12.)