Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 81: Mintsikaparini Jeobaeri jarhuajperatani

Uandantskua 81: Mintsikaparini Jeobaeri jarhuajperatani

MILI jimbo kʼuiripuecha uéntasïndiksï Babilonia paraksï Jerusaleni kʼuanhatsintani. Peru engaksï niárajkia, no ma ambe jarhasïndi Jerusaleni. No nema irekasïndi. Israelitechaksï jatsisti para iámindu ambe ménderu úntani.

Altarinksï uénasïndi úni. Ixuksï kéjtsïtasïndi animalichani o intsïmperakuechani para Jeoba. Máru kutsï tátsekua, israelitechaksï uénasïndi templuni úntani. Peru paisicha engaksï jima no iauani jaka, ikiakuasïndiksï ka jámasïndiksï chéraani paraksï nóteru ánchikuarhinia. Ka úsïndiksï eska jimbanhi juramuti Persia anapu, juramukua ma uáka paraksï anhaxustani ánchikuarhitani.

Nitamasïndiksï uéxurhinicha. Diesisiete uéxurhinistia desdeka israelitecha Babilonia uéntaka. Tata Diosï axasïndi profeta Ageuni ka Sakariasini, para arhini kʼuiripuni eskaksï ménderu úntaka Jerusalenini. Kʼuiripuechaksï mintsikasïndi eska Tata Diosï jarhuatauaka ka ísïksï úsïndi. Ménderuksï uéntasïndi ánchikuarhini, nájkiruka jaka juramukua ma enga arhiajka eska nómbe.

Peru jurhasïndi Tatenai, ima enga Persia anapu sondaduechani juramukuajka ka kurhamarhiasïndi né sésikua íntskuaski paraksï templuni úntani. Israelitechaksï uandasïndi eska Siru juramuti Babilonia anapu arhiaska: ‘Ni je Jerusaleni ka únta je chári Tata Diosï Jeobaeri templuniʼ.

Tatenai axasïndi karakata ma Babilonia para kurhanguarhini ísï uandaspi Siru, para i jurhiatikuecha Siru uarhisptia. Dariu, jimbanhi juramuti Persia anapu no ióndasïndi axani karakata ma. Ka uandasïndi eska ísïska. Ka ístu uandasïndi: ‘Jurajkua je eskaksï israelitecha úntaka ménderu imecheri Tata Diosïri templuni. Ka juramuchesïngaksïni eskajtsï jarhuatauakaʼ. Israelitechaksï tʼámu uéxurhini ísï jimbo kʼamarasïndi templuni ka kánikuaksï tsípisïndi.

Uánikua uéxurhini nitamasïndi. Iásï sáno 48 uéxurhini ísïstia enga templu kʼamaranhaka. Kʼuiripu Jerusaleni anapu nóksï jatsikuarheristi, ka ireta ka Tata Diosïri templu nóteruksï xáni sési jáxestia. Jini Babilonia, israelita ma enga arhinhaenga Esdrasi mítisïndi eska uétarhisïnga sési jántskantani Tata Diosïri templuni. Ísï jimbo, ¿mítiskiri ambe úsïni?

Esdrasi nirasïndi exeni Artajerjesini, juramuti Persia anapuni, ka i ambakiti juramuti uánikua ambe intsïkuarhisïndi Esdrasini paraka paaka Jerusaleni. Esdrasi jarhuajperata kurhakuasïndi imani israelitechani engaksï Babilonia irekaka, ka 6,000 ísïksï uandasïndi eskaksï imajtu niuaka. Ka pásïndiksï oru, plata ka uánikua máteru ambakiti ambe.

Peru Esdrasi kánikua uandanhiasïndi jimboka xanharu jimbo uánikua kʼuiripu no sési úrichaksï jámasïnga. Íksï úpirindi uándikuani ka euakuarhiani platani ka oruni. Ísï jimbo, Esdrasi tánasïndi kʼuiripuechani, ísï eskari na exejka dibujurhu. Ka kómarhisïndiksï Jeobani eska kuájchakuauaka engaksï kʼuanhatsintani jauakia Jerusaleni.

Esdrasi ka kʼuiripu kómarhikuaksï úxati

Jeoba kuájchakuasïndi. Ka tʼámu kutsï tátsekua niárasïndiksï Jerusaleni. ¿No xarhatasïni i ambe eska Jeoba úsïnga kuájchakuani imechani engaksï mintsikajka?

Esdras, kapituluecha 2 a 8 jamberi.



Kurhamarhikuecha

  • ¿Namunksï kʼuanhatsintasïni Jerusaleni Babilonia uératini, ka ambeksï exesïni engaksï niárajka?
  • ¿Ambeksï uénasïni úni israelitecha engaksï niárajka, peru ambeksï úsïni imeri ikiatspiticha?
  • ¿Néskiksï Ageo ka Sakariasi, ka ambeksï arhiasïni kʼuiripuechani?
  • ¿Tatenai andisï axajki karakata ma Babilonia, ka ambeksï mókukusïni?
  • ¿Esdrasi ambe úsïni enga mítijka eska uétarhisïnga sési jántskantani Tata Diosïri templuni?
  • Eska na xarharajka dibujurhu, ¿Esdrasi ambe kurhakusïni Jeobani? ¿Jeoba néna mókukusïni? ¿Ka ambejtsïni jorhendasïni i ambe?

Máteru kurhamarhikuecha

  • Arhinta Esdras 3:1-13.

    Engachi japiringa jima enga no ma Tata Diosïri kúnguarhikua japiringa, ¿ambechi jatsiski para úni? (Esd. 3:3, 6; Uku. 17:16, 17; Ebr. 13:15.)

  • Arhinta Esdras 4:1-7.

    ¿Sorobabeli ambe ejemplu íntskuski Jeobaeri iretani para no jámani máteru jakajkukuechani jingoni kúnguarhini? (Éxo. 34:12; 1 Kor. 15:33; 2 Kor. 6:14-17.)

  • Arhinta Esdras 5:1-5, 17 ka 6:1-22.

    ¿Andiksïsï kʼuiripuecha no úpi anhaxustani ánchikuarhitani paraka templu no únhapiringa? (Esd. 5:5; Isa. 54:17.)

    Jerusaleni anapu orhejtsïkuticha, ¿ambe ejemplu íntskuasïni iásï anapu orhejtsïkutichani paraksï Jeobaeri jarhuajperatani jirinhani engaksï no sési kánhani jauaka? (Esd. 6:14; Sal. 32:8; Rom. 8:31; Sant. 1:5.)

  • Arhinta Esdras 8:21-23, 28-36.

    Ante de úni ambe ma, ¿andisï sési japirini eskachi májkueni úpiringa eska Esdrasi? (Esd. 8:23; Sal. 127:1; Pro. 10:22; Sant. 4:13-15.)