Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 78: Karakata ma paredirhu

Uandantskua 78: Karakata ma paredirhu
Jájki ma karanharhitaxati paredirhu

¿AMBE úkuarhixaki ixú? I kʼuiripuechaksï kʼuínchikua ma jimbo jarhasti. Juramuti Babilonia anapu pʼímarhiasti mili jimbo kʼuiripuechani engaksï kʼéri ambeka. Úraxatiksï kopechani ka tasoni plateri ka oruerichani engaksï Jeobaeri templurhu petaaka jini Jerusaleni. Ka repentku xarharasïndi jájki ma ka uénasïndi karanharhitani paredirhu. Iáminduechaksï chésïndi.

Belsasari ka imecha engaksï imani jingoni tʼireni japka

Iásï Belsasari, Nabukodonosoriri nimakuemba juramutisti. I juramuti uinhachasïndi eskaksï juákuauaka inderi jánhastichani. Ka uandasïndi: ‘Ima enga uáka arhintani ini karakatani ka engarini aianguaka ambe enga arhikuekajkaʼ, ‘uánikua ambe intsïkuarhiaka ka imani jingoni tanimu kʼuiripueuatiksï engaksï sánderu kʼéri ambeuaka ini juramukuarhuʼ. Peru no ma jánhasti úsïndi arhintani karakatani enga paredirhu jaka, ka níjtuksï úni uandani ambe arhikuekasïni.

Juramutiri amamba kurhaasïndi ini ambe ka nirasïndi inchani jimini enga tʼirenhani jaka. Ka arhisïndi juramutini: ‘Asï xáni chéʼ. ‘Chíti juramukuarhu jarhasti achamasï ma enga mítiaka pímbinhasï diosïchani. Danieli arhinhasïndi. Enga chíti tatita Nabukodonosori juramutipka, ústi eska ima juramukuapiringa iámindu imeri jánhastichani. Pʼitarkuarhi Danielini ka imakini arhiati ambe enga arhikuekajka karakata.ʼ

Ísï jimbo, jirejiresï juásïndi Danielini. Danieli no jiókuarhisïndi intsïmperakuechani, ka uénasïndi uandantani andisï Jeoba euantapi juramukuani Belsasariri tatitani. Danieli uandasïndi: ‘Ima kʼéri exekuarhisïrendi, ka Jeoba kastigaristiʼ.

Danieli arhisïndi Belsasarini: ‘Peruri tʼu mítispka iámindu ambe enga úkuarhinchapkaʼ, ‘ka útasïri májkueni kʼéri pʼikuarheraska eska Nabukodonosori. Juárkuarhiaskari kopechani ka tasonichani engaksï Jeobaeri templurhu japka, ka indechani jimbori arhaska binu. Ka nori kómarhiska juchari Ambakiti Kuerajpirini sino diosïchani engaksï chkaririka ka engaksï tsakapuerika. Jimbosï Tata Diosï axati ini jájkini para i ambe karani.

ʼDanieli uandasïndi: ‘I ambesti enga uandajka karakataʼ. ‘MENE, MENE, TEKEL ka PARSIN.ʼ

‘MENE arhikuekasïndi eska Tata Diosï uandaskia na engari xáni juramuaka ka ixú jamberi niárasïndi chíti juramukua. TEKEL arhikuekasïndi eskari balansa jimbo tsʼéritanhaskia ka mítinhastia eskari no ambakiti kʼuiripueska. PARSIN arhikuekasïndi eska chíti juramukua jindeuaka para meduecha ka persecha.ʼ

Enga Danieli útasï uandani jarhajka, meduecha ka persechaksï uénasïndi inchani Babilonia. Inchasïndiksï iretarhu ka uándikusïndiksï Belsasarini. ¡Karakata enga paredirhu japka ima mísmu chúrikua úkuarhesti! Peru iásï, ¿ambeksï úkuarhincha israelitecha? I ambe sánderu orhepatinchi exeni jauaka, peru iásï ju exeni ambe úkuarhinchasïni Danieli.

Daniel 5:1-31.



Kurhamarhikuecha

  • ¿Ambe úkuarhisïni enga juramuti Babilonia anapu újka kʼéri kʼuínchikua ma, ka engaksï úraajka kopechani ka tasonichani engaksï Jeobaeri templurhu uératinksï juájka?
  • ¿Belsasari ambe arhiasïni imeri jánhastichani, peru ambeksï no úsïni úni?
  • Amamba, ¿ambe kurhakusïni Belsasarini?
  • Eska Danieli na arhijka juramutini, ¿Tata Diosï andisï újki eska jájki ma karapiringa paredirhu?
  • ¿Danieli ambe uandasïni eska arhikuekasïnga inde uandakuecha engaksï paredirhu jaka?
  • Enga Danieli útasï uandani jarhajka, ¿ambe úkuarhisïni?

Máteru kurhamarhikuecha

  • Arhinta Daniel 5:1-31.

    ¿Néna no májkueniski chénharhini Tata Diosïni, ima chékua jingoni enga Belsasari pʼikuarherapka enga exepka karakatani paredirhu? (Dan. 5:6, 7; Sal. 19:9; Rom. 8:35-39.)

    ¿Danieli néna xarhataspi eska no chésïrenga enga uandontskuarhikupka Belsasarini ka máteruechani engaksï kʼéri ambepka? (Dan. 5:17, 18, 22, 26-28; Uku. 4:29.)

    ¿Néna xarhatasïni Danieli kapitulu 5 eska Jeobajku jindeska sánderu kʼéri juramuti iámindu amberi? (Dan. 4:17, 25; 5:21.)