Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 79: Danieli lionichani jingoni kʼuaninhanhasïndi

Uandantskua 79: Danieli lionichani jingoni kʼuaninhanhasïndi

¡EXE! Xarharasïndi eska Danieli uandanhiata ma jimbo jarhaska. ¡Peru lionichaksï no ma ambe úkuxati! ¿Mítiskiri andi? ¿Né kʼuaninhaski Danielini lionichani jingoni? Ju exeni.

Iásï juramuti Babilonia anapu, Dariu arhinhasïndi. Dariu kánikua jaiapanhintasïndi Danielini jimboka jánhasti máeska ka ambakiti kʼuiripu ma, ka i ambe jimbo Dariu juramuti úsïndi imeri juramukuarhu. Ini jimbo, achatichaksï máru úndasïndi enbidiarini Danielini ka i ambeksï úsïndi:

Dariu

Nirasïndiksï Dariuni jingoni ka arhisïndiksï: ‘O juramuti, iáminduchi uékasïnga eskari juramukua ma uáka enga uandaaka eska 30 jurhiatikua jimbo, no nema uáka máteru diosïni o achatini ma kómarhini, sino tʼungintku, o juramuti. Enga nema no kurhandiaka, jatsisti para kʼuaninhanhani lionichani jingoniʼ. Dariu no mítisïndi andiksïsï i achaticha uékajki i juramukuani. Peru eratsisïndi eska ambakiti ambeska, ka karasïndi juramukuani. Ka iásï juramukua nóteru uátia mójtakurhini.

Enga Danieli mítijka i ambe, níntasïndi chenemba ka úsïndi kómarhikua ísï eska na pʼindepka. I achaticha engaksï ikiakuenga Danielini mítistiksï eska Danieli seguiripiringa Jeobani kómarhini. Ísï jimbo, tsípisïndiksï jimbokaksï exesïnga eskaksï iásï kʼóru uákia uándikuni Danielini.

Enga juramuti Dariu mítijka ambe enga úkuarhini jaka, kánikua kómu pʼikuarherasïndi. Peru no úsïndi mójtakuni inde juramukuani, ka jatsisti para úni eska Danieli lionichani jingoni kʼuaninhanhaka. Peru juramuti arhisïndi Danielini: ‘Erokuaresïnga eskakini kuájpintaka ima Tata Diosï engari tʼu marhuakujkaʼ.

Dariu uandanhiasïndi ka erantskutasïndi no úni kʼuíni. Pauandikua nirasïndi uiriipani jima engaksï lionicha jaka. Exe, jimini jarhasti. Ka uinhachasïndi: ‘¡Danieli, tʼu engari marhuakujka Tata Diosïni tsípitini! ¿Úski chíti Tata Diosï engari marhuakujka kʼuajpintangini parakaksïni lionicha no ma ambe úchipiringa?ʼ.

Danieli lionichani jingoni

Danieli mókukusïndi: ‘Tata Diosï axasti imeri ánjilini ka mímukuasti lionichani, ka nójtsïni ambe ma úchistiʼ.

Juramuti kánikua tsípisïndi, ka juramusïndi eskaksï petantaka Danielini posurhu uératini. Ka tátsekua uandasïndi eskaksï jima kʼuaninhauaka imechani engaksï uékaenga Danielini uándikuni. Engaksï ícha útasï nótki andanherani jarhajka, lionichaksï tʼuini jupiasïndia ka kuarhandurikuasïndiksï únichani.

Jiájkani juramuti Dariu karakuasïndi iámindu imeri juramukuarhu anapuechani: ‘Janhanharhi je Danieliri Tata Diosïni. Jimboka kʼérati milagruechani uásïnga. Ima kuájpisti Danielini parakaksï lionicha no antapiringaʼ.

Daniel 6:1-28.



Kurhamarhikuecha

  • ¿Néski Dariu, ka néna exesïni Danielini?
  • Máru achaticha engaksï enbidiariaenga Danielini, ¿ambeksï úsïni eska uáka Dariu?
  • ¿Danieli ambe úsïni enga mítijka eska jarhaska jimbanhi juramukua ma?
  • ¿Andisï kómu pʼikuarherajki Dariu enga no újka jamberi kʼuíni, ka ambe úsïni pauandikua?
  • ¿Danieli ambe mókukusïni Dariuni?
  • ¿Ambeksï úkuarhinchasïni imecha engaksï uékajka uándikuni Danielini, ka Dariu ambe karakuasïni iámu imeri juramukuarhu anapuechani?

Máteru kurhamarhikuecha

  • Arhinta Daniel 6:1-28.

    I ambe engaksï úkupka Danielini, ¿ambejtsïni miátantasïni na engaksï jámajka indecha engaksï iásï uékajka pʼínguani Jeobaeri aianhpirichani? (Dan. 6:7; Sal. 94:20; Isa. 10:1; Rom. 8:31.)

    ¿Nénachi uá májkueni úni eska Danieli engachi imechani japarini jauaka “engaksï juramukua jatsika”? (Dan. 6:5, 10; Rom. 13:1; Uku. 5:29.)

    ¿Nénachi uá “méntkisï” marhuakuni Jeobani ísï eska Danieli? (Dan. 6:16, 20; Fili. 3:16; Jaŋ. 7:15.)