Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 77: No ma ambe ústi eskaksï tinguixurhipiringa

Uandantskua 77: No ma ambe ústi eskaksï tinguixurhipiringa

¿MIÁSÏNIRI ambe ma, i tanimu tumbicheri? Jo, Danieliri amiguestiksï engaksï no uékapka arhani imani ambe enga no sési japka para indecha. Babiloniuechaksï arhiasïndi Sadraki, Mesaki ka Abednegu. Peru exea. ¿Andiksïsï no májkueni tinguixurhikuni jaki ini monumentuni eska máteruecha? Ju exeni andi.

¿Miásïniri imani juramukuechani enga Jeoba karaapka ka engaksï arhinhajka Diesi Mandamientuecha? Orheta jindesti: ‘Nori jatsiska para kómarhiani máteru diosïchani sino jíndintkuʼ. I tumbicha kurhajchaxatiksï ini juramukuani, nájkiruka úkua jukaka para ísï úni.

Nabukodonosori, Babilonia anapu juramuti pʼitarkuarhiasti uánikua kʼuiripuechani engaksï kʼéri ambeka paraksï jurhani tinguixurhikuni ini monumentuni enga úka. Arhiasïndi iámu kʼuiripuechani: ‘Engajtsï kurhauaka sïuanguechani ka arpecheri kústakuani ka ístu máteru jásï kústakuechani, tinguixurhiakajtsï ka kómarhiakajtsï indeni monumentu oruerini. Ima enga no ísï uáka, jirejiresï kʼuaninhanhati jornarhu jima enga chʼipiri kurhini jakaʼ.

Nabukodonosori kánikua ikiasïndi enga kurhajka eska Sadraki, Mesaki ka Abednegu nóksï tinguixurhiska. Ka pʼitarkuarhiasïndi. Ka arhiasïndi eskaksï iásï kʼóru tinguixurhiakia. Peru i tumbicha Jeobanksï mintsikasïndi. Arhisïndiksï juramutini: ‘Juchari Tata Diosï engachi marhuakujka, imajtsïni kuájpintatiʼ. ‘Peru nájkiruka no ísï uáka, jucha no tinguixurhikuaka chíti monumentu oruerini.ʼ

Sadraki, Mesaki ka Abednegu

Enga Nabukodonosori kurhajka i ambe, sánderu ikiasïndi. Jima no iauani jorna ma jarhasti, ka juramusïndi: ‘¡Sieti uelta sánderu jorhepera je eska tʼuintki!ʼ. Ka úsïndi eskaksï achati uinhapiticha máru, jótauakaksï Sadraki, Mesaki ka Abedneguni ka eskaksï jornarhu kʼuaninhauaka. Xáni jorhepesïndi jorna enga jamberi achati uinhapitichaksï jima uarhijka. Peru, ¿ambeksï úkuarhinchasïni tanimu tumbicha engaksï jornarhu kʼuaninhanhajka?

Juramuti eranhasïndi jornarhu ka kánikua chésïndi. Ka kurhanguarhisïndi: ‘¿Nochi tanimu tumbichani jótaaspi ka kʼuaninhaani, jornarhu?ʼ.

Jántspirichaksï uandasïndi: ‘Jo, ísïchi úskaʼ.

Juramuti uandasïndi: ‘Peruni ji exeaxaka tʼámu tumbichani engaksï chʼipirirhu jámani jakaʼ. ‘Nóksï jótakata jarhasti, ka chʼipiri no ma ambe úkuaxati, ka ma, ísï xarharasïndi eska diosï ma.ʼ Juramuti andamukuerasïndi jornarhu ka uinhachasïndi: ‘¡Sadraki! ¡Mesaki! ¡Ka Abednegu! ¡Cha engajtsï marhuakujka Sánderu Kʼéri Tata Diosïni, uénta je!’.

Engaksï uéntajkia, iáminduechaksï exesïndi eskaksï no kurhiska. Jiájkani juramuti uandasïndi: ‘¡Eska kʼéri ambe exenhaka Sadraki, Mesaki ka Abednegueri Tata Diosï! Jimboka axaska imeri ánjilini ka kuájchakuasti, jimbokaksï no uékaska kómarhini máteru diosïni sino indecheri Diosïntkuʼ.

¿Nójtsïni xarhatachisïni i ambe eskachi no méni jatsiska para jurajkuni Jeobani?

Éxodo 20:3; Daniel 3:1-30.



Kurhamarhikuecha

  • ¿Ambe juramuski Nabukonodosori, juramuti Babilonia anapu?
  • Tanimu Danieliri amiguecha, ¿andiksïsï no tinguixurhikuni jaki indeni monumentu oruerini?
  • Enga Nabukonodosori ini tanimu tumbichani ménderu sésikua íntskuajka paraksï tinguixurhini, ¿nénaksï xarhatasïni ícha eskaksï mintsikasïnga Jeobani?
  • ¿Ambe juramusïni Nabukonodosori eskaksï uáka Sadraki, Mesaki ka Abednegu jingoni?
  • ¿Nabukodonosori ambe eranhasïni jornarhu?
  • ¿Juramuti néna kʼéri ambe arhisïni, Sadraki, Mesaki ka Abednegueri Tata Diosïni, ka ambe ejemplujtsïni íntskusïni?

Máteru kurhamarhikuecha

  • Arhinta Daniel 3:1-30.

    Enga nema uékaka eskachi nóteru marhuakuaka Jeobani, ¿nénachi májkueni jáma eska i tanimu tumbicha? (Dan. 3:17, 18; Mat. 10:28, NM; Rom. 14:7, 8.)

    ¿Tata Diosï Jeoba ambe jukaparhakua ambe jorhendaski Nabukodonosorini? (Dan. 3:28, 29; 4:34, 35.)