Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 73: Ultimu ambakiti juramuti Israeli

Uandantskua 73: Ultimu ambakiti juramuti Israeli

JOSIASI ochu uéxurhintku jatirisïndi enga uénajka tsimani tribu Israeli anapuechani juramukuani. Jukari sapichuesti para úndani juramuni. Jimbosï uénakuarhu, para úni juramuni máteruechaksï jarhuatajti.

Enga Josiasi siete uéxurhini juramujkia, uénasïndi jirinhani Jeobani. Ka chúngumasïndi ambakiti juramuticheri ejemplu, Dabidirini, Jeosafatirini ka Esekiasirini. Tumbiparini úsïndi ambe ma no chéparini.

Juramuti Josiasi ka íksï achaticha, k’epekuaxati ini diosï úkatechani

Uánikua israelitecha, ióniksï no sési jásï ambeksï ústia. Kómarhiasïrendiksï diosïchani engaksï no jurhimbitipka. Tinguixurhikuasïrendiksï diosï úkatechani. Ísï jimbo, Josiasi ka imeri jarhuajpiricha, uénasïndiksï kénditani iámu paisi jimbo, komarhikuani enga no jurhimbitipka. I kʼéri ma ánchikuarhitesti, jimbokaksï uánikuecha kómarhiasïrenga diosï no jurhimbitichani. Exesïngari ixú Josiasini ka imeri jarhuajpirichani, na engaksï kakandurhiani jaka diosï úkatechani.

Tátsekua Josiasi arhiasïndi tanimu achaatichani eskaksï sési jántskantaka ménderu Jeobaeri templuni. Tánasïndiksï tumina iretarhu ka íntskuasïndiksï ini achaatichani ánchikuarhitani jimbo. Engaksï i, ánchikuarhini jarhajkia templurhu, kʼéri saserdoti Ilkiasi, exentasïndi jima, ma ambe enga kánikua jukaparhaka: libru juramukuerini enga ióntki Jeoba arhipka Moisesini eska karapiringa, ka enga tsïnchikata japka.

Engaksï pákujkia libru Josiasini, ima arhiasïndi eskaksï arhikuntaka. Engaksï arhikuntani jarhajka, Josiasi exesïndi eska ireta no úxaka ambe enga Jeoba juramupka. Kánikua kómu pʼikuarherasïndi, ka ísï jimbo, eskari na újka exeni, karukusïndi imeri xukuparhakuani. Ka uandasïndi: ‘Jeoba ikiaxati juchantsïni jingoni, jimbokaksï juchari táticha nóksï kurhaajchaska juramukuechani engaksï ini libruni jimbo karakata jaka’.

Safani ka juramuti Josiasi

Josiasi arhisïndi kʼéri saserdoti Ilkiasini eska kurhanguarhiaka ambe úkuaua Jeoba. Ilkiasi nirasïndi kurhamarhini profetisa Uldani. Ka Ulda arhisïndi eska arhiaka Josiasini eska Jeoba i ambe uandaska: ‘Jerusaleni ka iámu ireta kastigarinhati, jimbokaksï diosï no jurhimbitichani kómarhiaskaksï ka jimboka parhakpinirhu uinindeskia ikichakueni jásï ambe. Peru Josiasi, jimbokari tʼu ambakiti ambe úska, i ambe enga Jeoba uandaka no iásï úkuarhiati sino astakari na uarhiakia’.

2 Crónicas 34:1-28.



Kurhamarhikuecha

  • ¿Na xáni jatiri uénasïni juramuni Josiasi, ka ambe úsïni enga siete uéxurhini juramujkia?
  • ¿Ambe úxaki Josiasi orheta dibujurhu?
  • ¿Ambe exentasïni kʼéri saserdoti, engaksï sési jántskantani jarhajka templuni?
  • ¿Josiasi andisï karukujki xukuparhakuani?
  • ¿Ambe arhisïni Ulda Josiasini eska uandaska Jeoba?

Máteru kurhamarhikuecha

  • Arhinta 2 Crónicas 34:1-28.

    ¿Ambe Josiasiri ejemplunksï uá pʼitani imecha, engaksï no sési nitamakuarhenchaka sapiparini? (2 Cró. 33:21-25; 34:1, 2; Sal. 27:10.)

    ¿Ambe úspi Josiasi paraka etsakurhipiringa jurhimbiti kómarhikua enga ima ochu, dose, ka disiochu uéxurhini páni japkia juramuni? (2 Cró. 34:3, 8.)

    ¿Ambechi jorhenguarhisïni Josiasiri ambe ka kʼéri saserdoti Ilkiasiri ambe, parachi jánguarhintani sési jántskani jima engachi tánguarhijka? (2 Cró. 34:9-13; Pro. 11:14; 1 Kor. 10:31.)