Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 66: Juramuti no ambakiti Jesabeli

Uandantskua 66: Juramuti no ambakiti Jesabeli

ENGA Jeroboani uarhijkia, kánikua no sési úrichaksï juramukuasïndi Israeli anapu 10 tribuechani engaksï norti ísï japka. Akabi sánderu no ambakisti. ¿Mítiskiri andi? Ma ambe jimbo enga ísïka, jindesti imeri témba Jesabelini jimbo, jimboka juramuti no sési úri máeska.

Jesabeli no israelitaesti. Juramuti Sidoni anapu uájpesti. Baalini kómarhisïndi, diosï no jurhimbitini, ístu úsïndi eska Akabi ka uánikua israelitecha Baalinksï kómarhiaka. Jesabeli ikiakusïndi Jeobani ka uánikua profetechani uándikuasïndi. Máruksï nirasïndi kuebecharhu ísï jirikuarhini paraksï no uándikunhani. Enga Jesabeli tsitijka ambe ma, uándikusïndi né uéjkini para úni jatsini.

Ma jurhiatikua juramuti Akabi kómu jarhasïndi. Ka Jesabeli arhisïndi: ‘¿Andirisï kómu jaki?’.

Akabi arhisïndi: ‘Imani jimbo engarini Naboti arhika’. ‘Ji uékasïrenga piákuni echerini enga ubasï jukajka. Peru imarini arhisti eskarini no úpiringa atarachintani.’

‘Erokuarhi’, arhisïndi Jesabeli. ‘Jíkini íntskuaka.’

Ísï jimbo, Jesabeli karakuasïndi máru achatichani engaksï kʼéri ambeka Nabotiri iretarhu. Ka arhiasïndi: ‘U je eska máru achaticha engaksï no ma ambe jimbo marhuajka, uandaakaksï eska Naboti no sési uandaska Tata Diosïri ambe ka ístu juramutiri ambe’. ‘Ka pá je uéramanisï ka tsakapu jimbo uándiku je.’

Enga Jesabeli mítijka eska Naboti uarhiskia, arhisïndi Akabini: ‘Iásï kʼóru niia, chítistia Nabotiri echeri enga ubasï jukajka’. Jesabeli jatsisti para kastigarinhani i xáni no sési jásï ambe jimbo enga úka, ¿no ísïski?

Juramuti Jesabeli

Ísï jimbo, sánderu orhepatini Jeoba axasïndi Jeúni para kastigarini Jesabelini. Enga Jesabeli mítijka eska Jeú jurhaxaka, atanharhintasïndi para sési xarhanharhini. Peru enga Jeú jurhajka ka enga exejka eska bentanarhu uaxarukuska, arhiasïndi imechani engaksï jima marhuajka: ‘¡Uekopa je!ʼ. Imaksï ísï úsïndi, eskari na exejka dibujurhu. Uekopasïndiksï ka ima uarhiri andatserasïndi. I ambe úkuarhinchasïndi juramuti no sési úri Jesabeli.

1 Reyes 16:29-33; 18:1-4; 21:1-16; 2 Reyes 9:30-37.



Kurhamarhikuecha

  • ¿Néski Jesabeli?
  • ¿Andisï kómu jarhajki juramuti Akabi?
  • ¿Ambe úsïni Jesabeli para úni íntskuni imeri uámba Akabini, Nabotiri echerini?
  • ¿Jeoba néni axasïni para kastigarini Jesabelini?
  • Eska na xarharajka dibujurhu, ¿ambe úkuarhesïni enga Jeú niárajka Jesabeliri kʼumanchikuarhu?

Máteru kurhamarhikuecha

  • Arhinta 1 Reyes 16:29-33 ka 18:3, 4.

    ¿Na xáni no sési ambe únhaxapi ima jurhiatikuechani enga Akabi juramuni japka? (1 Rey. 14:9.)

  • Arhinta 1 Reyes 21:1-16.

    ¿Néna xarhataspi Naboti eska no sáni chésïrenga ka eska no méni jurajkupiringa Jeobani? (1 Rey. 21:1-3; Lev. 25:23-28.)

    ¿Andichisï no jatsi para májkueni úni eska Akabi engachi no uáka intsïnhani ambe ma engachi uékaka? (1 Rey. 21:4; Rom. 5:3-5.)

  • Arhinta 2 Reyes 9:30-37.

    ¿Ambechi uá jorhenguarhini na enga Jeú úpka ambe enga Jeoba uékaenga? (2 Rey. 9:4-10; 2 Kor. 9:1, 2; 2 Tim. 4:2.)