Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 58: Dabidi ka Goliati

Uandantskua 58: Dabidi ka Goliati

FILISTEUECHA ménderuksï jurhasïndi Israelini jingoni uarhiperani. Tanimu Dabidiri ermanuembecha engaksï sánderu kʼérika, Sauliri ejersiturhuksï jarhasti. Jimbosï ma jurhiatikua Jese arhijti Dabidini: ‘Ni tʼirekua pákuani chíti ermanuechani. Ka exea néna nikukuaxaki’.

Goliati

Enga Dabidi niárajka jima engaksï sondaduecha jarhajka, nirasïndi exeani ermanuembechani jima engaksï uarhiperaaka. Goliati filisteu ma enga kánikua iójtaraka, teresmarhuasïndi israelitechani. Tsípa ka chúrikua i ambe úsïndi 40 jurhiatikua. Uinhachasïndi: ‘Eraku je nemani enga jíndeni jingoni uarhiperaka. Engarini uándikuska, jucha chári jántspiriuaka. Peru engani ji uándikuska, chájtsï juchari jántspiriuaka. Ísï jimbo eraku je nemani’.

Dabidi kurhamarhiasïndi máru sondaduechani: ‘¿Ambeksï íntskua imani enga uándikuaka ini filisteuni, para Israeli no kʼuratsekua jingoni pakarani?’.

Ma sondadu uandasïndi: ‘Sauli kánikua jukaparhakua ambe íntskuati’. ‘Ka íntskuati uájpani para imeri témbaeni.’

Peru iámindu israelitechaksï chérhisïndi Goliatini, jimboka kánikua iójtaraska. Sáno tanimu metru iójtarasti, ka máteru sondadu pákusïndi eskuduni.

Máru sondaduechaksï nirasïndi Saulini jingoni ka arhisïndiksï eska Dabidi uékasïnga nirani Goliatini jingoni uarhiperani. Peru Sauli arhisïndi Dabidini: ‘Nori uáka imani jingoni, tʼuri sapi máeska ka ima iónisï sondaduestia’. Dabidi uandasïndi: ‘Ji uándikuska osuni ka leonini ma, engaksï juchiti tátiri karichichani paani japka. Jeobarini jarhuaatati parani májkueni úni ini filisteuni jingoni’. Jimbosï Sauli arhijti: ‘Ni, ka eska Jeoba tʼungini jingoni jauaka’.

Dabidi nirasïndi iorhekua ma jimbo ka jima iúmu tsakapu pitsipitichani erakuasïndi ka jatsiraasïndi sutupurhu. Ka nirasïndi imeri jondani jingontku Goliatini jingoni uarhiperani. Goliati no úsïndi jakajkuni i ambe. Eratsisïndi eska no úkua jukaka uándikuni Dabidini.

Dabidi tsakapu ma kʼuanikuxati

Goliati arhisïndi: ‘Ju ixuani’, ‘ka chíti kʼuiripitani pájaruechani ka animalichani íntsauaka’. Peru Dabidi arhisïndi: ‘Tʼuri jurhaxaka espada, lansa ka jabalina ma jingoni, perukini ji, andarheraxakakini Jeobaeri arhinhakuani jingoni. Jíkini uándikuaka jimboka Jeoba iásï juchiti jájki jimbokini jurajkuxaka’.

Dabidi uiriisïndi andarherani Goliatini. Pʼitasïndi tsakapu ma, jondarhu jatsirukusïndi ka uinhamu kʼuanirasïndi. ¡Tsakapu tserhukuarhu atasïndi ka i uarhiri andatserasïndi! Engaksï filisteuecha exejka eska imecheri uinhapiti uarhiskia, sïpakuarhisïndiksï. Israelitechaksï nirasïndi andanguani ka andasïndiksï uarhiperakuani.

1 Samuel 17:1-54.



Kurhamarhikuecha

  • ¿Goliati ambe arhiasïni sondadu israelitechani?
  • ¿Goliati na xáni iójtaraski, ka Sauli ambe íntskua imani enga uándikuaka?
  • ¿Dabidi ambe uandasïni enga Sauli arhijka eska no uáka uarhiperani Goliatini jingoni jimboka sapijku máeska?
  • Enga Dabidi mókukujka Goliatini, ¿néna xarhatasïni eska mintsikasïnga Jeobani?
  • Eska na xarharajka dibujurhu, ¿Dabidi ambe úrasïni para uándikuni Goliatini, ka ambe úkuarhesïni tátsekua filisteuechani jingoni?

Máteru kurhamarhikuecha

  • Arhinta 1 Samuel 17:1-54.

    ¿Andisï Dabidi no chéani, ka nénachi uá májkueni úni? (1 Sam. 17:37, 45; Efe. 6:10, 11.)

    ¿Andisïksï kristianuecha no jatsi para méntkisï uékani andani májkueni eska Goliati engaksï chʼanani jauaka o engaksï máteru ambe úni jauaka? (1 Sam. 17:8; Gal. 5:26; 1 Tim. 4:8.)

    ¿Néna xarhatasïni Dabidiri uandakuecha eska mintsikasïrenga eska Tata Diosï jarhuatapiringa? (1 Sam. 17:45-47; 2 Cró. 20:15.)

    Nájkirukaksï uarhiperapka tsimani ejersituecha, ¿néna xarhatasïni i uandantskua eska Tata Diosï jurhimbiti Jeoba uarhiperaxapka diosï no jurhimbitichani jingoni? (1 Sam. 17:43, 46, 47.)

    Erakukatecha engaksï auandarhu niuaka, ¿nénaksï májkueni mintsikasïni Jeobani eska Dabidi? (1 Sam. 17:37; Jer. 1:17-19; Jaŋ. 12:17.)

PARAJTSÏ SÁNDERU MÍTINI

JORHENDAA JE CHÁRI SAPIICHANI

Dabidi tsʼiuespti

Arhinta i xáni ambakiti uandantskuani Bibliarhu parari úni mítini andisï Dabidi xáni tsʼiuepi.