Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 56: Sauli orheta juramuti Israeli anapu

Uandantskua 56: Sauli orheta juramuti Israeli anapu
Samueli aseiti atajtsikuxati Saulini para juramuti úni

EXE, Samueli aseiti atajtsikuxati ini achaatini. Ambakiti aseiti máesti enga sési jájkundejka. I ambeksï úkusïrendi nemani para xarhatani eska erakunhaspka para juramutini. Jeoba arhisïndi Samuelini eska aseiti atajtsikuaka Saulini.

Sauli no jakajkusïrendi eska ambakiti kʼuiripuespka para juramutini. Ísï jimbo, arhisïndi Samuelini: ‘Ji Benjaminiri tribu anapueska, sánderu sapichu Israeli anapu’. ‘¿Andirisï uandajki eskani juramutiuaka?’ Jeoba kánikua jaiapanhintasïndi Saulini, jimboka no uékasïnga kʼéri ambeni ka ni eska kʼéri ambe exenhaka. Jimbosï erakujti para juramutini.

Peru Sauli jatsikuarheristi, jimboka imeri familia jatsikuarheska ka sési jáxesti ka iójtarasti. ¡Sánderu iójtarasti eska náki uéjki kʼuiripu Israeli anapu! Ístu jorhenasti uirini ka kánikua uinhapisti. Kʼuiripu tsípisïndi enga Jeoba Saulini erakujka para juramutini. Iáminduechaksï uinhachasïndi: ‘¡Eska ióni jamberi irekaka juchari juramuti!’.

Imecha engaksï Israelini ikiakujka útasïksï uánisti. Sánisï tátsekua enga Sauli juramuti únhajkia, amonitechaksï jurhasïndi Israelini jingoni uarhiperani. Peru Sauli uánikua sondaduechani taantasïndi ka andaasïndiksï amonitechani. Ireta tsípisïndi jimboka Sauli imecheri juramutiska.

Nitamasïndiksï uéxurhinicha ka Sauli úsïndi eska Israelitecha uánikua uarhiperakuechani andauaka. Ístu Sauli kámasïndi uájpani ma enga arhinhajka Jonatani, ka i no sáni chésïndi. Jonatani jarhuatasïndi Israelini uánikua uarhiperakuechani andaani. Útasïksï filisteuechesti engaksï sánderu ikiakujka Israelini. Ma jurhiatikua mili jimboksï filisteuecha jurhasïndi uarhiperani Israelini jingoni.

Samueli arhisïndi Saulini eska erokaka astaka ima janoaka para kéjtsïtakua úkuni Jeobani. Peru Samueli ióndasïndi janoni. Sauli chésïndi eska filisteuecha uénaka uarhiperani imechani jingoni, ísï jimbo, tʼuini orhepasïndia úni kéjtsïtakuani. Enga Samueli janojkia, arhisïndi Saulini eska no kurhandiska. Arhisïndi: ‘Jeoba máteru nemani erakuati para juramukuni Israelini’.

Tátsekua, Sauli ménderu no kurhandisïndi. Ísï jimbo, Samueli arhisïndi: ‘Sánderu sésisti kurhajchani Jeobani ka eska sánderu ambakiti karichichani íntskuani. Jimbokari no kurhajchaska Jeobani, ima nóterukini jurajkuatia eskari juramutiuaka Israeli’.

Íri ambe, úsïngachi jorhenguarhini ambakiti ambe. Exerasïndijtsïni eska kánikua jukaparhakueska kurhajchani méntkisï Jeobani. Ístujtsïni exerasïndi eska nema enga ambakiti kʼuiripueuaka, ísï eska naepka Sauli, uáti no sési úri ma úkuarhini. ¡Eskachi no méni inde ambe úkuarhinchaka! ¿No ísïski?

1 Samuel, kapituluecha 9 asta 11; 13:5-14; 14:47-52; 15:1-35; 2 Samuel 1:23.



Kurhamarhikuecha

  • ¿Samueli ambe úxaki dibujurhu, ka andi?
  • ¿Jeoba andisï jaiapanhintajki Saulini, ka na jásï kʼuiripueski?
  • ¿Néna arhinhasïni Sauliri uájpa, ka ambe úsïni?
  • ¿Andisï Sauli kéjtsïtakua újki ka andisï no erokajki Samuelini paraka ima úpiringa?
  • ¿Ambechi jorhenguarhisïni Sauliri uandantskuani jingoni?

Máteru kurhamarhikuecha

  • Arhinta 1 Samuel 9:15-21 ka 10:17-27.

    ¿Néna jarhuataspi Saulini, imeri kaxumbikua para no kókuani jámani úni ambe ma engaksï máru achaticha no janhanharhikua jingoni uandapka imeri ambe? (1 Sam. 9:21; 10:21, 22, 27; Pro. 17:27.)

  • Arhinta 1 Samuel 13:5-14.

    ¿Sauli ambe pekadu úspi jini Guilgali? (1 Sam. 10:8; 13:8, 9, 13.)

  • Arhinta 1 Samuel 15:1-35.

    ¿Sauli ambe kʼéri pekadu úspi enga nípka uarhipeni Agagini jingoni enga Amaleki anapu juramutipka? (1 Sam. 15:2, 3, 8, 9, 22.)

    ¿Néna jámaspi Sauli xarhatani eska ima sési ambe úspka ka eskaksï máteruecha kulpa jatsispka? (1 Sam. 15:24.)

    ¿ Ambechi jatsiski para úni, engajtsïni nema jarhuajperata íntskuaka? (1 Sam. 15:19-21; Sal. 141:5; Pro. 9:8, 9; 11:2.)