Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 74: Tumbi ma enga no chéjka

Uandantskua 74: Tumbi ma enga no chéjka

EXE kʼuiripuechani, teresmarhuxatiksï indeni tumbini. ¿Mítiskiri néski? Jeremiasisti, kʼéri profeta ma Tata Diosïri.

Kʼuiripu teresmarhuxati Jeremiasini

Sánisï tátsekua enga Josiasi uénajka paisirhu kʼamajkuani diosï úkatechani, Jeoba arhisïndi Jeremiasini eska Imeri profetaeuaka. Peru Jeremiasi exesïndi eska jukari sapichueska para profeta máeni. Ka Jeoba arhisïndi eska Ima jarhuataka.

Jeremiasi arhiasïndi israelitechani eskaksï nóteru uákia no sési jásï ambe. Ka ístu arhiasïndi: ‘Ima diosïcha engaksï kʼuiripuecha kómarhiajka nóksï jurhimbitisti’. Peru uánikua israelitecha erakusïndiksï marhuakuani diosï úkatechani, ka no Tata Diosï Jeobani enga jurhimbitika. Enga Jeremiasi arhiajka eska Tata Diosï kastigariauaka imeri no sési jarhati úkuechani jimbo, imecha teresmarhusïndi.

Nitamasïndiksï uéxurhinicha. Josiasi uarhisïndi ka tanimu kutsï tátsekua imeri uájpa Jeoiakimi niárasïndi juramutini. Jeremiasi chúngumasïndi arhini iretani: ‘Jerusaleni kʼamajkunhati engajtsï no mójtakuska chári jánguani’. Saserdoticha jupikasïndiksï Jeremiasini ka uinhachaparinksï uandasïndi: ‘Jeremiasi jatsisti para uarhini, jimboka no sési uandaska juchari ireteri’.

¿Ambe uá iásï Jeremiasi? ¡Ima no chésïndi! Arhiasïndi iáminduechani: ‘Jeobarini axasti paraksïni i ambe arhini. Engajtsï no mójtakuska chári jánguani, Jerusaleni kʼamajkunhati. Peru jatsiskajtsï para i ambe mítini: Engajtsïni uándikuska, uándikuakajtsï nemani enga no ma ambe úka’.

Imecha engaksï kʼéri ambepka iretarhu, nóksï uándikusïndi Jeremiasini, peru israelitechaksï no mójtakusïndi imecheri jánguani. Tátsekua jurhasïndi Nabukodonosori, juramuti Babilonia anapu, ka uarhiperasïndi Jerusalenini jingoni. Ka úsïndi eska israelitecha imeri jántspiriuakaksï. Mili jimbo israelitechani paasïndi Babilonia. ¡Eratsi nénari pʼikuarherapirini engakini nema engari tʼu no mítika pápiringa máteru paisi jimbo engari tʼu no méni nika!

Jeremías 1:1-8; 10:1-5; 26:1-16; 2 Reyes 24:1-17.



Kurhamarhikuecha

  • ¿Néski tumbi enga dibujurhu jaka?
  • ¿Ambe uandasïni Jeremiasi enga Jeoba arhijka eska profetaeuaka, peru ambe arhisïni Jeoba?
  • ¿Jeremiasi ambe aiangusïni iretani?
  • ¿Ambeksï úsïni saserdoticha paraksï pʼínguni Jeremiasini, peru néna xarhatasïni i eska no chésïnga?
  • ¿Ambeksï úkuarhinchasïni israelitecha jimbokaksï no mójtakuspka imecheri jánguani?

Máteru kurhamarhikuecha

  • Arhinta Jeremías 1:1-8.

    Eska na xarhatajka Jeremiasiri ejemplu, ¿ambesï jarhuatajki nemani para sési marhuakuni Jeobani? (2 Kor. 3:5, 6.)

    ¿Néna uinhaperantasïni tumbichani Jeremiasiri ejemplu? (Ecl. 12:1; 1 Tim. 4:12.)

  • Arhinta Jeremías 10:1-5.

    ¿Ambe ejemplu úrasïni Jeremiasi, para xarhatani eska no sáni marhuasïnga para diosï úkatechani mintsikaani? (Jer. 10:5; Isa. 46:7; Hab. 2:19.)

  • Arhinta Jeremías 26:1-16.

    Erakukatecha engaksï auandarhu niuaka ka engaksï uandantajka ambe enga uáka Tata Diosï, ¿nénaksï májkueni úxaki eska Jeremiasi enga arhipka Jeoba ‘nori ma uandakua pʼikuntaka’? (Jer. 26:2; Deu. 4:2; Uku. 20:27.)

    ¿Ambe ambakiti ejemplu íntsaasïni Jeremiasi, Jeobaeri eianhpirichani engaksï eianhpijka iámindu nasionichani jimbo ambe enga uáka Jeoba? (Jer. 26:8, 12, 14, 15; 2 Tim. 4:1-5.)

  • Arhinta 2 Reyes 24:1-17.

    ¿Ambe no sési jásï ambe nitamakuarhinchaspi Juda jimboka jurajkuspka Jeobani? (2 Rey. 24:2-4, 14.)