Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 70: Jonasi ka kʼéri kurucha

Uandantskua 70: Jonasi ka kʼéri kurucha

EXE achaatini enga itsïrhu jaka. No sési nikukuxati, ¿no ísïski? ¡Inde kurucha antati! ¿Mítiskiri néski? Jonasisti. Ju exeni andisï i achati i ambe nitamanchani jaki.

Jonasi Jeobaeri profetaesti. Profeta Eliseu nótki ióni uarhisïrendi enga Jeoba arhijka Jonasini: ‘Ni kʼéri ireta Nínibi. Jima jukari no sési jásï ambe únhaxati ka uékasïnga eskari inde ambe arhiauaka’.

Jonasi ka kʼéri kurucha

Peru Jonasi no uékasïndi nirani. Ka barku ma jimbo jatasïndi enga no Nínibi nirajka. Jeoba no tsitisïndi enga Jonasi ísï sïpakuarhijka. Jimbosï kʼéri ma janirajti tarhiata jingoni. Xáni no sési jánhaskuarhesïndi enga barku ipimeni jarhajkia. Kánikuaksï chésïndi marineruecha, ka uinhachaparinksï jarhuajperakua kurhakuasïndi imecheri diosïchani.

Tátsekua Jonasi arhiasïndi: ‘Ji Jeobani marhuakusïnga, ima Tata Diosïni enga úka auandani ka Echerini. Ka sïpakuarhixaka, jimbokani no uékaska úni ambe engarini Jeoba arhika’. Ísï jimbo, marineruechaksï arhisïndi: ‘¿Ambeksïni úchia paraka i kʼéri tarhiata anhaxurhiaka?’.

Jonasi arhiasïndi: ‘Kʼuanimajtsïni je marirhu, ka mari pínasku jauati’. Marineruechaksï no uékasïndi inde ambe úni, peru enga mari uénajka sánderu no sési nirani, kʼuanimasïndiksï Jonasini. Ka janikua jirejiresï anhaxurhisïndi, ka nóteru xáni no sési nirasïrendia.

Enga Jonasi ipimejkia, kʼéri ma kurucha kunajkasïndi, peru no uarhisïndi. Tanimu jurhiatikua ka tanimu chúrikua jarhasïndi kurucheri sïturhirhu. Jonasi kánikua no sési pʼikuarherasïndi jimboka no kurhajchaska Jeobani enga ima Nínibi axapka. Ísï jimbo, ¿mítiskiri ambe úsïni?

Kómarhisïndi Jeobani paraka jarhuataka. Jimajkani Jeoba úsïndi eska kurucha, jiuantaka Jonasini echeri kʼarhindekuarhu. Ka iásï kʼóru nirasïndia Nínibi, ¿nójtsïni jorhendasïndi i ambe eska kánikua jukaparhakueska méntkisï kurhajchani Jeobani?

Jonasiri libru.



Kurhamarhikuecha

  • ¿Néski Jonasi, ka ambe arhisïni Jeoba eska uáka?
  • ¿Ambe úsïni Jonasi enga no uékajka nirani nani enga Jeoba axajka?
  • ¿Ambe arhiasïni Jonasi marineruechani eskaksï uáka para anhaxurhini janikua?
  • Eska na xarharajka dibujurhu, ¿ambe úkuarhisïni enga Jonasi ipimejkia?
  • ¿Jonasi namuni jurhiatikua jarhaspi kurucheri sïturhirhu, ka ambe úsïni jima?
  • ¿Nani nirasïni Jonasi enga jiuantapkia kurucha, ka ambejtsïni jorhendasïni i ambe?

Máteru kurhamarhikuecha

  • Arhinta Jonás 1:1-17.

    Eska na xarharajka, ¿néna exesïreni Jonasi imeri ánchikuarhitani para nirani ninibitechani aianguani ambe enga Jeoba uandapka? (Jon. 1:2, 3; Pro. 3:7; Ecl. 8:12.)

  • Arhinta Jonás 2:1, 2, 10.

    ¿Nénajtsïni xarhatachisïni Jonasiri ejemplu, eskachi uáka mintsikani eskajtsïni Jeoba mókuchentauaka kómarhikuechani? (Sal. 22:24; 34:6; 1 Juanu 5:14.)

  • Arhinta Jonás 3:1-10.

    ¿Nénajtsïni uinhaperantasïni mítini eska Jeoba chúngumaspka úrani Jonasini nájkiruka uénakuarhu no uékapka úni ambe enga Jeoba arhipka? (Sal. 103:14; 1 Ped. 5:10.)

    ¿Ambejtsïni jorhendasïndi ambe enga úpka Jonasi ninibitechani jingoni, parachi no jámani tʼuini uandania eskaksï no jiókuarhiaka eianhperakuani? (Jon. 3:6-9; Ecl. 11:6; Uku. 13:48.)