Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 69: Uátsï jarhuatasïndi achatini ma enga kʼéri ambeka

Uandantskua 69: Uátsï jarhuatasïndi achatini ma enga kʼéri ambeka

¿MITISKIRI ambe uandaxaki i uátsï? Uandontskuarhixati Jeobaeri profeta Eliseueri ambe ka na enga Jeoba xáni ambakiti ambe jarhuatajka úni Eliseuni. Uarhiti no mítisti Jeobaeri ambe, jimboka no israeliteska. Peru, ju exeni andisï i uátsï i uarhitiri kʼumanchikuarhu jaki.

Uarhiti, Siria anapuesti. Inderi uámba Naamanisti enga Siria anapu ejersituni juramukujka. Siriuecha jupikastiksï ini uátsï israelitani, ka iásï Naamaniri témbani jarhuatasïndi.

Naamaniri témba ka imeri jarhuajpiri

Naamani no sési jásï ma pʼamenchakua jukarasti enga arhinhajka lepra. I pʼamenchakua úsïndi eska ma, jurarhekuarhiaka kʼuiripitani. Uátsï i ambe uandaxati: ‘Enga juchiti tata nípiringa Jeobaeri profetani jingoni jini Israeli, ima pʼikurhintapirindi leprani’. Uarhitiri uámba mítisïndi i ambe.

Naamani nirasïndi Israeli jimboka uékasïnga ambakintani. Enga niárajkia, nirasïndi Eliseueri kʼumanchikuarhu. Ka Eliseu úsïndi eska imeri jarhuajpiri uéraka, para arhini Naamanini eska siete uelta inchamiaka iorhekua Jordanirhu. Naamani kánikua ikiasïndi ka uandasïndi: ‘¡Juchiti paisi anapu iorhekuecha sánderuksï ambakisti eska na uéjki iorhekua Israeli anapu!’. I ambe uandasïndi ka níntasïndi.

Peru ma imeri jarhuajpiri arhisïndi: ‘Tata, engakini Eliseu úrapiringa ma ambe enga úkua jukapiringa, tʼuri úpiringa. Jiáni, ¿andirisï no nirajki inchamini ísï eskakini na arhika ima?’. Naamani kurhajchasïndi imeri jarhuajpirini ka inchamisïndi sieti uelta iorhekua Jordanirhu. ¡Enga i ambe újka, ambakintasïndi!

Naamani kánikua tsípisïndi, nirasïndi Eliseuni jingoni ka arhisïndi: ‘Iásï kʼóru mítiskia eska Israeliri Tata Diosï, imajku jindeska Tata Diosï iámu Parhakpinirhu. Ísï jimbo, i ini intsïmperakuaniʼ. Peru Eliseu uandasïndi: ‘No, nómbe, no jiókuarhiakaʼ. Eliseu mítisti eska no sési japiringa jiókuarhini intsïmperakuani, jimboka Jeobasï ambakerantaka Naamanini. Peru Gueasi, Eliseueri jarhuajpiri, uékasïndi intsïmperakuani.

Ísï jimbo, i ambe úsïndi. Enga Naamani níntajkia, uiriipasïndi andanguni ka arhisïndi: ‘Eliseu uandasïndi eska uékasïnga máru chíti intsïmperakueri ambe, para íntskuani imechani engaksï iáiasï juka pʼorhembini’. Peru Naamani no mítisti eska i ambe chikuanderakua máeska, ísï jimbo, íntskusïndi Gueasini máru ambe.

Enga Gueasi kʼuanhatsintajkia, Eliseu tʼuini mítisïndia ambe enga úka, jimboka Jeoba aianguskia. Ísï jimbo, Eliseu arhisïndi: ‘Jimbokari i no sési jásï ambe úska, Naamaniri leprani tʼuri jukarhikuarhiaka’. ¡Ka jirejiresï ísï úkuarhisïndi!

¿Ambechi jorhenguarhisïni íri ambe? Ma, eskachi jatsiska para ísïni eska uátsï, ka eianhpini Jeobaeri ambe. I ambe kánikua jarhuatauati máteruechani. Tsimani, nochi jatsiska para kʼéri pʼikuarherani ísï eska Naamani naepka orheta, sino kurhajchani imechani engaksï Jeobani marhuakujka. Ka tanimu, nochi jatsiska para chikuanderani ísï eska Gueasi. ¿A no eskachi uánikua ambe jorhenguarhisïnga Bibliani jingoni?

2 Reyes 5:1-27.



Kurhamarhikuecha

  • Uátsï dibujurhu anapu, ¿ambe arhixaki uarhitini?
  • ¿Néski uarhiti dibujurhu anapu, ka uátsï andisï chenemba jaki?
  • ¿Eliseu ambe arhisïni imeri jarhuajpirini eska arhiaka Naamanini, ka Naamani andisï ikiajki?
  • ¿Ambe úkuarhisïni enga Naamani kurhajchajka imeri jarhuajpirichani?
  • ¿Eliseu andisï no jiókuarhijki Naamaniri intsïmperakuani, peru ambe úsïni Gueasi?
  • ¿Ambe úkuarhinchasïni Gueasi, ka ambechi jorhenguarhisïni inderi ambe?

Máteru kurhamarhikuecha

  • Arhinta 2 Reyes 5:1-27.

    Uátsïri ejemplu, ¿néna uá uinhaperantani tumbichani? (2 Rey. 5:3; Sal. 8:2; 148:12, 13.)

    ¿Andisï sési jaki para Naamaniri ejempluni miántani engajtsïni nema jarhuatani jauaka Bibliani jingoni? (2 Rey. 5:15; Ebr. 12:5, 6; Sant. 4:6.)

    ¿Ambechi jorhenguarhisïni engachi exejka naespi Eliseu ka naespi Gueasi? (2 Rey. 5:9, 10, 14-16, 20; Mat. 10:8; Uku. 5:1-5; 2 Kor. 2:17.)