Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 67: Jeosafati mintsikasïndi Jeobani

Uandantskua 67: Jeosafati mintsikasïndi Jeobani

¿MÍTISKIRI néskiksï i achaticha ka ambeksï úxaki? Niraxatiksï uarhipeni, ka indecha engaksï orhepani nirani jaka, pirepaxatiksï. Jamberiri uandajka: ‘¿Indecha engaksï pirepani jaka, andiksïsï no paani jaki espadechani ni lansechani paraksï uarhipeni?’. Ju exeni andi.

Israelitechaksï niraxati uarhipeni

Jeosafati juramukusïndi tsimani tribu Israeli anapuechani. Ka indeni jurhiatikuecha jimbo irekasïndi engaksï Akabi ka Jesabeli juramukuani jarhajka 10 tribu norti anapuechani. Peru Jeosafati ambakiti juramutisti ka ístu ambakitispti imeri tátemba Asa. Ísï jimbo, suri anapu kʼuiripuecha engaksï tsimani tribueri anapueka, uánikua uéxurhinksï sési irekasïndi.

Peru úkuarhisïndi ambe ma enga újka eska kʼuiripuecha chéaka. Uandakua páricha máru, arhisïndiksï Jeosafatini: ‘Kʼéri ma ejersitu jurhaxati paisi Moabi, Amoni, ka Seiri juáta anapuecha paraksï uarhiperani tʼungini jingoni’. Uánikua israelitecha, Jerusaleniksï tánguarhintasïndi paraksï jarhuajperakua kurhakuni Jeobani. Nirasïndiksï templurhu ka jima Jeosafati kómarhisïndi: ‘O juchari Tata Diosï Jeoba, no mítiska ambe úni. Nochi ambe ma uáka úkuni, ini xáni kʼéri ejersituni. Tʼujtsïni jarhuata’.

Jeoba sési exesïndi i ambe ka axasïndi nemani para arhini iretani: ‘Uarhiperakua no cháristi sino Tata Diosïri. Chájtsï no uarhipeaka. Chájtsï ísku jauaka ka exeakajtsï na engaksïni Jeoba kuájpintaaka’.

Ísï jimbo, pauandikua Jeosafati arhisïndi iretani: ‘¡Mintsika je Jeobani!’. Tátsekua úsïndi eska sondaduecheri orhepatini pirericha máru niuaka, ka engaksï i nirani jarhajkia pirekuparini Jeobani. ¿Mítiskiri ambe úkuarhisïni engaksï niárani jarhajkia jima engaksï uarhiperaaka? Jeoba úsïndi eska ima sondaduecha engaksï uékajka íchani jingoni uarhiperani, uénakaksï uándikperani. ¡Ka engaksï israelitecha niárajkia, iámindu sondaduecha uarhirinksï jarhasïndia!

Jeosafati mímixekua xarhataspti enga ísï mintsikapka Tata Diosïni, ¿no ísïski? Engachi juchajtu ísï uáka, ístuchi mímixetiuaka.

1 Reyes 22:41-53; 2 Crónicas 20:1-30.


Kurhamarhikuecha

  • ¿Néski Jeosafati, ka káni ísï irekaspi?
  • ¿Andiksïsï chéjki israelitecha, ka ambeksï úsïni uánikuecha?
  • ¿Jeoba néna mókuntasïni Jeosafatiri kómarhikuani?
  • ¿Ambe úsïni Jeoba eska úkuarhiaka ante de uénanksï uarhiperani?
  • ¿Ambechi jorhenguarhisïni Jeosafatiri ambe?

Máteru kurhamarhikuecha

  • Arhinta 2 Crónicas 20:1-30.

    ¿Jeosafati néna xarhataski ambe engaksï jatsika para úni imecha engaksï Jeobani marhuakujka enga nema uékaka ambe ma úkuani? (2 Cró. 20:12; Sal. 25:15; 62:1.)

    Jeoba méntkisï úrasti nemani para arhini imeri iretani ambe enga úpiringa, ¿iásï néni úraxaki? (2 Cró. 20:14, 15; Mat. 24:45-47; Juanu 15:15.)

    Enga Jeoba uénaaka “uarhiperani imani kʼéri jurhiatikua jimbo”, ¿nénachi májkueni jaua eska Jeosafati? (2 Cró. 20:15, 17; 32:8; Jaŋ. 16:14, 16.)

    Májkueni eska lebitecha, ¿nénaksï jarhuajpexaki prekursoricha ka misioneruecha, eianhpikuarhu iámindu parhakpinirhu? (2 Cró. 20:19, 21; Rom. 10:13-15; 2 Tim. 4:2.)