Exeni ambe enga jataka

Índisi jimbo nirani

Jeobaeri testiguecha

Erakuni idiomani Purépecha

Uandantskua 63: Salomoni juramuti jánhasti ma

Uandantskua 63: Salomoni juramuti jánhasti ma

SALOMONI tumbijku máesïndi enga uénajka juramuni. Kánikua uékasïndi Jeobani, ka úsïndi iámu ambe enga Dabidi arhipka. Jeoba jaiapanhintasïndi Salomonini, jimbosï ma chúrikua tsánharhikua ma jimbo arhijti: ‘Salomoni, ¿amberi uékasïni eskakini íntskuaka?’.

Salomoni ísï mókukusïndi: ‘Jeoba, juchiti Tata Diosï, ji jukari sapichueska, ka no mítiska néna juramuni. Ísï jimbo, íntskurini jánhaskua para úni sési juramukuni chíti iretani’.

Jeoba sési exesïndi ambe enga Salomoni kurhakujka. Jimbosï arhijti: ‘Jimbokari no kurhajkuarhiska jatsikuarhekua ka ni ióni irekakua, sino jánhaskakua, íntskuakakini kánikua jánhaskua enga no ma kʼuiripu jatsini jaka iásï jamberi. Ka ístu, íntskuakakini imani ambe engari no kurhajkuarhika, jo, íntskuakakini jatsikuarhekua ka iauani jamberiri mítinhaka’.

Tátsekua, jurhasïndiksï Salomonini jingoni tsimani uarhiticha engaksï arhijperakua ma jatsika. Ma uandasïndi: ‘Jucha májku kʼumanchikuarhuchi irekaskaʼ. ‘Ji sapini ma kánguarhiska, ka tsimani jurhiatikua tátsekua indejtu kánguarhisti sapi ma. Ma chúrikua, inderi sapi uarhisti. Peru engani ji kʼuíni japka, inderini jima jatsichisti charhaku uarhirini ka pásti juchitini. Engani tsínharhika, exeska charhaku uarhirini ka no juchitispti.ʼ

Enga máteru uarhiti kurhaapka ini ambe uandaspti: ‘¡Nómbe! ¡Charhaku tsípiti juchitisti ka uarhiri inderisti!’. Orheta uarhiti uandasïndi: ‘¡Nómbe! ¡Uarhiri chítisti ka tsípiti juchitisti!’. Ísïksï arhijperani jarhasïndi. ¿Ambe uá Salomoni?

Espada ma pʼitajkuarhisïndi ka uandasïndi: ‘Tsimopurhu ústa je charhakuni, ka terojkachani íntskua je’.

Ima enga amambaepka, uinhachasïndi: ‘¡Nómbe!’. ‘Jimboetakua, asï uándiku je. ¡Indeni íntsku je!’ Peru máteru uarhiti uandasïndi: ‘Nómbe asï nemani íntsku je, tsimopurhu ústa je’.

Juramuti Salomoni sési pentaxati kʼéri uandanhiata ma

Salomoni uandasïndi: ‘¡Asï uándiku je charhakuni! Íntsku je orheta uarhitini. Inde amambesti’. Salomoni mítisïndi eska ima jindeska amamba, jimboka xáni uékasïnga charhakuni enga uékajka eska máteru uarhiti paaka paraksï no uándikuni. Enga kʼuiripu mítijka eska Salomoni sési peentaska ini arhijperakuani, kánikuaksï tsípisïndi, jimbokaksï juramuti jánhastini ma jatsiska.

Enga Salomoni juramuni jarhajka, Tata Diosï újchakurasïndi iretani, úsïndi eska echeri kánikua trigu, sebada, ubasï, jigusï ka máteru akua ambe íntspiaka. Kʼuiripuechaksï sési xukuparhasïndi ka ambakiti kʼumanchikuechani jimboksï irekasïndi. Iáminduechaksï ambakiti ambe jatsikuarhesïndi.

1 Reyes 3:3-28; 4:29-34.



Kurhamarhikuecha

  • ¿Jeoba ambe kurhamarhisïni Salomonini, ka i néna mókukusïni?
  • Jimboka Jeoba jeiapanhintasïnga ambe enga Salomoni kurhakujka, ¿ambe aiakusïni?
  • ¿Ambeksï arhijperata jatsispi tsimani uarhiticha engaksï nípka Salomonini exeni?
  • Eska na xarharajka dibujurhu, ¿néna sési pentasïni Salomoni imani arhijperakuani?
  • ¿Nénaespi Salomoniri juramukua ka andi?

Máteru kurhamarhikuecha

  • Arhinta 1 Reyes 3:3-28.

    Imecha engaksï kóntperatechani intsïnhajka Jeobaeri kúnguarhikuarhu, ¿ambeksï jorhenguarhisïni Salomoniri uandakuechani jimbo engaksï 1 Reyes 3:7 jimbo jaka? (Sal. 119:105; Pro. 3:5, 6.)

    ¿Andisï Salomoniri kómarhikua jinde ambakiti ejemplu ma, parachi mítini ambechi jatsiski para kurhajkuarhini kómarhikuarhu? (1 Rey. 3:9, 11; Pro. 30:8, 9; 1 Juanu 5:14.)

    Na enga Salomoni sési pentapka arhijperakuani engaksï tsimani uarhiticha jatsipka, ¿ambejtsïni mintsikakua íntskusïni na enga juramuaka Kʼéri Salomoni, Jesukristu? (1 Rey. 3:28; Isa. 9:6, 7; 11:2-4.)

  • Arhinta 1 Reyes 4:29-34.

    ¿Jeoba néna mókukuspi Salomonini, enga ima kurhakupka ambakiti mintsita ma? (1 Rey. 4:29.)

    Uánikua kʼuiripuechaksï jánguarhintaspti nirani kurhajchani Salomonini jimboka kánikua jánhaskatispka, ¿jiáni nénachi jatsiski para exeni Bibliaeri jorhenguarhikuani? (1 Rey. 4:29, 34; Juanu 17:3; 2 Tim. 3:16.)