Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 53: Ambe enga Jefte eiatspijka

Uandantskua 53: Ambe enga Jefte eiatspijka
Jefteri uátsï

¿AIATSPISKIRI ménisï ambe ma, engakini tátsekua úkua jukachipka íntspini? I achati enga dibujurhu jaka i ambe úkuarhinchasti, ísï jimbosï kómu jati. I Jeftesti Israeli anapu juesi ma enga no sáni chéjka.

Jefte indeni jurhiatikuechani jimbo irekasïndi engaksï israelitecha nóteru kómarhijkia Jeobani. Ménderuksï no sési jásï ambe úxatiia. Ísï jimbo, Jeoba jurajkusïndi eskaksï amonitecha no sési kaauaka. Israelitechaksï kómarhisïndi Jeobani: ‘Pekaduchi úska tʼungini japarini. ¡Kuájpijtsïni!ʼ.

Jefte ka imeri sondaduecha

Kʼuiripu kómu pʼikuarherasïndi indeni no sési jarhati úkuechani jimbo engaksï uáka. Xarhatasïndiksï ini ambe, engaksï ménderu uénajka Jeobani kómarhini. Ísï jimbo, Jeoba ménderu jarhuaatasïndi.

Ireta, Jeftenksï erakusïndi para uarhiperani amonita no sési úrichani jingoni. Jefte kánikua uékasïndi eska Jeoba jarhuataka uarhiperakuarhu. Ísï jimbosï aiakujti Jeobani: ‘Engarini jarhuataska andani, jíkini imani íntskuaka engarini orheta juuaka kúmantani juchini, engani ji kʼuanhatsintani jauakia uarhiperakuarhu uératiniʼ.

Jeoba sési exesïndi ambe enga Jefte aiakujka ka jarhuatasïndi paraka andaaka uarhiperatani. Enga Jefte kʼuanhatsintajka, ¿mítiskiri néski enga orheta jurhajka kúmantani? Jo, imeri máechakuajku uátsï enga kánguarhijka. ‘¡Ai juchiti uátsï!ʼ, ísï uerasïndi Jefte. ‘¡Xáni engani no sési pʼikuarherani jaka! Peruni aiakuskia Tata Diosïni, ka iásï jatsiska para ísï úni na engani aiakuka Jeobani.ʼ

Enga Jefteri uátsï mítijka ambe enga imeri tátemba eiatspika, ístu orheta kómu pʼikuarherasïndi, jimboka jatsiska para jurajkuni imeri tátembani ka imeri amiguechani. Peru na enga xáni irekaka, marhuakuni jauati Jeobani tabernakulurhu jini Silo. Ísï jimbo, arhisïndi Jefteni: ‘Engari ísï aiakukia Jeobani, jatsiskari para ísï úniʼ.

Ísï jimbo, no ióni jimbo Jefteri uátsï nirasïndi jini Silo, ka jima marhuakusïndi Jeobani tabernakulurhu asta enga uarhijka. Israeli anapu uátsïcha nirasïndiksï mándani uéxurhini tʼámu jurhiatikua pʼorhembini ka sésiksï nitamakuarhisïrendi. Kʼuiripu kánikua uékasïndi Jefteri uátsïni, jimboka ima sési marhuakusïnga Tata Diosï Jeobani.

Jueces 10:6-18; 11:1-40.



Kurhamarhikuecha

  • ¿Néski Jefte ka káni irekaspi?
  • ¿Jefte ambe aiakusïni Jeobani?
  • Enga Jefte andajkia amonitechani, ¿andisï kómu pʼikuarherajki enga kʼuanhatsintajkia chenemba?
  • ¿Ambe uandasïni Jefteri uátsï enga mítijka ambe enga aiatspipka imeri tátemba?
  • ¿Andisï kʼuiripu xáni uékajki Jefteri uátsïni?

Máteru kurhamarhikuecha

  • Arhinta Jueces 10:6-18.

    ¿Ambejtsïni arhistachesïni israelitecheri nitamakua engaksï ísï jurajkupka Jeobani? (Jue. 10:6, 15, 16; Rom. 15:4; Jaŋ. 2:10.)

  • Arhinta Jueces 11:1-11, 29-40.

    ¿Nénachi mítiski eska, enga Jefte íntspepiringa imeri uátsïni komueska “kéjtsïtakua kurhirakata”, no arhikuekasïrenga eska uándikupiringa para kéjtsïtakua ma úni? (Jue. 11:31; Lev. 16:24; Deu. 18:10, 12.)

    ¿Jefte néna íntspespi imeri uátsïni komueska kéjtsïtakua ma?

    ¿Ambejtsïni jorhendasïni ambe enga úpka Jefte indeni aiatsperakuani jingoni enga úkupka Jeobani? (Jue. 11:35, 39; Ecl. 5:4, 5; Mat. 16:24, NM.)

    ¿Tumbicha ka uátsïcha nénaksï uá Jefteri uátsïri ejempluni chúngumani engaksï uékaka sánderu tiempu úrani para marhuakuni Jeobani? (Jue. 11:36; Mat. 6:33; Fili. 3:8.)