Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 52: Gedeoni ka imeri tresientu sondaduecha

Uandantskua 52: Gedeoni ka imeri tresientu sondaduecha

¿EXEXAKIRI ambe úkuarhixaki ixú? Íksï Israeli anapu sondaduestiksï. Indecha engaksï kʼutitseni jaka, itsïmaxatiksï. Juesi Gedeoni jimintku ma ladu jarhasti. Ka exeaxati nénaksï itsïmaxaki.

Sési exe na engaksï i sondaduecha mámaru jásï itsïmani jaka. Máruksï iámu kʼutitsesïndi. Peru ma jájki jimbo itsïmaxati para úni eraani ambe úkuarhixaki iápurhu ísï. I ambe jukaparhakuesti, jimboka Jeoba arhiska Gedeonini eska imechantku erakuauaka engaksï itsïmani jauaka ka eraani jarhanksï iápurhu ísï. Ka máteruechaksï jatsisti para níntani imecheri chenemba. Ju exeni andi.

Israelitechaksï ménderu uánikua uandanhiatechanksï jatsiasïndi jimbokaksï no kurhajchaska Jeobani. Madianitechaksï sánderu uinhapiti úkuarhistia eskaksï israelitecha ka no sésiksï kaasïndi. Ísï jimbo, israelitechaksï jarhuajperata kurhakusïndi Jeobani, ka Jeoba kurhaasïndi imecheri kómarhikuechani.

Jeoba arhisïndi Gedeonini eska tánaaka ma ejersituni, ísï jimbo, Gedeoni tántasïndi 32,000 sondaduechani. Peru engaksï uékani jaka uarhiperani Israelini jingoni, jindestiksï 135,000. Peru Jeoba arhisïndi Gedeonini: ‘Jukariri uánikua sondaduechaniri jatsiaskaʼ. ¿Andisï ísï arhijki?

Jindesti jimboka, engaksï israelitecha andapiringa uarhiperakuani, úpirindiksï eratsini eskaksï imecheri uinhapikuani jimbo andaska, ka eskaksï no uétarhinchasïrenga Jeobaeri jarhuajperatani. Jimbosï Jeoba arhijti Gedeonini: ‘Arhia iáminduechani engaksï chéjka eskaksï kʼuanhatsentaka chenembaʼ. Enga Gedeoni ísï újka, 22,000 sondaduechaksï níntasïndi. Ísï jimbo, 10,000 sondaduechajkuksï pakarasïndi paraksï nirani 135,000 sondaduechani jingoni uarhiperani.

Gedeoni tsʼéjkuaxati imeri sondaduechani

Peru, ¡kurha! Jeoba uandasïndi: ‘Útasïri jukari jatsiaskaʼ. Ísï jimbo, Jeoba arhisïndi Gedeonini eska uáka eska sondaduecha ini itsïni jimboksï itsïmaka ka eska axantauaka iámindu imechani engaksï iámu kʼutitseaka. Jeoba aiakusïndi: ‘Ji uáka eskari andaka indeni 300 sondaduechani jingontku engaksï itsïmapka iápurhu ísï eraapariniʼ.

Niárasïndi jurhiatikua paraksï uarhiperani. Gedeoni, imeri 300 sondaduechani tanipurhu arhukuasïndi. Mándani sondaduni íntskusïndi sïuangua ma, ka porhechi ma enga incharini ambe ma tixarani jarhajka. Enga sáno terojkani chúrikuejkia, iáminduechaksï uirhipandasïndi jima engaksï sondadu madianitechaksï kʼuíni jarhajka. Jiájkani, iáminduechaksï májku tiempu jimbo, kústasïndiksï sïuanguechani ka kakaasïndiksï porhechichani ka uinhachasïndiksï: ‘¡Jeobaeri espada ka Gedeoniri!ʼ. Engaksï tsínharhijka Madiani anapu sondaduecha, nóteruksï jánhaskasïndia ambe úni ka chésïndiksï. Iáminduechaksï sïpakuarhisïndi, ka israelitechaksï andasïndi.

Jueces, kapituluecha 6 asta 8 jamberi.



Kurhamarhikuecha

  • ¿Ambe uandanhiataksï jatsiski israelitecha, ka andi?
  • ¿Jeoba andisï arhijki Gedeonini eska jukari sondaduechani jatsiaska?
  • ¿Namuni sondaduechaksï pakarasïni enga Gedeoni axaantajkia imechani engaksï chéjka?
  • Eska na xarharajka dibujurhu, ¿néna úski Jeoba eska Gedeoni 300 sondaduechani jingoni pakarapiringa?
  • ¿Gedeoni ambe arhiasïni eskaksï uáka imeri 300 sondaduecha, ka Israeli néna andasïni uarhiperakuani?

Máteru kurhamarhikuecha

  • Arhinta Jueces 6:36-40.

    ¿Ambe úspi Gedeoni para seguru jarhani ambesï uékaeni Jeoba eska úpiringa?

    ¿Iásï nénachi uá mítini ambe uékasïni Jeoba eska úkuarhiaka? (Pro. 2:3-6; Mat. 7:7-11; 2 Tim. 3:16, 17.)

  • Arhinta Jueces 7:1-25.

    ¿Ambechi jorhenguarhisïni 300 sondaduecheri engaksï iápurhu ísï eraaparini itsïmani japka, ka máteruechani jingoni engaksï no májkueni úpka? (Jue. 7:3, 6; Rom. 13:11, 12; Efe. 5:15-17.)

    Májkueni eska 300 sondaduecha engaksï jorhenguarhipka Gedeonini exeparini, ¿nénachi jorhenguarhisïni juchajtu exeparini Gedeoni Kʼéri, Jesukristuni? (Jue. 7:17; Mat. 11:29, 30; 28:19, 20; 1 Ped. 2:21.)

    ¿Nénajtsïni jarhuatasïni Jueces 7:21 parachi uékani marhuani nani uéjki engajtsïni Jeobaeri kúnguarhikua axaaka? (1 Kor. 4:2; 12:14-18; Sant. 4:10.)

  • Arhinta Jueces 8:1-3.

    Engachi uékaka sési pájperantani ma erachini jingoni, ¿ambechi jorhenguarhisïni ambe enga Gedeoni úpka para sési pájperantani efraimitechani jingoni? (Pro. 15:1; Mat. 5:23, 24; Luk. 9:48.)