Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 51: Ruti ka Noemi

Uandantskua 51: Ruti ka Noemi

BIBLIARHU, exentakari libru ma enga arhinhajka Ruti. Ma familieri uandantskuesti enga jiáni ísï irekapka engaksï juesicha japka Israeli. Ruti, uarhiti sapichu máesti Moabi anapu, no israelitaesti, ísï jimbo, no miiukuarhisïndi Tata Diosïri nasionini jingoni. Peru enga Ruti niárajka mítini Tata Diosï jurhimbiti Jeobani, kánikua uékasïndi. Noemi uarhiti máesti enga jatirikia ka enga jarhuatajka Rutini paraka mítiaka Jeobani.

Noemi israelitaesti. Ima, imeri achati ka imeri tsimani uájpecha mótsisptiksï Moabi, jiáni enga nóteru kánikua tʼirekua japkia Israeli. Ma jurhiatikua Noemiri uámba uarhisïndi. Tátsekua, Noemiri uájpechaksï tembuchasïndi tsimani moabitechani jingoni engaksï arhinhaenga Ruti ka Orpa. Peru 10 uéxurhini ísï tátsekua, Noemiri uájpechaksï uarhisïndi. ¡Kánikuaksï kómu pʼikuarherapti i ambe jimbo! Iásï, ¿ambe úpirinia Noemi?

Ma jurhiatikua Noemi eratsisïndi kʼuanhatsintani imeri iretarhu, iauani ísï. Ruti ka Orpa nóksï uékasïndi jurajkuni Noemini, ka nirasïndiksï imani jingoni. Peru engaksï nirani jarhajkia, Noemi arhiasïndi tarhambechani: ‘Kʼuanhatsi je nani engajtsï anapueka ka chári nándichani jingoni pakara jeʼ.

Noemi putinharhikuasïndi ka arhiasïndi eskaksï níntaaka. Imecha uénasïndi uerani, jimbokaksï kánikua uékasïnga Noemini. Uandasïndiksï: ‘¡Nómbe! Jucha niuaka tʼungini jingoni chíti iretarhuʼ. Peru Noemi mókukuasïndi: ‘Juchiti uátsïcha, chájtsï jatsiska para kʼuanhatsintani. Sánderuksïni sési nicheati engajtsï chári parientechani jingoni jauakaʼ. Jiájkani, Orpa kʼuanhatsintasïndi imeri iretarhu. Peru Ruti nómbe.

Noemi exesïndi Rutini ka arhisïndi: ‘Orpa nirastia. Ni tʼujtu imani jingoniʼ. Peru Ruti mókukusïndi: ‘¡Asïrini jáma arhini eskakini jurajkuaka! Jurajkuni nirani tʼungini jingoni. Nani engari tʼu niraska, jíjtuni niuaka, ka nani engari tʼu irekaka, jíjtuni jima irekaka. Chíti ireta juchiti ireteuati ka chíti Tata Diosï juchiti Tata Diosïuati. Nani engari tʼu uarhiaka, jíjtuni jima uarhiaka, ka jimajtsïni jatsintatiʼ. Enga Ruti i ambe arhijka, Noemi nóteru ma ambe arhisïndia.

Íksï tsimani uarhiticha niárasïndiksï Israeli. Ka jimaksï pakarasïndi irekani. Ruti jirejiresï uénasïndi kampuecharhu ísï ánchikuarhini, jimboka imani jurhiatikuechani jimbo sebada uarhotanhasïrenga. Achati ma enga arhinhaenga Boasi jurajkusïndi eska Ruti imeri kampuecharhu pʼikuntaka sebada. ¿Mítiskiri néspi Boasiri amamba? Raabispti, ireta Jeriko anapu.

Ma jurhiatikua Boasi arhisïndi Rutini: ‘Uánikua ambe kurhaska chíti ambe, na engari xáni sési kámajka Noemini. Mítiska eskari jurajkuska chíti nandini ka chíti tátini ka chíti paisini ka jurhaskari irekani ireta ma jimbo engari no mítipka. ¡Eskakini Jeoba kánikua újchakuraaka!’.

Ruti mókukusïndi: ‘Kánikuarini sési kámasïnga tata. Sésirini pʼikuastaska indeni ambakiti uandakuechani jimbo engarini arhikaʼ. Boasi sési exesïndi Rutini, ka no ióni jimbo tembuperasïndiksï. ¡I ambe sési pʼikuastasïndi Noemini! Peru sánderu sési pʼikuarherasïndi Noemi, engaksï Ruti ka Boasi kánguarhijka Obedini. Tátsekua Dabidi niárasti jindeni Obediri nimakua; tátsekuachi jorhenguarhini jauaka Dabidiri ambe.

Ruti ka Noemi

Rutiri libru.



Kurhamarhikuecha

  • ¿Noemi andisï nípi Moabi irekani?
  • ¿Néskiksï Ruti ka Orpa?
  • ¿Ruti ka Orpa ambeksï arhisïni Noemini enga i arhiajka eskaksï kʼuanhatsintaaka chenemba?
  • ¿Néski Boasi, ka néna jarhuatasïni Rutini ka Noemini?
  • ¿Néna arhinhasïni Boasiri ka Rutiri uájpa, ka andichisï jatsi para miáni jarhani?

Máteru kurhamarhikuecha

  • Arhinta Rut 1:1-17.

    ¿Ruti ambe arhispi Noemini enga jimbo xarhatakupka eska kánikua uékasïrenga? (Rut 1:16, 17.)

    ¿Nénaksï xarhatakusïni “máteru karichicha” imechani engaksï auandarhu niuaka, eskaksï májkueni eratsisïnga eska Ruti? (Juanu 10:16; Zac. 8:23.)

  • Arhinta Rut 2:1-23.

    ¿Andisï Ruti, ambakiti ejemplu ma íntskuajki iásï anapu uátsïchani? (Rut 2:17, 18; Pro. 23:22; 31:15.)

  • Arhinta Rut 3:5-13.

    ¿Na exespi Boasi enga Ruti uékapka imani jingoni uambuchani ka no sánderu sapichu ma jingoni?

    ¿Ambejtsïni jorhendasïni Rutiri jángua, ambakiti uékperakueri ambe? (Rut 3:10; 1 Kor. 13:4, 5.)

  • Arhinta Rut 4:7-17.

    ¿Nénaksï uá iásï anapu erachicha Boasiri ejempluni chúngumani? (Rut 4:9, 10; 1 Tim. 3:1, 12, 13; 5:8.)