Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 41: Akuitsi kobreri

Uandantskua 41: Akuitsi kobreri
Moisesi ka akuitsi kobreri

¿XARHARASÏNI eska tsípiti jarhaska akuitsi enga chkarirhu jaka? No tsípiti jarhasti. Kobreristi. Jeoba arhispti Moisesini eska chkarirhu tarhatapiringa paraka kʼuiripu úpiringa exeni ka no uarhini. Peruksï máteru akuitsicha engaksï kétsekua jaka, indeksï kʼóru tsípiti jarhasti. Katsarhiastiksï kʼuiripuechani ka pʼamenchatarhaastiksï. ¿Mítiskiri andi?

Jindesti jimbokaksï israelitecha no sési uandaspka Tata Diosïri ambe ka Moisesiri ambe. Arhisïndiksï: ‘¿Andijtsïnisï petanta Ejiptu uératini parachi ini desiertuni jimbo uarhini? Ixú no jarhasti tʼirekua ka ni itsï. Ka nóteruchi uékasïngia mana jingoni tʼireni’.

Peru mana ambakiti tʼirekua máesti. Jeoba íntskuasti milagru ma jimbo. Ka ístu milagru ma jimbo íntskuasti itsï. Peru kʼuiripu no jaiapanhintasïndi inde ambe enga Tata Diosï úni jaka imechani jimbo. Jimbosï Jeoba axaajti akuitsichani engaksï uándikpejka para kastigariani israelitechani. Akuitsichaksï katsarhiasïndi ka uánikuaksï uarhisïndi.

Akuitsichaksï katsarhiasïndi israelitechani

Jiájkani kʼóru kʼuiripu jurhasïndi Moisesini jingoni ka arhisïndiksï: ‘Jucha pekariska engachi ísï no sési uandaka Jeobaeri ambe ka chíti ambe. Kómarhi Jeobani parakajtsïni kénditachiauaka ini akuitsichani’.

Ísï jimbo, Moisesi kómarhijpikuasïndi. Ka Jeoba arhisïndi Moisesini eska uáka ini akuitsi kobrerini. Arhisïndi eska chkari ma jimbo jatsiaka, ka iámindu imani enga akuitsi ma katsarhiaka, jatsisti para indeni exeni. Moisesi ísï úsïndi eska Tata Diosï na arhijka. Ka imecha engaksï akuitsicha katsarhiajka, exesïndiksï akuitsi kobrerini ka ambakintasïndiksï.

Iri ambe, úsïngachi jorhenguarhini ma ambe. Iáminduchi ísï jarhaska eska israelitecha enga akuitsi katsarhiaka. Exe, iámindu kʼuiripu tʼarhepisïndi, pʼamenchasïndi ka uarhisïndi. I ambe úkuarhesïndi jimboka orheta anapu achati ka uarhiti, Adani ka Eba, nóksï kurhajchaspka Jeobani, ka iámindu jucha imecheri uájpeska. Peru Jeoba xanharu ma mítasïndi parachi úni irekani para méntkisï.

Jeoba axaspti imeri Uájpa Jesukristuni ixú Echerirhu. Jesusi tirhipanhasti chkari ma jimbo, jimbokaksï uánikua eratsisïrenga eska no sési úrispka. Peru Jeoba íntspespti Jesusini parajtsïni euajpintani. Engachi exeaka imani, engachi chúxapaaka, uákachi irekani para méntkisï. Peruchi tátsekua jorhenguarhini jauaka sánderu iri ambe.

Números 21:4-9; Juanu 3:14, 15.



Kurhamarhikuecha

  • Dibujurhu, ¿ambe jarhaski chkarirhu ka andisï Jeoba arhipi Moisesini eska jima peerapiringa?
  • ¿Néna xarhatasïni kʼuiripu eska no jeiapanhintasïnga ambe enga Jeoba úka imechani jimbo?
  • ¿Kʼuiripu ambe kurhakusïni Moisesini enga Jeoba axaajka akuitsi uándikpitichani para kastigariani?
  • ¿Andisï Jeoba arhijki Moisesini eska uáka akuitsi kobrerini?
  • ¿Ambejtsïni jorhendasïni i uandantskua?

Máteru kurhamarhikuecha

  • Arhinta Números 21:4-9.

    ¿Andichisï no jatsi para ísïni eska israelitecha engaksï no jukaparharapka ambe enga Jeoba íntsani japka? (Núm. 21:5, 6; Rom. 2:4.)

    Sientu jimbo uéxurhini tátsekua, ¿nénaksï úraspi israelitecha akuitsi kobrerini, ka ambe úspi juramuti Esekiasi? (Núm. 21:9; 2 Rey. 18:1-4.)

  • Arhinta Juanu 3:14, 15.

    ¿Néna xarhataspi akuitsi enga tirhipanhapka chkari ma jimbo, Jesukristueri uarhikuani? (Gal. 3:13; 1 Ped. 2:24.)