Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 55: Sapi ma marhuakusïndi Tata Diosïni

Uandantskua 55: Sapi ma marhuakusïndi Tata Diosïni

SÉSI jáxesti inde sapi, ¿a no? Samueli arhinhasïndi. Ka achati enga pʼájtsïkuni jaka, Elisti kʼéri saserdoti Israeli anapu. Ka indecha engaksï juákuni jaka Elini ini sapini, jindestiksï táti jemba Elkana ka amamba Ana.

Samueli pánhasïndi kʼéri saserdoti Eli jingoni

Samueli tʼámu o iúmu uéxurhinisï jatiristi. Peru ixú Jeobaeri tabernakulurhu irekaati Elini jingoni ka máteru saserdotichani jingoni. Elkana ka Ana, ¿andisïksï juápi nemani xáni sapichuni eska Samueli para marhuakuni Jeobani tabernakulurhu? Ju exeni.

Máru uéxurhini antesi, Ana kómu pʼikuarherasïrendi. Jimboka no úsïrenga kánguarhini sapini ma, ka kánikua tsitisïrendi kánguarhini ma. Ísï jimbo, ma jurhiatikua enga Jeobaeri tabernakulurhu japka, kómarhikua ma úspti: ‘¡Ai, Jeoba, asïrini mirikurhi! Engarini kóndiska uájpa ma, aiachesïngakini eskakini tʼungini íntskuaka, parakakini marhuachiaka na enga xáni ióni irekaakaʼ.

Jeoba mókukuspti Anaeri kómarhikuani, ka máru kutsïcha tátsekua kánguarhisïndi Samuelini. Ana kánikua uékasïrendi imeri uájpani ka uénasti arhistakuni Jeobaeri ambe enga útasï charhaku máepka. Arhisti imeri achatini: ‘Enga Samueli sánderu kʼéakia ka nóterurini xáni uétarhinchania, tabernakulurhu paaka para jima marhuakuni Jeobaniʼ.

I ambechisï exejka dibujurhu eskaksï úxaka Ana ka Elkana. Ka jimbokaksï imeri táticha sésiksï jorhendaspka Samuelini, Samueli kánikua sési pʼikuarherasïndi jimboka marhuakuaka Jeobani tabernakulurhu. Mándani uéxurhini, imeri tátembechaksï jurhasïndi kómarhikua úni tabernakulurhu ka pʼorhembisïndiksï uájpani. Ka mándani uéxurhini Ana juákusïndi Samuelini xukuparhakua jimbanhi ma enga no manga jukarijka.

Nitamasïndiksï máru uéxurhinicha ka Samueli útasï marhuani jarhasïndi Jeobaeri tabernakulurhu, ka kánikua tsíperasïndi Jeobani ka ístu iretani. Peru Ofni ka Fineasi, kʼéri saserdoti Eli uájpecha, nóksï ambakiti kʼuiripuesti. Imechaksï uánikua no sési jásï ambe úsïndi, ka ístuksï úsïndi eskaksï máteruechajtu no kurhajchaka Tata Diosïni. Eli, jatsispti para úni eskaksï nóteru saserdotepiringia, peru no ísï úsïndi.

I tumbi Samueli no jurajkusïndi eska ima no sési jásï ambe enga úkuarhini japka tabernakulurhu, uáka eska nóteru marhuakuaka Jeobani. Peru iónistia enga Jeoba nóteru nemani uandajpajkia, jimbokaksï namunitkueska engaksï uékajka Jeobani. Enga Samueli sánderu kʼéjkia, i ambe úkuarhisïndi.

Samueli kʼuíni jarhasïndi tabernakulurhu enga uandakua ma tsínharhitajka. Ima mókukusïndi: ‘Ixú jarhaskaʼ. Ka jauarasïndi ka uiriipasïndi jima enga Eli jaka, ka arhisïndi: ‘Uandajpaskarini, ka ixú jarhaskaʼ.

Peru Eli arhisïndi: ‘Ji nókini uandajpaska, ni apondintaniʼ. Ísï jimbo Samueli ménderu nirasïndi apondintani.

Jiájkani ménderu kurhakuarhesïndi uandakua: ‘¡Samueli!ʼ. Ísï jimbo Samueli jauarasïndi ka ménderu nirasïndi Elini jingoni. Ka arhisïndi: ‘Uandajpaskarini, ka ixú jarhaskaʼ. Peru Eli arhisïndi: ‘Nókini uandajpaska iju. Ni ménderu apondintaniʼ. Ísï jimbo, Samueli ménderu apondintasïndi.

Tanimu úni jámani, uandakua ménderu uandajpasïndi: ‘¡Samueli!ʼ. Ísï jimbo Samueli jauarasïndi ka uiriipasïndi Elini jingoni. Ka uandasïndi: ‘Ixú jarhaska; iásïreni kʼóru tʼu uandajpaskaʼ. Iásï kʼóru Eli mítisïndi eska Jeobaeska enga uandajpajka. Arhisïndi Samuelini: ‘Apondinta ménderu, ka engakini ménderu uandajpaska, jatsiskari para arhini: “Uanda, Jeoba, jimboka chíti jántspiri kurhaaxaka”.ʼ

Samueli i ambe uandasïndi enga Jeoba ménderu uandajpajka. Jeoba arhisïndi Samuelini eska kastigariuaka Elini ka imeri uájpechani. Tátsekua, Ofni ka Fineasi uarhisïndiksï engaksï uarhiperani jarhajka filisteuechani jingoni, ka enga Eli mítijka ambe enga úkuarhika, kuarhatsesïndi ka kuarhajcherasïndi ka jima uarhisïndi. Ísï úkuarhisïndi ambe enga Jeoba uandapka.

Samueli kʼésïndi, ka ima niárasïndi jindeni ultimu juesi Israeliri. Enga tʼarhepijkia, ireta arhisïndi: ‘Eraku juramutini ma parajtsïni juramuchiniʼ. Samueli no uékasïndi, jimboka Jeoba jindeska imecheri juramuti. Peru Jeoba arhisïndi eska kurhajchaka iretani.

1 Samuel 1:1-28; 2:11-36; 4:16-18; 8:4-9.



Kurhamarhikuecha

  • ¿Néna arhinhasïni sapi enga dibujurhu jaka, ka néskiksï máteruecha?
  • Ma jurhiatikua enga Ana tabernakulurhu jarhajka, ¿ambe kómarhisïni Jeobani, ka Jeoba néna mókukusïni?
  • ¿Na xáni jatirisïni Samueli engaksï pájka paraka Jeobaeri tabernakulurhu marhuauaka, ka ambe úkusïni amamba mándani uéxurhini?
  • ¿Nénaksï arhinhasïni Eliri uájpecha, ka náksï jásï kʼuiripueski?
  • ¿Jeoba néna uandajpasïni Samuelini, ka ambe aiangusïni?
  • Enga Samueli kʼéjkia, ¿ambe niárasïni jindeni, ka ambe úkuarhisïni enga tʼarhepijkia?

Máteru kurhamarhikuecha

  • Arhinta 1 Samuel 1:1-28.

    ¿Elkana ambe ambakiti ejemplu íntskuasïni tátichani enga orhejtsïkupka imeri familiani Jeobaeri kómarhikuarhu? (1 Sam. 1:3, 21; Mat. 6:33; Fili. 1:10.)

    ¿Ambejtsïni jorhendasïni ambe enga úpka Ana enga uandanhiata ma jatsipka? (1 Sam. 1:10, 11; Sal. 55:22; Rom. 12:12.)

  • Arhinta 1 Samuel 2:11-36.

    ¿Eli néna sánderu kʼéri ambe exeaspi uájpechani ka eska Jeobani ka ambejtsïni aiangusïni i ambe? (1 Sam. 2:22-24, 27, 29; Deu. 21:18-21; Mat. 10:36, 37.)

  • Arhinta 1 Samuel 4:16-18.

    ¿Ambe tʼámu ambeksï eiangusïni Elini uarhiperakuarhu uératini, ka ambe úkuarhinchasïni enga mítijkia i ambe?

  • Arhinta 1 Samuel 8:4-9.

    ¿Israeli andisï ikiatapi Jeobani, ka ambechi uá para no méni jurajkuni Jeobaeri Juramukuani? (1 Sam. 8:5, 7; Juanu 17:16; Sant. 4:4.)

PARAJTSÏ SÁNDERU MÍTINI

JORHENDAA JE CHÁRI SAPIICHANI

Samueli méntkisï ústi ambe enga Jeoba uékaenga

Samueli méntkisï ústi ambe enga Jeoba uékaenga nájkirukaksï máteruecha no sési uénga. ¿Nénachi uá májkuenini?