Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 54: Achati sánderu uinhapiti

Uandantskua 54: Achati sánderu uinhapiti

¿MÍTISKIRI na enga arhikuarhienga ima achati sánderu uinhapiti enga irekapka ixú? Juesi máespti enga arhinhaenga Sansoni. Ka ini, Jeobasï íntskuendi uinhapikua. Ante de Sansoni andajpenuni, Jeoba arhisïndi imeri amambani: ‘No ióni jimbo kánguarhiakari sapini ma. Inde orhekupaauati israelitechani para kuájpiani filisteuechani jingoniʼ.

Sansoni leoni ma jingoni uarhiperaxati

Filisteuecha, Kanaaniksï irekasti ka no sési úristiksï. Uánikua sondaduechanksï jatsiasti, ka no sésiksï kaasïndi israelitechani. Ma jurhiatikua enga Sansoni niárajka jima engaksï filisteuecha irekajka, kʼéri ma leoni apejpiti uérasïndi ka uékasïndi katsarhini. Peru Sansoni uándikusïndi leonini imeri jájkichani jingontku. Ístu uándikuasïndi sientu jimbo filisteu no sési úrichani.

Tátsekua Sansoni niárasïndi uékani uátsïni ma enga arhinhaenga Dalila. Imaksï engaksï filisteuechani orhejtsïkuajka, aiakusïndiksï Dalilani eskaksï mándani kʼuiripu 1,100 tumina plateriksï íntskuaka, enga ima eianguaska andisï Sansoni xáni uinhapi. Dalila uékasïndi tuminani. No jindesti jurhimbiti amiga Sansoniri ka ni Tata Diosïri iretaeri. Ísï jimbo, méntku úndasïndi kurhamarhini Sansonini andisï xáni uinhapikua jatsi.

Dalila ka Sansoni

Dalila úsïndi eska Sansoni aianguaka andisï ima xáni uinhapikua jatsi. Ima arhisïndi: ‘Nójtsïni méni kuinaxatiʼ. ‘Desdekani andajpenuka, Tata Diosïrini erakusti parani ambakiti marhuari máeni engaksï nasareu arhinhajka. Engajtsïni kuinapiringa, tsïtapiringa juchiti uinhapikuani.ʼ

Enga Dalila kurhajka i ambe, úsïndi eska Sansoni imeri tsikajtakuecharhu kʼuíaka. Ka úsïndi eska achati ma inchaka ka kuinani. Enga Sansoni tsínharhijka, tsïtasïndia imeri uinhapikuani. Jiájkani inchasïndiksï filisteuecha máru ka jupikasïndiksï. Pʼitanharhikuasïndiksï éskuechani ka jántspiriksï úsïndi.

Sansoni kuaskuaxati pilarichani

Ma jurhiatikua, filisteuecha kʼéri kʼuínchikuaksï ma úsïndi paraksï kómarhini imeri diosï Dagonini, ka petasïndiksï Sansonini kʼataperakuarhu uératini paraksï teresmarhuni. Peru Sansoniri jauiri kʼéntasïndia ménderu. Sansoni arhisïndi imani sapini enga jupijkutini páni jaka: ‘Jurajkurini pʼárhiani pilarichani engaksï pʼínguni jaka ini kʼéri kʼumanchikuaniʼ. Jiájkani Sansoni kómarhisïndi Jeobani paraka íntskuaka uinhapikua ka jupikaasïndi pilarichani. Tátsekua, uinhachasïndi: ‘Jurajkurini eskani uarhiaka ixú filisteuechani jingoniʼ. Indeni kʼuínchikuani jimbo 3,000 filisteuechaksï jarhasti, ísï jimbo, enga Sansoni pʼákchakuajka kʼéri kʼumanchikuarhu anapu pilarichani, kʼéri kʼumanchikua kuarhatsesïndi ka uándikuasïndi iámindu i kʼuiripu no sési úrichani.

Jueces, kapituluecha 13 asta 16 jamberi.



Kurhamarhikuecha

  • ¿Néna arhinhasïreni achati sánderu uinhapiti enga irekapka, ka né íntskuspi uinhapikua?
  • Eska na xarharajka dibujurhu, ¿ma jurhiatikua ambe úspi Sansoni leonini ma jingoni?
  • Dibujurhu, ¿Sansoni ambe aianguxaki Dalilani, ka i ambe andisï újki eskaksï filisteuecha jupikaka?
  • ¿Néna uándikuaspi Sansoni 3,000 filisteuechani ima jurhiatikua enga ima uarhipka?

Máteru kurhamarhikuecha

  • Arhinta Jueces 13:1-14.

    ¿Andisï Manoa ka imeri uarhiti, jindeksï ambakiti ejemplu ma para táticha engaksï kʼuiriperaani jaka uájpechani? (Jue. 13:8; Sal. 127:3; Efe. 6:4.)

  • Arhinta Jueces 14:5-9 ka 15:9-16.

    Uandantskuecha enga Sansoni uándikujki leonini ma, enga katsïkuapka sïndari jimbanhechani máru engaksï jingoni jótapka, ka enga úrapka burrueri penchumikuarhu anapu únini para 1,000 achatichani uándikuani, ¿ambejtsïni jorhendasïni na enga Jeobaeri espiritu santu ánchikuarhijka?

    ¿Nénajtsïni jarhuatasïni iásï espiritu santu? (Jue. 14:6; 15:14; Zac. 4:6; Uku. 4:31.)

  • Arhinta Jueces 16:18-31.

    ¿Néna no sési úkuspi Sansonini, kúnguarhini imechani jingoni enga no jatsipka para kúnguarhini, ka ambejtsïni jorhendasïni i ambe? (Jue. 16:18, 19; 1 Kor. 15:33.)