Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 43: Josue orhejtsïkuti únhasïndi

Uandantskua 43: Josue orhejtsïkuti únhasïndi

MOISESI uékasïndi inchani Kanaani israelitaechani jingoni. Ísï jimbo, uandasïndi: ‘Jeoba, jurajkurini parhikuni iorhekua Jordanirhu, parani úni exeni ambakiti echerini’. Peru Jeoba arhisïndi: ‘¡Pínasku! ¡Asïrini jáma ménderu indeni ambe arhini!’. ¿Mítiskiri andisï Jeoba ísï arhipi?

Imani ambe jimbo enga úkuarhipka jiáni enga Moisesi tsakapuni atapka. Miánta: Moisesi ka Aroni nóksï kʼéri ambe arhispi Jeobani. Nóksï arhispti iretani eska Jeobasï petakuapka itsï tsakapurhu uératini. Jimbosï Jeoba arhiapti eskaksï no inchapiringa Kanaani.

Ísï jimbo, máru kutsïcha tátsekua enga Aroni uarhipka, Jeoba arhisïndi Moisesini: ‘Jua Josueni, ka saserdoti Eleasarirhu orhepatini peera ka ístu ireta jima jauati. Ka iáminduechani japarini, aiangua eska iásï Josue orhekuapauakia’. Moisesi úsïndi eska Jeoba na arhijka, ísï eskari na exejka dibujurhu.

Moisesi uandaxati eska iásï Josue orhejtsïkutiskia

Jiájkani, Jeoba arhisïndi Josueni: ‘Uinhapinta ka asï ché. Orhekuapauakari israelitechani ka incharauakari Kanaani, indeni echerini jimbo engani aiakuaka, ka ji tʼungini jingoni jauaka’.

Tátsekua, Jeoba arhisïndi Moisesini eska karharaka Nebu juátarhu, enga Moabi jaka. Jima uératini, Moisesi úsïndi exeni jiniani sánderu jamberi enga iorhekua Jordani jaka ka exesïndi ambakiti echeri Kanaani anapuni. Jeoba arhisïndi: ‘I jindesti echeri engani aiakuapka Abraaniri uájpechani, Isakiri uájpechani ka Jakobueri uájpechani. Jurajkuskakini parari exeni, peruri no inchaka indeni echerini jimbo’.

Moisesi, Nebu juáta jimbo uarhisïndi. Enga 120 uéxurhini jatiripka. Útasï uinhapispti ka útasï sési uinhanharhisïrendi. Ka ireta kánikua kómu pʼikuarherasïndi ka ístu ióniksï uérasïndi Moisesini jimbo. Peru ístu kánikua sési pʼikuarherasïndi ireta jimboka iásï Josue jindeska imecheri orhejtsïkuti.

Números 27:12-23; Deuteronomio 3:23-29; 31:1-8, 14-23; 32:45-52; 34:1-12.



Kurhamarhikuecha

  • ¿Néskiksï inde tsimani achaticha engaksï Moisesini jingoni jaka dibujurhu?
  • ¿Jeoba ambe arhisïni Josueni?
  • ¿Moisesi andisï karharajki Nebu juátarhu ka Jeoba ambe arhisïni?
  • ¿Namuni uéxurhini jatiri uarhiski Moisesi?
  • ¿Andisï ireta kómu pʼikuarherajki, joperu ístu andisï jatsi para sési pʼikuarherani?

Máteru kurhamarhikuecha

  • Arhinta Números 27:12-23.

    ¿Jeoba ambe ambakiti ánchikuarhita íntskusïni Josueni, ka néna xarhatasïni iásï eska Jeoba interesi pásïnga Imeri iretani jimbo? (Núm. 27:15-19; Uku. 20:28; Ebr. 13:7.)

  • Arhinta Deuteronomio 3:23-29.

    ¿Jeoba andisï no jurajkuapi Moisesi ka Aronini eskaksï inchapiringa Echerini jimbo enga aiatspipka, ka ini jingoni ambechi jorhenguarhisïni? (Deu. 3:25-27; Núm. 20:12, 13.)

  • Arhinta Deuteronomio 31:1-8, 14-23.

    ¿Moisesi néna xarhataspi imeri uandakuechani jimbo eska jiókuarhispka Jeobaeri kastiguni? (Deu. 31:6-8, 23.)

  • Arhinta Deuteronomio 32:45-52.

    ¿Tata Diosïri Uandakua nénajtsïni jatsiski para marhuachini juchari irekakuarhu? (Deu. 32:47; Lev. 18:5; Ebr. 4:12.)

  • Arhinta Deuteronomio 34:1-12.

    Nájkiruka Moisesi no méni exepka Jeobani, ¿ambe uandasïni Deuteronomio 34:10 na enga pájperaenga Imani jingoni? (Éxo. 33:11, 20; Núm. 12:8.)