Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 42: Burra ma uandasïndi

Uandantskua 42: Burra ma uandasïndi

¿KURHASKIRI ménisï burruni ma uandani jarhani? ‘Nómbe’, uandajkari. ‘Animalichaksï no uandasïndi.’ Peru Bibliajtsïni aiangusïndi eska burra ma uandaspka. Ju exeni néna úkuarhiski i ambe.

Ánjili ma

Israelitechaksï listu jarhastia paraksï inchaakuni Kanaani. Balaki, juramuti Moabi anapu, chérhiasïndi israelitechani. Ísï jimbo, pʼitarkuarhisïndi Balamini, achatini ma enga no ambakika, paraka jupiringa uandani ambe ma, paraka no sési nikuapiringa israelitechani. Balaki uánikua tumina aiakusïndi Balamini, ísï jimbo, i sóntku jatasïndi imeri burrani ka nirasïndi exeni Balakini.

Jeoba no uékasïndi eska Balami ambe ma uandaaka paraka no sési nikuaka Imeri iretani. Ísï jimbo, axasïndi ánjilini ma, kʼéri espada ma jingoni para kúmani ka pʼínguni Balamini. Balami no exesïndi ánjilini, peru imeri burra kʼóru. Burra kéndikukusïndi ánjilini, ka apondisïndi xanharurhu. Balami kánikua ikiasïndi ka atasïndi chkari ma jingoni.

Jiájkani Jeoba úsïndi eska Balami kurhaauaka eska burra uandajpasïnga. Burra kurhamarhisïndi: ‘¿Ambekini úchiski pararini ísï atani?’.

Balami burra ma jimbo niraxati

Balami arhisïndi: ‘Jindesti jimbokarini tontueni kámaxaka’. ‘¡Engani kámapiringa espada ma, iáiasïkinisï uándikupiringa!’

Burra kurhamarhisïndi: ‘¿Ísïkini kámaski ménisï?’.

‘Nómbe’, arhisïndi Balami.

Jiájkani Jeoba úsïndi eska Balami exeaka eska ánjili jima jarhaska anhaxurhitini espada ma jingoni. Ánjili arhisïndi: ‘¿Andirisï atajki chíti burrani? Jurhaskakini pʼínguni, jimbokari no jatsiska para nirani ambe ma uandani para no sési nikuni Israelini. Ka engakini chíti burra no kénditapiringa, uándikupiringakini, peru no ma ambe úkupiringa chíti burrani’.

Balami arhisïndi: ‘Ji pekariska. No mítispka eskari ixú jarhaspka anhaxurhitini’. Ánjili jurajkusïndi Balamini ka Balami nirasïndi útasï Balakini exeni. Útasï uékasïndi uandani ambe ma paraka no sési nikuaka Israelini, peru Jeoba úsïndi eska Balami tanimu uelta újchakuraka Israelini.

Números 21:21-35; 22:1-40; 23:1-30; 24:1-25.



Kurhamarhikuecha

  • ¿Néski Balaki ka andisï pʼitarkuarhejki Balamini?
  • ¿Andisï xanharu jimbo apondijki Balamiri burra?
  • ¿Ambe arhispi burra, Balamini?
  • ¿Ambe arhispi ánjili Balamini?
  • ¿Ambe úkuarhispi enga Balami uékapka uandani ambe ma paraka no sési nikupiringa Israelini?

Máteru kurhamarhikuecha

  • Arhinta Números 21:21-35.

    ¿Israeli andisï uándikupi Seonini, amorreuecheri juramutini, ka Ogini, Basani anapu juramutini? (Núm. 21:21, 23, 33, 34.)

  • Arhinta Números 22:1-40.

    ¿Andisï uékaeni Balami uandani ambe ma paraka no sési nikupiringa Israelini, ka ambejtsïni jorhendasïni inde ambe? (Núm. 22:16, 17; Pro. 6:16, 18; 2 Ped. 2:15; Jud. 11.)

  • Arhinta Números 23:1-30.

    Nájkiruka Balami ísï uandaenga enajki kómarhieni Jeobani, ¿néna xarhataspi imeri úkuecha eska no ísïspka? (Núm. 23:3, 11-14; 1 Sam. 15:22.)

  • Arhinta Números 24:1-25.

    ¿Nénajtsïni uinhaperantasïni i uandantskua Bibliarhu anapu, parachi mintsinharhini eska úkuarheaka ambe enga Jeoba eratsini jaka úni? (Núm. 24:10; Isa. 54:17.)