Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 38: Dose achaticha nirasïndi echerini exeni

Uandantskua 38: Dose achaticha nirasïndi echerini exeni
Israelitecha engaksï nípka echerini exeni, páxatiksï máru frutechani

EXE frutani engaksï i achaticha páni jaka. Exe na enga xáni kʼéka uberi rasimu. Tsimani achatichaksï uétarhisïndi para chkari ma jimbo páni. Ka exe jigusïchani ka granadechani. ¿Naniksï pʼiraski ini xáni ambakiti frutani? Kanaani uératini. Miánta, Kanaani jimaesti engaksï Abraani, Isaki ka Jakobu irekapka. Peru kʼarhingua ma jimbo enga jima japka, Jakobu mótsispti Ejiptu imeri familiani jingoni. Iásï, enga 216 uéxurhini nitamakia, Moisesi ménderu paantasïndi israelitechani Kanaani. Iásïksï Kadesirhu jarhastia, desierturhu.

Kanaani, kʼuiripu no sési úricha irenhasti. Ísï jimbo, Moisesi 12 achatichani axaasïndi paraksï nirani echerini exeni, ka arhiasïndi: ‘Exe je jima, namunksï irekaski, ka na xánksï uinhapiski. Exe je echerini abersieka marhuajka para ambe ma ikarani. Ka asï mirikurhi je juaani máru frutechani’.

Engaksï achaticha kʼuanhatsintajka Kadesi, arhisïndiksï Moisesini: ‘Ambakiti paisi máesti’. Ka paraksï jakajkutarani eska ísïska, exerasïndiksï máru frutechani. Peru 10 achaticha engaksï nípka echerini exeni uandasïndiksï: ‘Kʼuiripu enga jima irekaka, iójtarestiksï ka uinhapitistiksï. Uándikuatijtsïni engachi uékaka imecheri paisi jimbo inchaakuni’.

Israelitechaksï kánikua chésïndi engaksï i ambe kurhajka. Uandasïndiksï: ‘Sánderu sési japirindi engachi Ejiptu uarhipiringa o ixú desierturhu’. ‘Uarhiperakuarhuchi uarhiaka, ka paauatiksï juchari uarhitichani ka uájpechani. ¡Ju je jirinhani máteru nemani parajtsïni orhechipani paraka nóteru Moisesiuakia, ka kʼuanhatsintakachi Ejiptu!’

Peru Josue ka Kalebi, engaksï ístu nípka echerini exeni, mintsikasïndiksï Jeobani ka uékasïndiksï úni eska ireta sési eratsiaka. Ka arhisïndiksï iretani: ‘Asï ché je. Jeoba juchantsïni jingoni jarhasti. No úkua jukaati inchakuni iretarhu’. Peru ireta no kurhandisïndi. Ka uékasïndiksï jamberi uándikuani Josueni ka Kalebini.

I ambe kánikua ikiatasïndi Jeobani, ísï jimbosï arhijti Moisesini: ‘No nema enga 20 uéxurhini para orhepatini jatirika inchaakuati paisi Kanaani. Exeastiksï milagruechani engani Ejiptu ka desierturhu uaaka, peru útasïjtsïni no mintsikasïndi. Ísï jimbo, 40 uéxurhinksï jámati desierturhu asta enga jamberi ultimu uarhiaka. Josue ka Kalebijku inchakuatiksï echeri Kanaani’.

Números 13:1-33; 14:1-38.



Kurhamarhikuecha

  • ¿Nari exesïni inde uberi rasimuni enga dibujurhu jaka? ¿Naniksï uératini juáski?
  • ¿Moisesi andisï axaajki dose achatichani paraksï nirani Kanaani anapu echerini exeni?
  • ¿Ambeksï uandasïni diesi achaticha engaksï kʼuanhatsintajka Moisesini jingoni?
  • ¿Nénaksï xarhatasïni tsimani achaticha eskaksï mintsikasïnga Jeobani, ka nénaksï arhinhasïni?
  • ¿Andisï ikiajki Jeoba, ka ambe arhisïni Moisesini?

Máteru kurhamarhikuecha

  • Arhinta Números 13:1-33.

    ¿Nénksï erakuaspi paraksï nirani echerini exeni, ka ambeksï úpirini intsïnhani? (Núm. 13:2, 3, 18-20.)

    ¿Andiksïsï Josue ka Kalebi no májkueni eratsiani eska máteruecha, ka ambejtsïni jorhendasïni i ambe? (Núm. 13:28-30; Mat. 17:20; 2 Kor. 5:7.)

  • Arhinta Números 14:1-38.

    ¿Andichisï no jatsi para uandatsiani imechani engaksï Jeobani ánchikuarhikuni jaka ixú Echerirhu? (Núm. 14:2, 3, 27; Mat. 25:40, 45; 1 Kor. 10:10.)

    ¿Néna xarhatasïni Números 14:24 eska Jeoba interesi pásïnga mándani kʼuiripu jimbo enga marhuakujka? (1 Rey. 19:18; Pro. 15:3.)