Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 37: Kʼumanchikua ma para kómarhikua úni

Uandantskua 37: Kʼumanchikua ma para kómarhikua úni

¿MÍTISKIRI ambeski i kʼumanchikua? Ambakiti kʼumanchikua máesti paraksï Jeobani kómarhini. Ka tabernakulu arhinhasïndi. Ireta kʼamarasti úni ma uéxurhini tátsekua engaksï uérapka Ejiptu. ¿Mítiskiri né uandaspi eskaksï úpiringa?

Tabernakulu

Jindespti Jeoba. Enga Moisesi Sinai juátarhu japka, Jeoba arhispti na enga úpiringa. Arhispti eska úpiringa paraka ístu tátsekua úpiringa xerekuarhintani. Ísïksï úpirindi máteru nani ísï páni ka ménderuksï úntani. Ísï jimbo, engaksï israelitecha mótsienga desierturhu, pásïrendiksï ini kʼumanchikuani.

Engari exejka kuartu sapichuni ini kʼumanchikuani jimbo, exeakari kaja ma. I kaja arhinhasïndi arka pakatperakueri. Tsimani ánjilichani o kerubini oruerichani jukaasti, ma, mándani ladu. Tata Diosï ménderu karaasti Diesi Mandamientuechani tsimani tsakapu kórhatichani jimbo, jimboka Moisesi kʼepekuaspka orheta tsakapuechani enga intsïnhaapka. Ka íchanksï patsaaspti arka pakatperakueri jimbo. Ístu jima patsanhasti porhechi ma, mana jingoni. ¿Miásïniri ambeski mana?

Jeoba, Aronini erakusïndi, Moisesiri ermanuembani paraka jindeuaka kʼéri saserdoti. Ima orhekupasïndi iretani paraksï Jeobani kómarhini. Ka imeri uájpechajtuksï saserdotisti.

Iásï exe sánderu kʼéri kuartuni. Tsimani uelta sánderu kʼésti eska kuartu sapichu. ¿Exesïniri kajitani enga sïraata uérani jaka? Altaristi, nani engaksï saserdoticha insiensu kurhirajka, insiensu, xunhanda máesti enga sési jájkundejka. Ístu exe indeni enga sieti lámparechani jukaaka. Ka ístu mesa ma jarhasti, ka jiminksï 12 kurhindecha jarhasti.

Tabernakulurhu terunukua pila ma jarhasti itsï jingoni. Saserdotichaksï jimini jupajkusïndi ka jupandurhani. Ístu jarhasti kʼéri altari ma. Jiminksï kurhiraasïndi animali uarhirichani engaksï Jeobani kéjtsïtakuauenga. Israelitechaksï uirhipandani irekasti, ka terojkanikuarhu i kʼumanchikua jarhasti.

Éxodo 25:8-40; 26:1-37; 27:1-8; 28:1; 30:1-10, 17-21; 34:1, 2; Ebreu 9:1-5.



Kurhamarhikuecha

  • ¿Néna arhinhasïni kʼumanchikua enga dibujurhu jaka, ka para ambe marhuasïni?
  • ¿Andisï Jeoba arhipi Moisesini eska úpiringa tabernakuluni para ístu úni xerekuarhintani?
  • ¿Ambeski kaja enga kuartu sapichurhu jaka, ka ambe jataski?
  • ¿Jeoba néni erakusïni paraka kʼéri saserdotiuaka, ka nákiski imeri ánchikuarhita?
  • ¿Ambe tanimu ambe jarhaski sánderu kʼéri kuarturhu?
  • ¿Ambe tsimani ambe jarhaski tabernakulurhu terunukua, ka para ambeksï marhuasïni?

Máteru kurhamarhikuecha

  • Arhinta Éxodo 25:8-40; 26:1-37; 27:1-8, ka 28:1.

    ¿Ambeksï arhikuekasïreni kerubinicha engaksï “arka del testimoniueri” japka? (Éxo. 25:20, 22; Núm. 7:89; 2 Rey. 19:15.)

  • Arhinta Éxodo 30:1-10, 17-21; 34:1, 2, ka Ebreu 9:1-5.

    ¿Andisï Jeoba uandapi eskaksï saserdoticha uétarhinchasïrenga pímbinhasï jatsini kuerpuni paraksï tabernakulurhu marhuani, ka ambejtsïni jorhendasïni i ambe? (Éxo. 30:18-21; 40:30, 31; Ebr. 10:22.)

    ¿Néna xarhatasïni apostuli Pablu eska tabernakulu ka Juramukueri pakatperakua, nóteru marhuasïrengia para imani jurhiatikuechani jimbo enga ima kristianu ebreuechani karakuapka? (Ebr. 9:1, 9; 10:1.)