Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 34: Tʼirekua ma engaksï no mítipka

Uandantskua 34: Tʼirekua ma engaksï no mítipka

¿MÍTISKIRI ambeksï kʼarhantaxaki kʼuiripuecha? Ísï xarharasïndi eska iauakua. Urapitisti, ka tsʼauapiti ka xaxesti eska chkuri sapirati. Peru no iauakuesti; akuaesti.

Israelitechaksï mana kʼarhantaxati

Apenasi ma kutsï ísïsti engaksï israelitecha uéakuka Ejiptu uératini. Ka desierturhuksï jarhasti. Jima no kánikua ambe jarhasïndi para tʼireni, ka úndasïndiksï uandauandamini: ‘Sánderu sési japirindi engajtsïni Jeoba Ejiptu uándikupiringa. Jinichi tʼiresïrenga na engachi xáni uékaengaʼ.

Jimbosï Jeoba uandajti: ‘Uáka eska tʼirekua janiaka auandarhu uératini’. Ka inde ambe úsïndi. Pauandikua engaksï israelitecha exejka eska uekorhiska i urapiti ambe, uandasïndiksï: ‘¿Ambeski?’.

Moisesi uandasïndi: ‘I jindesti tʼirekua engaksïni Jeoba íntskuka parajtsï arhani’. Kʼuiripu arhirasïndi MANA. Mana xamarhasti eska ma taiapiti enga tékua jingoni úkatejka.

Moisesi arhiasïndi: ‘Kʼarhanta je na engajtsï xáni uáka arhani’. Ísï jimbo, mándani tsípa ísïksï úsïndi. Jiájkani, enga úndajkia tsándini, mana enga pakandijka tsïtentasïndi.

Ístu Moisesi uandasïndi: ‘Eska no nema patsaka mana para pauandikua’. Peruksï máru no kurhandisïndi. ¿Mítiskiri ambe úkuarhesïni jiájkani? ¡Mana engaksï patsajka, pauandikua karhasï úkuarhintasïndi ka no sési jájkundesïndi!

Peru Jeoba uandasïndi eska sextu jurhiatikua jimbo uákaksï tsimani jurhiatikueri kʼarhantani. Ka Jeoba uandasïndi eskaksï patsaka mana para pauandikua, jimboka septimu jurhiatikua jimbo no uekopaaka. ¡Engaksï patsajka manani para septimu jurhiatikua, no karhasï úkuarhintasïndi ka níjtu sïpiani! ¡Máteru milagru!

Iámindu ima uéxurhinichani engaksï israelitecha desierturhu jámapka, manaksï tʼiresïndi.

Éxodo 16:1-36; Números 11:7-9; Josué 5:10-12.



Kurhamarhikuecha

  • ¿Ambeksï kʼarhantaxaki kʼuiripuecha engaksï dibujurhu jaka, ka néna arhinhasïni?
  • ¿Moisesi néna juramukusïni iretani eskaksï tánaka manani?
  • ¿Jeoba ambe arhisïni iretani eskaksï uáka sextu jurhiatikua jimbo, ka andi?
  • ¿Ambe milagru úsïni Jeoba enga mana patsanhajka asta septimu jurhiatikua?
  • ¿Jeoba na xáni ióni tʼirerasïni iretani mana jingoni?

Máteru kurhamarhikuecha

  • Arhinta Éxodo 16:1-36 ka Números 11:7-9.

    ¿Néna xarhatasïni Éxodo 16:8 eska uétarhisïnga janhanharhiani imechani engaksï intsïnhaka juramukua kúnguarhikuarhu? (Ebr. 13:17.)

    Engaksï israelitecha desierturhu japka, ¿nénaksï miátanhantasïreni pauani pauani eskaksï uétarhinchasïrenga Jeobani? (Éxo. 16:14-16, 35; Deu. 8:2, 3.)

    ¿Ambe arhikuekaspi Jesusi enga manaeri ambe uandapka, ka nénajtsïni marhuachisïni inde “kurhinda auandarhu anapu”? (Juanu 6:31-35, 40.)

  • Arhinta Josué 5:10-12.

    ¿Israelitechaksï na xáni ióni tʼirespi mana, néna tsʼéjkuaspi i ambe ka ambechi jorhenguarhisïni? (Éxo. 16:35; Núm. 11:4-6; 1 Kor. 10:10, 11.)