Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 30: Anhatapu ma enga tixarajka

Uandantskua 30: Anhatapu ma enga tixarajka

MOISESI Orebi juátarhu ísï jámaxapti uitsakua jirinhani para imeri karichicha. Ka exespti anhatapu sapichu ma enga tixarani japka, ¡peru no kurhisïrendi!

Moisesi ka anhatapu enga tixarajka

‘¡Ambeski!ʼ, uandaspti Moisesi. ‘Nipa parani sánderu sési exeni.ʼ Enga andarhierapkia anhatapuni, uandakua ma arhispti: ‘Asteru juia ixuani ísï. Pʼiuanta kuarhachichani, jimbokari pímbinhasï echeri jimbo jarhaskaʼ. Tata Diosï uandajpaxapti ánjili ma úraparini, jimbosï Moisesi ónharhipti.

Jimajkani, Tata Diosï arhispti: ‘Exeska juchiti iretani na enga no sési nitamakuarhini jaka Ejiptu. Kuájpintaka, ka tʼungini axaxaka parari petaantani jima uératiniʼ. Jeoba Kanaani pápirindi imeri iretani, sési jásï paisi ma jimbo.

Peru Moisesi mókukuspti: ‘Ji no nemaeska. ¿Néna uá úni i ambe? Ka engani niraska, imajtsïni arhiati: “¿Nékini axaski?” ¿Ambe arhiaua ji?ʼ.

Ka Tata Diosï mókukuspti: ‘Ísïri arhiauakaʼ. ‘“JEOBA Abraaniri Tata Diosï, Isakiri Tata Diosï ka Jakobueri Tata Diosï, imarini axasti”.ʼ Jeoba útasï arhispti: ‘I jindesti juchiti arhinhakua para méntkisïʼ.

Ka Moisesi uandaspti: ‘Peru ¿engajtsïni ima no jakajkucheskia eskarini tʼu axaska?ʼ.

‘¿Amberi kámaxaki jájkirhu?ʼ, kurhamarhispti Tata Diosï.

Moisesi arhispti: ‘Pirimu maʼ.

‘Kʼuanikuʼ, arhispti Tata Diosï. Ka enga Moisesi kʼuanikupka, pirimu akuitsi úkuarhintaspti. Jiájkani Jeoba máteru milagru xarhatakuspti. Arhispti: ‘Inchaara chíti jájkiniʼ. Ka Moisesi ísï úspti, ka enga pʼíurantapka, ¡urapiti jarhaspti komueska iauakua! Ísï xarharasïrendi enajki lepra pʼamenchani japi. Jiájkani Jeoba íntskuspti uinhapikua Moisesini para máteru milagru úni. Ultimu Jeoba arhispti: ‘Íni milagruechani jimbo israelitechaksï jakajkuati eskakini ji axaskaʼ.

Ka Moisesi kʼuanhatsentaspti imeri kʼumanchikuani jimbo ka arhispti Jetroni: ‘Jimboetakua, jurajkurini kʼuanhatsintani Ejiptu parani exeani nénaksï jarhaski juchiti parientichaʼ. Ísï jimbo, Jetro jurajkuspti Moisesini, ka Moisesi niraspti Ejiptu.

Éxodo 3:1-22; 4:1-20.



Kurhamarhikuecha

  • ¿Néna arhinhasïni juáta enga dibujurhu jaka?
  • ¿Ambe exespi Moisesi enga nípka juátarhu imeri karichichani jingoni?
  • ¿Ambe arhispi uandakua enga kurhakuarhienga anhatapurhu enga tixarani japka, ka né uandaxapi?
  • ¿Ambe uandaspi Moisesi enga Tata Diosï arhipka eska petantapiringa Imeri iretani Ejiptu uératini?
  • ¿Ambe arhispi Tata Diosï Moisesini eska mókukuapiringa engaksï kurhamarhipiringa né axaspi?
  • ¿Néna úpirini xarhatani Moisesi eska Tata Diosï axaspka?

Máteru kurhamarhikuecha

  • Arhinta Éxodo 3:1-22.

    ¿Nénajtsïni jarhuatasïni Moisesiri nitamakua, parachi mintsikani eskajtsïni Jeoba jarhuaataka engachi no jánhaskaka néna úni ánchikuarhita ma kúnguarhikuarhu? (Éxo. 3:11, 13; 2 Kor. 3:5, 6.)

  • Arhinta Éxodo 4:1-20.

    Enga Moisesi kuarenta uéxurhini irekapkia Madiani, ¿andisï nóteru májkuenipia, ka ambe jorhendaasïni imechani engaksï uékaka kóntperatechani jatsiani kúnguarhikuarhu? (Éxo. 2:11, 12; 4:10, 13; Miq. 6:8; 1 Tim. 3:1, 6, 10.)

    Enga Jeoba úraaka imeri kúnguarhikuani parajtsïni xukani, ¿ambe mintsikakuajtsïni íntskusïni Moisesiri ejemplu? (Éxo. 4:12-14; Sal. 103:14; Ebr. 12:4-11.)