Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 28: Charhaku Moisesi tsípiti pakarasïndi

Uandantskua 28: Charhaku Moisesi tsípiti pakarasïndi

EXE charhakuni enga uerani jaka ka enga uátsïni jupijkuni jaka. Moisesisti. ¿Mítiskiri néski i uátsï xáni sési jásï? Ejiptu anapu juramuti uájpesti, jo, Faraoniri uájpa.

Faraoniri uátsï exentasïndi Moisesini

Moisesiri amamba no uékasïndi eskaksï ejipsiuecha uándikuaka charhakuni, jimbosï, tanimu kutsï jískapti. Peru mítispti eskaksï úpiringa exentani, ísï jimbosï i ambe úpti para kuájchakuni.

Tsïkiata ma úspti enga itsï no inchakupiringa. Jima jatsiraspti Moisesini ka jurajkuspti tsïkiatani iorhekua Nilurhu, jimesïsï enga kánikua uitsakua jatamipka. Ka arhispti Míriamini, Moisesiri pirembani eska jima pakarapiringa para exeni ambe enga úkuarhipiringa.

No ióni jimbo Faraoniri uájpa jurhaspti iorhekua Nilurhu jikuani. Ka exespti uitsakuarhu ísï tsïkiatani. Arhispti imeri jarhuajpirini ma: ‘Juachirini indeni tsïkiataniʼ. Enga mítapka tsïkiatani, ¡sési jásï charhakuni ma exespti! Charhaku ueraxapti ka Faraoniri uájpa, pʼamojkuspti. I uátsï no uékaspti eskaksï uándikupiringa charhakuni.

Jiájkani Miriami jurhaspti. Úsïngari exeni dibujurhu, Míriami kurhamarhisïndi Faraoni uájpani: ‘¿Uékasïniri eskani niuaka uandajpani israelitani ma parakakini kʼuiriperacheaka charhakuni?ʼ.

‘Jo jimboetakuaʼ, arhispti Faraoniri uátsï.

Ísï jimbo, Miriami niraspti uiriipani amambani aianguni. Enga Moisesiri amamba niárapka Faraoniri uájpani jingoni, uátsï arhispti: ‘I, ini charhakuni ka kʼuiriperachirini, ka meiamuakakini ini ambe jimboʼ.

Ísï jimbo, Moisesiri amambajkumindu kʼuiriperaspti imeri uájpani. Tátsekua, enga Moisesi kʼépkia, pákuntaspti Faraoniri uájpani enga jiókuarhipka eska uájpa ma. Jimbosï Moisesi Faraoniri kʼumanchikuarhu kʼuiripepti.

Éxodo 2:1-10.



Kurhamarhikuecha

  • ¿Néski charhaku enga dibujurhu jaka, ka néni jupijkuxaki?
  • ¿Ambe úspi amamba paraksï no uándikuni Moisesini?
  • ¿Néski nanaka dibujurhu anapu, ka ambe úspi?
  • Enga Faraoniri uájpa exentapka charhakuni, ¿ambe uandaspi Míriami?
  • ¿Ambe arhispi Faraoniri uájpa Moisesiri amambani?

Máteru kurhamarhikuecha

  • Arhinta Éxodo 2:1-10.

    ¿Néna kʼuiriperaspi ka ambe jorhendaspi amamba Moisesini, ka ambe ejemplu íntsaasïni iásï anapu tátichani? (Éxo. 2:9, 10; Deu. 6:6-9; Pro. 22:6; Efe. 6:4; 2 Tim. 3:15.)