Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 24: Jose tsʼéjkuasïndi ermanuembechani

Uandantskua 24: Jose tsʼéjkuasïndi ermanuembechani

JOSE uékasïndi mítini imeri 10 ermanuembechaksï útasïksï no ambarhatiski ka nóksï pʼamojpini. Jimbosï uandajti: ‘Jamberijtsï juka iretani exeni. Parajtsï exeni na jarhaski juchari paisi’.

Imecha mókukuspti: ‘Nómbe, jucha no indeni ambe úxamka’. ‘Jucha ambarhati kʼuiripueska. Jucha iámindu ermanueska. Dosespkachi. Peru ma nóteru jarhastia, ka sánderu sapichu kʼumanchikuarhu jarhasti juchari tátini jingoni.’

Jose úsïndi enajki no jakajkukuajki. Úsïndi eska ermanuemba Simeoni ónhakata pakaraka, ka jurajkusïndi eskaksï máteruecha níntaka tʼirekua páni. Peru arhiasïndi: ‘Engajtsï juuaka ménderu, juájtakajtsï chári ermanu sapichuni’.

Engaksï niántajka Kanaani, eiangusïndiksï tátemba Jakobuni iámindu ambe enga úkuarhika. Jakobu kánikua kómu pʼikuarherasïndi. Uandasïndi: ‘Jose nóteru jarhastia’, ‘ka Simeonijtu nóteru jarhastia. No jurajkuaka eskajtsï paaka Benjaminini, juchiti uájpa sapichuni’. Peru engaksï sánderku tʼirekua jatsijkia, Jakobu jurajkusïndi eskaksï paaka Benjaminini Ejiptu paraksï úni tʼirekua intsïnhani.

Jose erokaasïndi engaksï jurhani jarhajkia, ka kánikua tsípisïndi exeni ermanuemba Benjaminini. Peru, imaksï no mítisïndi eska i achati enga xáni kʼéri ambeka Ejiptu, Joseska. Jose úsïndi ambe ma para tsʼéjkuani imeri 10 ermanuembechani.

Úsïndi eska imeri ánchikuarhiricha tʼirekua uinirakuauaka kostalicharhu. Ístu úspti, eskaksï Benjaminiri kostalirhu jatsirapiringa sánderu sési jásï kopa platerini. Engaksï sáni iauani ísï nirani japkia, Jose axaasïndi imeri ánchikuarhirichani paraksï nirani andanguani. Engaksï andanguajkia, arhiasïndiksï: ‘¿Andisïjtsï sïpaku juchari juramutiri kopa platerini?’.

Iáminduechaksï uandasïndi: ‘Jucha no ma kopa sïpakuska’. ‘Néni engajtsï exekuntaska, uákajtsï uándikuni.’

Jimboksïsï ánchikuarhiricha jirinhantajti iámindu kostalichani jimbo, ka exentasïndiksï Benjaminiri kostalirhu, eska na xarharani jaka ixú. Ánchikuarhiricha uandasïndiksï: ‘Iámindujtsï uáka níntani, peru Benjamini juchantsïni jingoni niuati’. Iásï ¿ambeksï uá 10 ermanuembecha?

Imaksï iáminduecha nirasïndi Benjaminini jingoni Joseri kʼumanchikuarhu. Jose arhiasïndi: ‘Uákajtsï níntani, peru Benjamini ixú pakarati, juchiti jántspiriuati’.

Jiájkani Juda arhisïndi: ‘Engani níntaska ka no pántani Benjaminini, juchiti táti uarhiati, jimboka kánikua uékasïnga. Kómarhisïngakini, eskarini jíndeni jurajkuaka eska chíti jántspiri, ka jurajku eska tumbi níntaka’.

Jose exeasïndi eskaksï ermanuembecha mójtakurhispkia. Iásïksï pʼamojpisïndia ka ambakiti kʼuiripuestiksïa. Iásï ju exeni ambe úsïni Jose.

Génesis 42:9-38; 43:1-34; 44:1-34.

Joseri ermanuembechanksï arhiaxatiksï úska ambe ma


Kurhamarhikuecha

  • ¿Jose andisï arhiajki ermanuembechani eskaksï niraska exeni néna jarhaski paisi?
  • ¿Jakobu andisï jurajkujki Benjaminini eska niuaka Ejiptu?
  • ¿Joseri kopa plateri néna niárasïni Benjaminiri kostalirhu?
  • ¿Ambe uandasïni Juda eska uáka para Benjamini jurajkunhani?
  • ¿Nénaskiksïa iásï Joseri ermanuembecha?

Máteru kurhamarhikuecha

  • Arhinta Génesis 42:9-38.

    Joseri uandakuecha engaksï Génesis 42:18 jaka, ¿ambe miátantasïni imechani engaksï orhejtsïkujka Jeobaeri kúnguarhikuarhu? (Neh. 5:15; 2 Kor. 7:1, 2.)

  • Arhinta Génesis 43:1-34.

    Nájkiruka Rubeni orheta uájpepka, ¿néna xarharasïni, eska Judasï uandaenga ermanuembechani jimbo? (Gén. 43:3, 8, 9; 44:14, 18; 1 Cró. 5:2.)

    ¿Jose néna tsʼéjkuaspi ermanuembechani ka andi? (Gén. 43:33, 34.)

  • Arhinta Génesis 44:1-34.

    Paraksï no mítintani Joseni, ¿ambe uandaspi eska úsïrenga? (Gén. 44:5, 15; Lev. 19:26.)

    ¿Nénaksï xarhataspi Joseri ermanuembecha eskaksï nóteru enbidiarisïrengia Joseni ísï eska ióntki? (Gén. 44:13, 33, 34.)