Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 19: Jakobueri kʼéri familia

Uandantskua 19: Jakobueri kʼéri familia
Jakobu ka imeri uájpecha

EXE i kʼéri familiani. Íksï 12 Jakobueri uájpechesti. Ístu kaaspti nanakechani. ¿Mítiaskiri náksï arhinhasïni? Ju jorhenguarhiani máru ícheri arhinhakuechani.

Lea kámaspti Rubenini, Simeonini, Lebini ka Judani. Enga Rakeli exepka eska no úsïrenga káani uájpechani, kánikua kómu pʼikuarheraspti. Ísï jimbo, íntskuspti Jakobuni Bilani imeri jarhuajpirini ka Bila kaaspti tsimani uájpechani, Danini ka Neftalini. Tátsekua Leajtu íntskuspti Jakobuni imeri jarhuajpiri Silpani, ka Silpa kámaspti Gadini ka Aserini. Tátsekua Lea kaaspti máteru tsimani uájpechani, Isakarini ka Sabulonini.

Tátsekua Rakeli úsptia kánguarhini uájpa ma, ka Jose arhiraspti. Sánderu orhepatini jorhenguarhiakachi Joseri ambe, jimboka niáraspka kʼéri ambeni. Íksï jindespti 11 Jakobueri uájpecha enga kápka, enga Labaniri kʼumanchikuarhu irekani japka.

Ístu Jakobu kaaspti máru uátsïchani, peru Biblia Dinaeri ambejku uandasïndi.

Niáraspti jurhiatikua enga Jakobu eratsipka jurajkuni Labanini, ka kʼuanhatsintani Kanaani. Jimbosï tántapti imeri kʼéri familiani, imeri karichichani, uákasïchani ka ueechani. Ka ísï uéntaspti para níntani Kanaani.

Ma jurhiatikua enga Jakobu ka imeri familia Kanaani japkia, Rakeli kánguarhispti máteru uájpani. Jiáni engaksï Efrata ísï nirani japka. Rakeli no úspti sési ambakintani, ka uarhispti. Peru charhaku sési andajpenuspti. Ka Jakobu, Benjamini arhiraspti.

Ju miántani na engaksï arhinhaenga 12 Jakobueri uájpecha, jimboka Israeliri nasioni jima uéraska. Ísï jimbosï 12 tribu Israeli anapuecha, ísïksï arhinhajti eskaksï na arhinhajka diesi Jakobueri uájpecha ka tsimani Joseri uájpecha. Isaki iónderu irekaspti engaksï andajpenupka i tumbicha, ka kánikua tsípipti xáni uánikua nimakuechani kaani. Peruchi exeaka ambe nitamanchaspi nimakuemba Dina.

Génesis 29:32-35; 30:1-26; 35:16-19; 37:35.



Kurhamarhikuecha

  • ¿Náksï arhinhasïreni seisi Jakobueri uájpecha enga Lea jingoni kaapka?
  • ¿Nákispiksï tsimani uájpecha enga Jakobu Silpa jingoni kaapka?
  • ¿Nákispiksï tsimani uájpecha enga Jakobu Bila jingoni kaapka?
  • ¿Nákispiksï tsimani uájpecha enga Rakeli kánguarhiapka, peru ambe úkuarhinchaspi enga Benjaminini kámapka?
  • Eska na xarharajka dibujurhu, ¿namuni uájpechani kaaspi Jakobu, ka náki nasioni úkuarhispi imechani jimbo?

Máteru kurhamarhikuecha

  • Arhinta Génesis 29:32-35; 30:1-26, ka 35:16-19.

    Eska na úkuarhipka dose Jakobueri uájpechani jingoni, ¿ióntki anapu ebreuecha nénaksï jirinhakuasïreni arhinhakua uájpechani?

  • Arhinta Génesis 37:35.

    Nájkiruka Biblia Dinari ambejku uandajka, ¿nénachi mítiski eska Jakobu kaaspka máteru nanakaechani? (Gén. 37:34, 35.)