Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 6: Ma uájpa sési úri, ka ma no sési úri

Uandantskua 6: Ma uájpa sési úri, ka ma no sési úri

EXE Kainini ka Abelini, kʼérastiksïa. Kaini tarheristi ka mámaru ambe ikarasïndi enga marhuajka para tʼireni.

Kaini ka Abeli kéjtsïtakuaksï úkuxati Tata Diosïni

Abeli karichi erangutisti, ka kánikua tsitisïndi eranguani karichichani. I karichicha sóntkuksï kʼuiripesïndi ka sóntkuksï uánisïndi.

Ma jurhiatikua Kaini ka Abeli íntskusïndiksï Tata Diosïni intsïmperakua ma. Kaini íntskusïndi ambe enga ima ikarajka. Ka Abeli íntskusïndi sánderu sési jásï karichini enga kánguarhienga. Jeoba jaiapanhintasïndi Abelini ka ístu imeri intsïmperakuani. Joperu no jaiapanhintasïndi Kainini ka imeri intsïmperakuani. ¿Mítiskiri andi?

No jimboka Abeliri intsïmperakua sánderu ambakitiska ka eska Kainiri. Jaiapanhintasïndi Abelini, jimboka ima ambakiti kʼuiripueska. Abeli kánikua uékasïndi Jeobani ka ístu imeri ermanuembani. Joperu Kaini no sési úristi, ka no uékasïndi Abelini.

Jimbosï Tata Diosï arhijti Kainini eska ima jatsiska para mójtakuni imeri jánguani. Joperu Kaini no kurhajchasïndi. Kaini kánikua ikiasïndi jimboka Tata Diosï sánderu uékasïnga Abelini. Kaini arhisïndi Abelini: ‘Ju juátarhu ísï’. Ka jima, engaksï jandiajku jarhajkia juátarhu, Kaini atasïndi imeri ermanuembani. Ka xáni uinhamu atasïndi enga niárajka uándikuni. ¿Nori ísï exesïni eska Kaini kánikua no sési ambe úspka?

Kaini sïpakuarhisïndi enga uándikujka Abelini

Nájkiruka Abeli uarhikia, Tata Diosï útasï miásïndi. Abeli ambakiti kʼuiripuespti, ka Jeoba no méni mirikurhiasïndi imani kʼuiripuechani engaksï sési ambe újka. Ísï jimbo, ma jurhiani Jeoba uáti eska Abeli ménderu irentaaka. Imani jurhiatikuechani jimbo Abeli nóteru méni uarhiati, irekati para méntkisï ménderu ixú Parhakpinirhu. ¿No sési japirini mítiani kʼuiripuechani engaksï ísïka eska Abeli?

Tata Diosï no jaiapanhiantasïndi xarhati kʼuiripuechani eska Kaini. Jimbosï, enga Kaini uándikupka imeri ermanuembani, Tata Diosï kastigarispti úparini eska Kaini iauanisï nípiringa irekani. Enga Kaini nípka iauanisï irekani, páspti imeri pirembani ka ima niáraspti imeri témbaeni.

Tátsekua Kaini ka imeri témba, kánguarhiasptiksï uájpechani. Máteru Adani ka Ebaeri uájpechajtu tembuperasptiksï ka kánguarhiasptiksï uájpechani. Kʼuiripuechaksï sóntku uánispti ixú Parhakpinirhu. Ju mítiani máru.

Génesis 4:2-26; 1 Juanu 3:11, 12; Juanu 11:25.



Kurhamarhikuecha

  • ¿Ambeksï ánchikuarhisïni Kaini ka Abeli?
  • Kaini ka Abeli, ¿ambeksï intsïmperakua íntskusïni Jeobani?
  • ¿Jeoba andisï jaiapanhintajki Abeliri intsïmperakuani, ka Kainirini nómbe?
  • ¿Kaini na jásï kʼuiripueski, ka Jeoba néna uékasïni jurhimberantani?
  • ¿Kaini ambe úkusïni ermanuembani engaksï jandiajku jarhajka juátarhu?
  • Uandanta ambe úkuarhinchaspi tátsekua Kaini enga uándikupkia Abelini.

Máteru kurhamarhikuecha

  • Arhinta Génesis 4:2-26.

    ¿Néna xarhatakuspi Jeoba Kainini, eska no sési jarhaspka ambe enga eratsini japka? (Gén. 4:7.)

    ¿Kaini néna xarhataspi ambe enga jatsispka imeri mintsitarhu? (Gén. 4:9.)

    ¿Néna exesïni Jeoba enga nema uándikujka ma kʼuiripuni? (Gén. 4:10; Isa. 26:21.)

  • Arhinta 1 Juanu 3:11, 12.

    ¿Andisï xáni ikiapi Kaini, ka ambejtsïni jorhendasïni i ambe? (Gén. 4:4, 5; Pro. 14:30; 28:22.)

    ¿Néna xarhatasïni Biblia eska jucha uáka méntkisï iámu mintsita jingoni marhuakuni Jeobani nájkiruka juchari familiecha no uékaka? (Sal. 27:10; Mat. 10:21, 22.)

  • Arhinta Juanu 11:25.

    ¿Ambe aiakuasïni Jeoba imechani, engaksï uarhijka imani jimbo? (Juanu 5:24.)