Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Juchiti libru enga Bibliaeri ambe uandajka

Uandantskua 10: Kʼéri Janikua

Uandantskua 10: Kʼéri Janikua

ENGAKSÏ arkarhu uérakua japka, útasïksï no jakajkusïrendi eska jupiringa Kʼéri Janikua ma. Chúngumaxaptiksï irekani eskaksï na uékaenga. Sánderuksï terekuarhiendi eska máteru jurhiatikuecha. Joperuksï tátsekua nóteru terekuarhisptia.

Kʼuiripuecha ka animalicha kánikuaksï chéxati, jimboka kánikua itsï jarhaska

Ma repentku uénasti janini. Itsï ísï uekorhesïrendi komueska kʼamukua jimbo móndanhani jarhani. ¡Noe no chikuanderakuaspti! Joperu nóteru nema úpirindia inchani arkarhu, jimboka Tata Diosï Jeoba míkaspkia puertani.

Itsï sóntku ójchakuraspti echerini enga kétsekua pakaraenga. Itsï ísï erakuarhisïrendi komueska kʼérati iorhekuecha. Ka no sési kúskasïrendi, anhatapuechani jiniani ka ixuani paasïrampti ka kʼérati tsakapuechani uirhijpaasïrendi. Kánikuaksï chéspti kʼuiripuecha ka karharasptiksï jimesïsï enga echeri sánderu iótapka. ¡Jamberiksï iásï kʼóru uékaendia kurhajchani Noeni ka inchanksï arkarhu! Joperu jukari ióndakuarhuesptia.

Itsï méntku úndaspti tarharapani, ka 40 jurhiatikua ka 40 chúrikua janispti. Sóntku iámu juátechani engaksï sánderu iótapka ójchakurakataksï pakaraspti. Iámindu kʼuiripuecha ka animalicha engaksï uérakua pakarapka uarhisptiksï ísï eska na uandapka Tata Diosï. Joperuksï no uarhispti imecha engaksï incharini japka.

Noe ka imeri uájpecha kánikuaksï sési úspti engaksï úpka arkani. Itsï úndaspti arkani tarhatani, ka arka xarhiajtsïkuxapti itsïrhu. Tátsekua enga anhaxurhipkia janikua, úndaspti tsándintani, ka ¿ambejku erakuarhisïrenia? Kánikua itsïjku iápurisï, ka ma ambejku enga xarharaenga itsïrhu, jindespti arka.

Arka xarhiajtsïkuxati itsïrhu

Nóteruksï jarhasptia kʼuiripu iójtarecha engaksï xáni no sési káuenga kʼuiripuechani. Iáminduechaksï uarhispti, xáni imecha ka amambecha ka iámindu no sési úricha. Joperu ¿ambeksï úkuarhinchaspi tátembecha?

Iójtarecheri tátembecha, nóksï kʼuiripuespti ísï eska jucha, imaksï ánjilichespti engaksï jupka Echerirhu para kʼuiripu úkuarhintani. Ísï jimbo, enga jupka Kʼéri Janikua, nóksï uarhispti kʼuiripuechani jingoni. Ménderuksï ánjili úkuarhintaspti ka auandarhuksï níntaspti. Joperu Tata Diosï nóteru uékasptia eskaksï japiringa imeri ánjilichani jingoni, Satanasiri ánjiliksï úkuarhispti. Biblia i ánjilichani arhiasïndi demoniuecha.

Tátsekua Tata Diosï úspti eska tarhiapiringa, ka itsï úndaspti kétsini. Iúmu kutsï jimbo tátsekua, arka anhaxurhispti juáta ma jimbo, útasï ióni nitamaspti paraka imecha engaksï arkarhu japka, úpiringaksï exeani juátecheri terontsïkuechani. Ka itsï méntku úndaspti sánhani arhini kétsini.

Jiájkani Noe jurajkuspti eska kʼuáki ma uérapiringa, joperu i sóntku kʼuanhatsintasïrendi jimboka no nani úsïrenga anhaxurhini. Ari kʼuáki mémindu kárasïrendi ka no nani exesïrendi nani anhaxurhini sino arkarku.

Palomasï ma

Noe ménderu palomasïni ma axaspti jimboka uékasïrenga mítini kʼarhindintaspia echeri. Joperu íjtu kʼuanhatsintaspti jimboka no nani úsïrenga anhaxurhini. Noe ménderu axaspti palomasïni, ka iásï kʼuanhatsintaspti olibusïri chkurhi ma jukandiratini. Itsï kétsisptia. Tanimu úni jámani Noe ménderu axaspti palomasïni, ka iásï kʼóru exesptia nani enga úpiringa irekani.

Jiájkani Tata Diosï uandajpaspti Noeni, ka arhispti: ‘Uéntia arkarhu. Tʼu ka chíti familia ka animalicha’. Jukari ma uéxurhinksï jarhaspti arkarhu. Engaksï uéntapkia, ¡eranhaska na xániksï tsípipi exeni eskaksï tsípiti jarhaspka!

Génesis 7:10-24; 8:1-17; 1 Pedru 3:19, 20.



Kurhamarhikuecha

  • ¿Andisï nóteru nema úpia inchani arkarhu enga uénapkia janini?
  • ¿Jeoba namuni jurhiatikua ka namuni chúrikua janiraspi, ka nani jamberi tarharaspi itsï?
  • Enga itsï úndapka tarharani, ¿ambe úkuarhispi arkani jingoni?
  • ¿Tsípitiksï pakaraspi kʼuiripu iójtarecha Kʼéri Janikuarhu? ¿Ambeksï úkuarhinchaspi tátembecha?
  • ¿Ambe úkuarhinchaspi arka iúmu kutsï tátsekua?
  • ¿Noe andisï jurajkupi eska kʼuáki ma uérapiringa?
  • ¿Néna mítispi Noe eska itsï kʼarhixapkia?
  • ¿Ambe arhispi Jeoba Noeni, enga ima ka imeri familia jukariksï ma uéxurhini japkia arkarhu?

Máteru kurhamarhikuecha

  • Arhinta Génesis 7:10-24.

    ¿Ambe ka ambe kʼamajkuspi Kʼéri Janikua? (Gén. 7:23.)

    ¿Na xáni ióni nitamaspi paraka itsï kétsipiringa? (Gén. 7:24.)

  • Arhinta Génesis 8:1-17.

    ¿Néna xarhatasïni Génesis 8:17 eska Jeoba no mirikurhixaka ambe enga uéjka úni Echerini jingoni? (Gén. 1:22.)

  • Arhinta 1 Pedru 3:19, 20.

    ¿Ambeksï úkuarhinchaspi ánjili no kurhandicha engaksï kʼuanhatsentapka auandarhu? (Jud. 6.)

    ¿Nénajtsïni uinhaperantasïni Noeri ka imeri familieri nitamakua parachi mintsikani eskajtsïni Jeoba uáka kuájpintaka? (2 Ped. 2:9.)